ចិនប្រាប់អាមេរិកថា ខ្លួននឹងមិនខ្លាចការដាក់ទណ្ឌកម្មរបស់អាមេរិក ក្នុងករណីចាត់វិធានការលើកោះតៃវ៉ាន់នោះទេ

សារព័ត៌មានរ៉យទ័រដែលបានស្រង់សម្ដីរបស់ លោក Le Yucheng អនុរដ្ឋមន្ត្រីការបរទេសចិន បាននិយាយនៅក្នុងវេទិកាសន្តិសុខអនឡាញមួយថា វាជាការគួរឱ្យអស់សំណើចខ្លាំងណាស់ដែលអាមេរិកបានស្តីបន្ទោសប្រទេសចិនពាក់ព័ន្ធនឹងការលុកលុយរបស់រុស្ស៊ីទៅលើប្រទេសអ៊ុយក្រែន ហើយចិនក៏បានបានចោទពេញៗមាត់ទៅលើសហរដ្ឋអាមេរិកថា បានលះបង់អ៊ុយក្រែនសម្រាប់ផលប្រយោជន៍ភូមិសាស្ត្រនយោបាយផ្ទាល់របស់ខ្លួន។

ប្រទេសចិនបានរងការរិះគន់ចំពោះការមិនថ្កោលទោសការឈ្លានពានរបស់រុស្ស៊ីទៅលើអ៊ុយក្រែន ហើយសហរដ្ឋអាមេរិក និងសម្ព័ន្ធមិត្តបានសម្តែងការព្រួយបារម្ភចំពោះសន្តិសុខរបស់កោះតៃវ៉ាន់ដែលក្រុងប៉េកាំងចាត់ទុកថា ជាខេត្តមួយរបស់ខ្លួន ហើយចិនក៏បានធ្លាប់អះអាងដែរថា នឹងបង្រួបបង្រួមតៃវ៉ាន់ជាមួយចិនដីគោកវិញ ដោយគម្រាមប្រើកម្លាំងបាយផងដែរ ប្រសិនបើចាំបាច់មែននោះ។

ជាការឆ្លើយតបទៅនឹងការព្រមានរបស់អាមេរិក ដែលថាប្រទេសចិននឹងប្រឈមមុខទណ្ឌកម្មស្រដៀងគ្នាទៅនឹងប្រទេសរុស្ស៊ី ប្រសិនបើចិនហ៊ានវាយប្រហារកោះតៃវ៉ាន់មែននោះ លោក Le អនុរដ្ឋមន្ត្រីការបរទេសចិនបាននិយាយថា ប្រទេសចិនត្រូវតែរួបរួមគ្នា ហើយទណ្ឌកម្មនិងភាពឯកោ "មិនអាចបំភ័យចិនបានជាដាច់ខាត"។

លោក Le បានបន្តថា តើព្យុះប្រភេទណាដែលចិនមិនធ្លាប់បានឆ្លងកាត់ក្នុងរយៈពេលជាង ៧០ឆ្នាំចាប់តាំងពីការបង្កើតសាធារណរដ្ឋប្រជាមានិតចិនមកនេះ? លោកបានបន្ថែមទៀតថា ក្នុងពេលប៉ុន្មានឆ្នាំមកនេះ អាមេរិកបានចាត់វិធានការបង្ខិតបង្ខំរួចទៅហើយដូចជាពន្ធគយ ការកាត់បន្ថយកិចសហប្រតិបត្តិការ ការចាប់ខ្លួនមនុស្សពីបទចារកម្ម ប៉ុន្តែរឿងទាំងអស់នេះគឺមិនអាចបំបែកចិនបាននោះឡើយ។

មន្ត្រីជាន់ខ្ពស់ចិនដដែលនេះ បានបញ្ជាក់ថា វាមិនត្រឹមតែចិនមិនដួលរលំប៉ុណ្ណោះទេ ប៉ុន្តែចិននៅតែរីកចម្រើនជារៀងរាល់ថ្ងៃ ដូច្នេះហើយ តើប្រទេសចិនមានអ្វីដែលត្រូវខ្លាចទៀតនោះ?

លោក Le ក៏បានអះអាងច្បាស់ៗថា កោះតៃវ៉ាន់គឺជាកិច្ចការផ្ទៃក្នុងរបស់ចិន ដូច្នេះហើយមិនត្រូវប្រៀបធៀបទៅនឹងអ៊ុយក្រែននោះទេ ហើយថា មនុស្សមួយចំនួនសង្កត់ធ្ងន់លើការគោរពចំពោះអធិបតេយ្យភាព និងបូរណភាពទឹកដីរបស់ប្រទេសមួយ នៅពេលនិយាយអំពីអ៊ុយក្រែន ប៉ុន្តែបោះជំហានជាន់លើបន្ទាត់ក្រហមនៃគោលនយោបាយ«ចិនតែមួយ» និងគាំទ្រឯករាជ្យកោះតៃវ៉ាន់ទៅវិញ។

លោកអនុរដ្ឋមន្ត្រីការបរទេសរូបនេះបានបញ្ជាក់ថា ថ្មីៗនេះសហរដ្ឋអាមេរិកបាននិងកំពុងដំឡើងសាច់ដុំរបស់ខ្លួននៅមាត់ទ្វារប្រទេសចិនដោយបានគៀងគរឱ្យមជ្ឈដ្ឋានជុំវិញប្រទេសចិនធ្វើការជំទាស់នឹងប្រទេសនេះ ហើយថែមទាំងបង្កភាពច្របូកច្របល់ពីបញ្ហាតៃវ៉ាន់ដើម្បីសាកល្បងការកំណត់បន្ទាត់ក្រហមរបស់ចិនផងដែរ៕

អត្ថបទ៖ សុខ ជា