តាមពិតទៅ ផលិតកម្មស្រូវអង្ករជួយផ្ដល់ការងារធ្វើដល់ប្រជាពលរដ្ឋប្រមាណ ៣ លាននាក់។ ស្រូវរបស់កម្ពុជាភាគច្រើនគឺត្រូវបាននាំចេញទៅប្រទេសថៃ និងជាពិសេស គឺ វៀតណាម ដែល យកទៅកិន សម្រាប់ផ្គត់ផ្គង់ក្នុងស្រុក និងនាំចេញទៅបរទេស ដោយរាប់ទាំងការនាំចូលត្រលប់មកកម្ពុជាវិញផង។
ដូច្នេះ កម្ពុជាបានបាត់បង់ឱកាសក្នុងការបង្កើនតម្លៃចេញពីកសិផលរបស់ខ្លួន។ បើមានលទ្ធភាព រោងម៉ាស៊ីនកិនស្រូវ និងអ្នកធ្វើអាជីវកម្មស្រូវអាចនាំចេញអង្ករដោយផ្ទាល់ ដោយពុំចាំបាច់លក់ស្រូវទៅឲ្យប្រទេសជិតខាង ហើយបង្កើតការងារធ្វើបន្ថែមក្នុងស្រុក ដែលអាចជួយទប់ស្កាត់ការធ្វើចំណាកស្រុកខ្លះបាន។
តាមការសង្កេតជាក់ស្ដែងឃើញថា បញ្ហាប្រឈមនៅក្នុងវិស័យកសិកម្មរួមមាន កសិករមាន ការខ្វះខាតដើមទុន លទ្ធភាពស្វែងរកប្រាក់កម្ចីផ្នែកកសិកម្មពុំមានភាពទូលំទូលាយ ការដាំដុះ ជាលក្ខណៈគ្រួសារ មិនសូវប្រមូលផ្ដុំគ្នាជាក្រុមដើម្បីលក់បានច្រើន រោងម៉ាស៊ីនកិនស្រូវ មិនមានលទ្ធភាពផ្នែកទុន ដើម្បីទិញស្រូវស្តុកទុកឲ្យបានច្រើន សម្រាប់កិនផ្គត់ផ្គង់ទីផ្សារ ក្នុងស្រុក និងសម្រាប់នាំចេញ ។
លោក Kengo Kitaura ជនជាតិជប៉ុន និងជាស្ថាបនិកក្រុមហ៊ុន Agribuddy
តើបានអានអត្ថបទនេះ ឬនៅ?
ដោយមើលឃើញថា ក្នុងចង្វាក់ផលិតកម្មកសិកម្មនេះ មានភាពបែកខ្ញែកមិនសូវ ជារួមប្រមូល ផ្ដុំគ្នា ទើបសហគ្រិន ជនជាតិជប៉ុនមួយរូបបានបង្កើតក្រុមហ៊ុនមួយឡើងឈ្មោះ អេហ្គ្រីបាឌី (Agribuddy) កាលពីចុងឆ្នាំ ២០១៥ ដើម្បីជួយសម្របសម្រួលចង្វាក់ផលិតកម្មកសិកម្ម ដំណាំស្រូវ ពោត និងដំឡូងមីឲ្យមានភាពរលូនឡើងវិញ និងផ្ដល់អត្ថប្រយោជន៍ដល់ កសិករ ផង អ្នកកែច្នៃផង គ្រឹះស្ថានផ្ដល់ហិរញ្ញវត្ថុផង និងការផ្គត់ផ្គង់ក្នុងស្រុក និងការនាំចេញផង។
លោក យ៉ង់ ប៉ាក់ នាយកក្រុមហ៊ុន អេហ្គ្រីបាឌី ប្រចាំប្រទេសកម្ពុជា បានមានប្រសាសន៍ថា អេហ្គ្រីបាឌី កំពុងធ្វើការដើម្បីជួយសម្របសម្រួលទុនកសិកម្មដល់កសិករ ជាពិសេស កសិករ ដែលមានដីស្រែចម្ការ តែខ្វះទុន ដើម្បីទទួលបានធាតុចូលកសិកម្មផ្សេងៗដូចជា ពូជ ជី ថ្នាំ។ ទន្ទឹមនឹងនេះ ក្រុមហ៊ុនក៏សម្របសម្រួលទីផ្សារ ធ្វើយ៉ាងណាឲ្យមានអ្នកកែច្នៃ ឬរោងម៉ាស៊ីន កិនស្រូវក្នុងស្រុកមកទិញកសិផលរបស់កសិករដែលផលិតបាន ដើម្បីយកទៅផ្គត់ផ្គង់ទីផ្សារ ក្នុងស្រុក និងនាំចេញ ។ ទន្ទឹមនឹងនេះ ក្រុមហ៊ុនក៏កំពុងព្យាយាមសម្របសម្រួលទុនដល់អ្នកកែច្នៃ និងរោងម៉ាស៊ីន ដើម្បីឲ្យគាត់មានលទ្ធភាពបន្ថែមទៀតក្នុងការទទួលទិញកសិផល ។ ធ្វើដូច្នេះ គឺអាចពង្រឹងសមត្ថភាពរបស់ប្រទេសកម្ពុជា ក្នុងការនាំចេញអង្ករប្រណីត ក៏ដូចជាកសិផល របស់ខ្លួន ទៅកាន់ទីផ្សារពិភពលោកបានកាន់តែច្រើនថែមទៀត។ ចំណែកឯកសិករវិញ ក៏មានសុវត្ថិភាពផ្លូវចិត្តដែរថា កសិផលរបស់គាត់នឹងមានតម្លៃសមរម្យ ដែលធ្វើឲ្យគាត់ទទួលបានផលចំណេញពីរបរកសិកម្ម និងក្លាយជាកសិពាណិជ្ជករថែមទៀតផង។
លោក បានបន្ថែមទៀតថា៖ “ក្នុងរដូវច្រូតកាត់ម្ដងៗ ស្រូវ និងកសិផលផ្សេងទៀត ត្រូវធ្លាយ ចេញទៅក្រៅប្រទេស ដោយសារតែរោងម៉ាស៊ីន និងអ្នកកែច្នៃមិនមានលទ្ធភាពទិញចូល ឲ្យបានច្រើន ដែលកត្តានេះបានរឹតត្បិតលើលទ្ធភាពរបស់កម្ពុជាក្នុងការនាំចេញកសិផល របស់ខ្លួន ដូចជាអង្ករជាដើម។ ដូច្នេះ យើងសង្ឃឹមថា សេវាសម្របសម្រួលរបស់យើងនឹងជួយ ឲ្យចង្វាក់ ផលិតកម្មកសិកម្មមានដំណើរការដោយរលូន។”
លោក យ៉ង់ ប៉ាក់ នាយកក្រុមហ៊ុន អេហ្គ្រីបាឌី ប្រចាំប្រទេសកម្ពុជា។
តើបានអានអត្ថបទនេះ ឬនៅ?
បច្ចុប្បន្ន អេហ្គ្រីបាឌីកំពុងធ្វើការជាមួយនឹងកសិករជាង ៥ម៉ឺននាក់ និងអ្នកកែច្នៃ ក៏ដូចជារោងម៉ាស៊ីនកិនស្រូវប្រម៉ាន ១០រោងម៉ាស៊ីន ក្នុងខេត្តចំនួន ៦ គឺសៀមរាប កំពង់ធំ ប៉ៃលិន បាត់ដំបង ពោធិ៍សាត់ និងបន្ទាយមានជ័យ ហើយចំនួនកសិករជាសមាជិកចេះតែបន្តកើនឡើង ស្របពេលដែលតំបន់ប្រតិបត្តិការក៏កំពុងពង្រីកផងដែរ។
កាលពីឆ្នាំ ២០១៨ អេហ្រ្គីបាឌី បានធ្វើការសាកល្បង សហការដំបូង ជាមួយ រោងម៉ាស៊ីន ប្រម៉ាណ១០ ក្នុងការសម្របសម្រួលដើនទុន ដើម្បីប្រមូលទិញកសិផល(ស្រូវ) ពីកសិករ ប្រម៉ាណ ជិត ១លានដុល្លា ដែលស្មើនឹង ប្រម៉ាណ ៥ពាន់តោន ហើយ ឆ្នាំ២០១៩នេះ គ្រោង ពង្រីកសេវាកម្មនេះ រហូតដល់ ១០ម៉ឺនតោន បន្ថែមទៀត។
តាមរយៈការពង្រីកវិសាលភាពគ្របដណ្ដប់របស់ខ្លួន លោក យ៉ង់ ប៉ាក់ បានថ្លែងថា នៅពេលនេះ លទ្ធភាព របស់អេហ្រ្គីបាឌី អាចផលិតស្រូវដែលមានគុណភាពល្អ ជាង ២០ម៉ឺនតោន ក្នុង១ឆ្នាំ ដែលស្មើនឹងប្រមាណជា ៦ម៉ឺនតោនជាអង្ករប្រណីត។
លោក យ៉ង់ ប៉ាក់ បានបន្ថែមទៀតថា៖ “តាមរយៈកសិករ ជាង ៥ម៉ឺននាក់ ដែលជាសមាជិក អេហ្រ្គីបាឌី ដែលបានប្រើប្រាស់ពូជ និង បច្ចេកទេសត្រឹមត្រូវ យើងសង្ឃឹមថា រោងម៉ាស៊ីនកិនស្រូវ នឹងមិនពិបាក ក្នុងការជ្រើសរើស ស្រូវដែលមានគុណភាពនោះទេ។ បន្ថែមលើនោះ បើរោងម៉ាស៊ីន ខ្វះដើមទុន ក្នុងការប្រមូលទិញស្រូវ ពីកសិករដែលជាសមាជិក អេហ្រ្គីបាឌី យើងនឹងសម្របសម្រួលដើមទុន ពីធនាគារ និង គ្រឹះស្ថានហិរញ្ញវត្ថុ ដែលជាដៃគូ របស់អេហ្រ្គីបាឌី ទាំងក្នុងប្រទេស និង ក្រៅប្រទេសបាន»៕
