រដ្ឋបាលទទួលបន្ទុកគ្រប់គ្រងលំហរអ៊ិនធឺណិតនៃប្រទេសចិនបាននិយាយថា ផលិតផល Micron មិនបានបញ្ជាក់អំពី "ហានិភ័យសុវត្ថិភាពបណ្តាញសំខាន់ៗទេ" ជាហេតុបង្កគ្រោះថ្នាក់ដល់ហេដ្ឋារចនាសម្ព័ន្ធព័ត៌មានរបស់ប្រទេសចិន និងប៉ះពាល់ដល់សន្តិសុខជាតិ។ សេចក្តីថ្លែងការណ៍ដែលមានប្រាំមួយល្បះរបស់រដ្ឋបាលនេះ មិនបានផ្តល់ព័ត៌មានលម្អិតអំពីរឿងនេះទេ ដោយគ្រាន់តែបាននិយាយថា "ប្រតិបត្តិករនៃហេដ្ឋារចនាសម្ព័ន្ធព័ត៌មានសំខាន់ៗនៅក្នុងប្រទេសចិន គួរតែបញ្ឈប់ការទិញផលិតផលពីក្រុមហ៊ុន Micron" ។
សហរដ្ឋអាមេរិក អឺរ៉ុប និងជប៉ុន កំពុងកាត់បន្ថយលទ្ធភាពរបស់ចិនក្នុងការផលិតបន្ទះគ្រឿងអេឡិចត្រូនិកទំនើបៗ និងការទទួលបានបច្ចេកវិទ្យាផ្សេងទៀត ដែលប្រទេសទាំងនេះនិយាយថា អាចត្រូវបានប្រើប្រាស់ក្នុងបរិក្ខារអាវុធ ស្របពេលដែលរដ្ឋាភិបាលលោកប្រធានាធិបតី Xi Jinping បានគម្រាមវាយប្រហារកោះតៃវ៉ាន់ ហើយកំពុងបង្កើនអំណាចកាន់តែខ្លាំងចំពោះប្រទេសជប៉ុន និងប្រទេសជិតខាងផ្សេងៗទៀត។
អត្ថបទគួរអាន
ការពិនិត្យឡើងវិញជាផ្លូវការលើ បន្ទះឈីម៉ាក Micron ក្រោមច្បាប់សន្តិសុខព័ត៌មានដ៏តឹងរ៉ឹងរបស់ប្រទេសចិន ត្រូវបានប្រកាសនៅថ្ងៃទី ៤ ខែមេសា គឺនៅប៉ុន្មានម៉ោងប៉ុណ្ណោះ បន្ទាប់ពីប្រទេសជប៉ុនបានចូលរួមជាមួយសហរដ្ឋអាមេរិក ក្នុងការដាក់កំហិតមិនឱ្យប្រទេសចិនចូលប្រើប្រាស់បច្ចេកវិទ្យាកម្រិតខ្ពស់របស់ខ្លួន ដោយសម្អាងលើហេតុផលសុវត្ថិភាព។
សេចក្តីប្រកាសរបស់រដ្ឋបាលលំហរអ៊ិនធឺណិតរបស់ចិនកាលពីថ្ងៃអាទិត្យហាក់ដូចជាព្យាយាមធានាក្រុមហ៊ុនបរទេសកុំឱ្យបារម្ភ ដោយនិយាយថា ប្រទេសចិនជំរុញយ៉ាងម៉ឺងម៉ាត់ឱ្យមានការបើកចំហរខ្លាំងទៅកាន់ពិភពខាងក្រៅ ហើយដរាបណាក្រុមហ៊ុនបរទេសគោរពតាមច្បាប់ និងបទប្បញ្ញត្តិរបស់ចិន, ប្រទេសចិនសូមទទួលស្វាគមន៍សហគ្រាសនានា ព្រមទាំងផលិតផលនិងសេវាកម្មទាំងឡាយពីប្រទេសផ្សេងៗ មកក្នុងទីផ្សារចិន"៕
ដោយ៖ ឯម មាឃ
