ក្រោយបញ្ចប់កិច្ចប្រជុំប្រចាំខែ ធនាគារកណ្តាលរបស់ចិនបានសម្រេចកាត់បន្ថយអត្រាការប្រាក់កម្ចីរយៈពេលមួយឆ្នាំ ០,០៥% បន្ថែមទៀត ពី៣,៧% មកនៅត្រឹម ៣,៦៥%។ ដោយឡែកសម្រាប់អត្រាការប្រាក់កម្ចីរយៈ៥ឆ្នាំ ត្រូវបានកាត់បន្ថយ ០,១៥% ពី ៥,៤៥% មកនៅត្រឹម ៤,៣%វិញ។
ទោះអាចជៀសផុតពីកំណើនអវិជ្ជមានក៏ពិតមែន តែសេដ្ឋកិច្ចចិនកាលពីត្រីមាសទី២ឆ្នាំនេះ មានកំណើនតិចតួចណាស់។ ជាមួយនឹងកំណើនប្រចាំត្រីមាសត្រឹម ០,៤% តំបន់ជាច្រើនត្រូវបិទខ្ទប់ដោយអន្លើៗ ការចំណាយផ្នែកឧស្សាហកម្មឯកជន និងចំណាយរបស់អ្នកប្រើប្រាស់មានតិចតួច ខណៈដែលមួយរយៈចុងក្រោយរលកកំដៅកំពុងធ្វើឱ្យខ្វះខាតអគ្គិសនីប្រើប្រាស់នៅតាមរោងចក្រសំខាន់ៗ និងបណ្តាលឱ្យផ្អាកសកម្មភាពផងដែរ។
គួរជម្រាបថា កម្ចីថ្មី និងកម្ចីដែលមិនទាន់សងនៅប្រទេសចិន ភាគច្រើននៃអត្រាការប្រាក់ត្រូវបានកំណត់ដូចទៅនឹងកម្ចីរយៈពេលមួយឆ្នាំដែរ។ ដោយឡែកកម្ចីសម្រាប់ទិញផ្ទះត្រូវបានកំណត់ការប្រាក់ទៅតាមអត្រាការប្រាក់កម្ចីរយៈពេល៥ឆ្នាំ។
គួររំឭកថា កាលពីសប្តាហ៍មុន ធនាគារកណ្តាលរបស់ចិន បានកាត់បន្ថយម្តងរួចមកហើយនូវអត្រាការប្រាក់ នៃការផ្តល់កម្ចីរយៈពេលមធ្យមរបស់ខ្លួនដល់ធនាគារឯកជនមួយចំនួន។ ក្នុងនោះ គេបានកាត់បន្ថយ ០,១% ពី២,៨៥%មកនៅ២,៧៥%។
អត្ថបទគួរអាន
វិធានការណ៍ទាំងអស់នេះ បានធ្លាក់មកបន្ទាប់ពីទិន្នន័យចុងក្រោយសម្រាប់ខែកក្កដាបានបង្ហាញថា ផលិតកម្មឧស្សាហកម្ម និងការលក់រាយនៅប្រទេសចិនមានការធ្លាក់ចុះយ៉ាងខ្លាំង បើធៀបនឹងខែមិថុនា។ ប្រទេសមានសេដ្ឋកិច្ចធំបំផុតលំដាប់លេខ២របស់ពិភពលោកមួយនេះ បានធ្វើអ្វីៗគ្រប់យ៉ាងដើម្បីទទួលបានការងើបឈរឡើងវិញដ៏រឹងមាំមួយ។ ទោះយ៉ាងណាភាព មិនច្បាស់លាស់នៅតែមាន ដោយសារតែការបិទខ្ទប់តាមតំបន់ម្តងហើយម្តងទៀតក្រោមគោលនយោបាយគ្មានកូវីដ១៩ដ៏តឹងរ៉ឹងរបស់រដ្ឋាភិបាល។
ជាក់ស្តែង បន្ទាប់ពីការបិទខ្ទប់អស់ពេលពីរខែនៅឯមជ្ឈមណ្ឌលហិរញ្ញវត្ថុដ៏ធំនៃទីក្រុងសៀងហៃកាលពីដើមឆ្នាំនេះ នៅមួយរយៈចុងក្រោយនេះក្រសួងសុខាភិបាលចិនបានដាក់បញ្ជាឱ្យបិទខ្ទប់បន្ថែមទៀតនៅស្ទើពាសពេញផ្ទៃប្រទេសទៅហើយ រាប់ចាប់ពីតំបន់ទីបេ រហូតដល់គោលដៅ ទេសចរណ៍កោះហៃណាន។ ទោះត្រូវមើលឃើញពីកំណើនសេដ្ឋកិច្ចយ៉ាប់យ៉ឺនប៉ុនណាក៏ដោយ គ្មានសញ្ញាណាមួយដែលបុរសខ្លាំងស៊ី ជីនពីង និងទំលាក់ចោលគោលនយោបាយមួយនេះទេ និងបើទោះបីជាប្រទេសទាំងអស់ក្នុងលោកបានលុបចោលការរិតបណ្តឹងនានាហើយក៏ដោយ។
សូមជម្រាបដែរថា ទីផ្សារអចលនទ្រព្យដែលតំណាងប្រហែលមួយភាគបួននៃផលិតផលក្នុងស្រុកសរុបរបស់ចិន ក៏នៅតែស្ថិតក្រោមសម្ពាធផងដែរ ខណៈដែលអ្នកទិញផ្ទះរាប់ពាន់នាក់បានគំរាមមិនបង់សងកម្ចីរបស់ពួកគេឡើយ រហូតដល់អ្នកអភិវឌ្ឍន៍គម្រោងដែលជាប់បំណុលវណ្ឌកបញ្ចប់ការសាងសង់ផ្ទះរបស់ពួកគេទៅតាមផែនការ៕
