ច្រកព្រំដែន Pu Zhai - Tan Thanh ជាច្រកព្រំដែនទី៣ហើយ ដែលត្រូវបានប្រកាសបើកដំណើរការឡើងវិញ បន្ទាប់ពីត្រូវបានបិទជាបណ្តោះអាសន្ន ដោយភាគីចិនកាលពីថ្ងៃទី ១៨ ខែធ្នូមក ក្រោមវិធានការពង្រឹង ដើម្បីទប់ស្កាត់ការរីករាលដាលនៃមេរោគកូវីដ១៩។ ច្រកនេះដើរតួនាទីដ៏សំខាន់ណាស់សម្រាប់ការនាំចូលផ្លែឈើ និងកសិផលពីប្រទេសវៀតណាមចូលមកប្រទេសចិន។
គួរជម្រាបថា ក្រសួងឧស្សាហកម្ម និងពាណិជ្ជកម្មវៀតណាម បានឱ្យដឹងថា នីតិវិធីចាំបាច់មួយចំនួនក្នុងការនាំចេញទំនិញដែលចាប់ផ្តើមឡើងវិញនៅប៉ុស្តិ៍ត្រួតពិនិត្យ Pu Zhai ជាសកម្មភាពវិជ្ជមាន និងត្រូវការជាចាំបាច់ នៅមុនកិច្ចប្រជុំលើកទី ២ នៃក្រុមការងារស្តីពីការសម្រួលពាណិជ្ជកម្មវៀតណាម - ចិន និងកិច្ចប្រជុំលើកទី ១ នៃគណៈកម្មាធិការឯកទេស ដែលបង្កើតឡើងដើម្បីដោះស្រាយការកកស្ទះនៃទំនិញនៅច្រកព្រំដែនភាគខាងជើងវៀតណាមជាមួយចិន។
អត្ថបទគួរអាន
ដោយសារកិច្ចខិតខំប្រឹងប្រែងរួមគ្នាពីភាគីទាំងពីរ ចំនួនរថយន្តដឹកទំនិញ ដែលជាប់គាំងនៅច្រក Lang Son បានធ្លាក់ចុះយ៉ាងខ្លាំងក្នុងរយៈពេលប៉ុន្មានថ្ងៃចុងក្រោយនេះ។ គិតមកទល់ពេលនេះ នៅមានរថយន្ដដឹកជញ្ជូនទំនិញតិចតួចប៉ុណ្ណោះ ដែលនៅកកស្ទះនៅច្រកព្រំដែននេះ ខណៈពីមុនមានមានរថយន្ដរហូតដល់រាប់ពាន់គ្រឿងឯណោះ ដែលកកស្ទះនៅទីនោះ។
យ៉ាងណាមិញ ជាថ្មីម្ដងទៀត ក្រសួងវៀតណាមបានណែនាំដល់មូលដ្ឋាន អាជីវករ កសិផល និងអ្នកបើកឡានដឹកទំនិញឆ្លងកាត់ផ្លូវឆ្ងាយ ត្រូវប្រកាន់ខ្ជាប់នូវច្បាប់បង្ការជំងឺកូវីដ-១៩ ក្នុងការផលិត ការវេចខ្ចប់ និងដឹកជញ្ជូន ដើម្បីធានាថា ទំនិញមានកម្រិតសុវត្ថិភាពខ្ពស់បំផុត៕
អត្ថបទ ស៊ើង និមល់
None
