នេះបើតាមការរាយការណ៍ដោយសារព័ត៌មានចិន South China Morning Post។
ស្ថាប័នដោះស្រាយជម្លោះរបស់អង្គការពាណិជ្ជកម្មពិភពលោក បាននិយាយថា ខ្លួននឹងបង្កើតក្រុមប្រឹក្សាថ្មីមួយ ដើម្បីស៊ើបអង្កេតទៅលើជម្លោះពាណិជ្ជកម្មទាក់ទងនឹងផលិតផលស្រា រវាងចិន និងអូស្ត្រាលីនេះ ដោយក្នុងនោះ ក៏រួមមានការចូលរួមពីប្រទេសចំនួន១៥ រួមទាំងកាណាដា អង់គ្លេស និងនូវែលហ្សេឡង់ផងដែរ ក្នុងនាមជាភាគីទី៣នៃក្រុមប្រឹក្សាដោះស្រាយជម្លោះនេះ។ នេះបើតាមការអះអាងរបស់មន្ត្រីពាណិជ្ជកម្មនៅទីក្រុងសឺណេវ។
មុននឹងអង្គការពាណិជ្ជកម្មពិភពលោកសម្រេចបើកការស៊ើបអង្កេត អូស្ត្រាលីបានស្នើទៅ២លើកទៅអង្គការពាណិជ្ជកម្មពិភពលោកឲ្យដោះស្រាយបណ្ដឹងរបស់ខ្លួន ដែលបានប្ដឹងចិន ដោយសារតែចិនបានដាក់ពន្ធគយលើមុខទំនិញស្រានាំចូលពីអូស្ត្រាលីយ៉ាងគំហុក ខណៈដែលសំណើលើកទី១របស់អូស្ត្រាលី ដែលបានដាក់ទៅកាលពីពេលកន្លងទៅនោះ ត្រូវបានចិនរាំងខ្ទប់ដោយប្រទេសចិនកាលពីខែកញ្ញា។
មន្ត្រីជាន់ខ្ពស់របស់ចិនក៏បានសម្ដែងការសោកស្ដាយ ចំពោះសំណើលើកទី២របស់អូស្ត្រាលី ចំពោះការប្ដឹងទៅកាន់អង្គការពាណិជ្ជកម្មពិភពលោកនេះ។ ទោះយ៉ាងណា ភាគីចិនថាអះអាងថា ខ្លួននឹងការពារយ៉ាងម៉ឺងម៉ាត់នូវវិធានការពន្ធគយរបស់ខ្លួនដែលបានដាក់ចេញនេះ ហើយចិនបានសង្កត់ធ្ងន់ថា កិច្ចការដែលខ្លួនបានធ្វើនេះ គឺស្របទៅតាមច្បាប់ពាណិជ្ជកម្មរបស់អង្គការពាណិជ្ជកម្មពិភពលោក។
អត្ថបទគួរអាន
ជាមួយគ្នានេះដែរ ក្រុងប៉េកាំងក៏បានបញ្ជាក់ថា ខ្លួននឹងនៅតែបើកចំហសម្រាប់ការចូលរួមបន្ថែមទៀតជាមួយនឹងអូស្ត្រាលី ក្នុងគោលបំណងដោះស្រាយជម្លោះពាណិជ្ជកម្មនេះ។
ស្រាអូស្ត្រាលី ត្រូវបានចិនកំណត់យកពន្ធនាំចូលតាំងពីខែ វិច្ឆិកាឆ្នាំ២០២០មកម្ល៉េះ នៅចំពេលដែលប្រទេសទាំងពីនេះ មានភាពតានតឹងផ្នែកនយោបាយដាក់គ្នាកាន់តែខ្លាំង ហើយកាលពីខែមីនា ឆ្នាំ២០២១ ទីក្រុងប៉េកាំង បានសម្រេចចុងក្រោយលើការយកពន្ធនាំចូលស្រាពីប្រទេសអូស្ត្រាលីចន្លោះអត្រាពន្ធពី ជាង១១៦% ទៅដល់ជាង ២១៨%ឯណោះនៅក្នុងរយៈពេលដល់ទៅ៥ឆ្នាំ។
ការតម្រូវឲ្យស្រាអូស្ត្រាលីនាំចេញទៅចិនត្រូវបង់ពន្ធកប់ក្ដោងយ៉ាងដូច្នេះ ក៏បានធ្វើឲ្យផលិតផលស្រាអូស្ត្រាលីបាត់បង់ភាពប្រកួតប្រជែងនៅក្នុងទីផ្សារចិនផងដែរ។ ជាក់ស្ដែង តាំងពីមានការកណត់យកពន្ធតាំងពីខែវិច្ឆិកាឆ្នាំមុនមក តម្លៃនាំចេញស្រាអូស្ត្រាលីទៅចិនបានដាំក្បាលចុះដល់ទៅ ៧៧% ពោលគឺមានមកនៅត្រឹមតែជាង២០០លានដុល្លារអាមេរិកប៉ុណ្ណោះ។
ប្រទេសអូស្ត្រាលី និងចិនមិនមានកិច្ចការទាក់ទងរកគ្នាថ្នាក់រដ្ឋមន្ត្រី តាំងពីតែទំនាក់ទំនងភាគីទាំងបានចាប់ផ្ដើមប្រេះឆាខ្លាំង ក្រោយពេលដែលក្រុងកង់បេរ៉ា កាលពីខែមេសាឆ្នាំមុន បានជំរុញឲ្យអង្គការសុខភាពពិភពលោកបើកការស៊ើបអង្កេតឯករាជ្យមួយទាក់ទងនឹងប្រភពដើមនៃមេរោគកូវីដ១៩ ដោយមិនបានពិគ្រោះសូម្បីមួយម៉ាត់ជាមួយនឹងក្រុងប៉េកាំង។
ប្រការនេះ បានធ្វើឲ្យចិនក្ដៅស្លឹកត្រចៀកយ៉ាងខ្លាំងជាមួយអូស្ត្រាលី ដែលធ្លាប់ជាដៃគូពាណិជ្ជកម្មល្អជាមួយគ្នា តែបែរជាហ៊ាននិយាយវាយប្រហារលើក្រុងបេកាំងយ៉ាងដូច្នេះ។
សូមបញ្ជាក់ថា ទំនាក់ទំនងរប្រេះឆារវាងចិន និងអូស្ត្រាលីទាំងក្នុងវិស័យនយោបាយការទូត និងពាណិជ្ជកម្មនៅតែបន្ដល្អក់កករកាន់តែខ្លាំងឡើងៗ ហើយមកទល់នឹងពេលនេះ នៅមិនទាន់មានសញ្ញាណាមួយថានឹងវិលមកប្រសើរឡើវិញនោះឡើយ។ កន្លងមក មានមុខទំនិញសំខាន់ៗមួយចំនួនរបស់អូស្ត្រាលី ដែលនាំចេញទៅចិនដូចជា ឈើ, ធ្យូងថ្ម និងបង្កងជាដើម ត្រូវបានហាមឃាត់ក្រៅផ្លូវការនាំចូលទីផ្សារចិន ទន្ទឹមនឹងនេះមុខទំនិញ ស្រូវសាលី និងស្រាក៏ត្រូវដាក់ពន្ធធ្ងន់កដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
