អាជ្ញាធរចិន កំពុងផ្តួចផ្តើមបើកយុទ្ធនាការត្រួតពិនិត្យថ្មីមួយលើស្ថាប័ននិយ័តករសេដ្ឋកិច្ច និងស្ថាប័នហិរញ្ញវត្ថុសំខាន់ៗ ក៏ដូចជាធនាគាររដ្ឋធំៗមួយចំនួន និងស្ថាប័នពាក់ព័ន្ធផ្សេងទៀតប្រមាណជា ៣៤ស្ថាប័ន ដើម្បីស្តារសេដ្ឋកិច្ចចិន ដែលកំពុងដើរអូសជើងនៅពេលនេះ។ ហើយនេះ គឺជាចំណាត់ការថ្មីមួយ ដែលអាជ្ញាធរចិន បានដាក់ចេញ ចាប់តាំងពីចិនបានប្រកាសចេញនូវគោលការណ៍ បញ្ជី ស ដើម្បីសង្រ្គោះវិស័យអចលនទ្រព្យ ក៏ដូចជាការប្រឈមមុខនឹងលំហូរចេញ នៃទុនវិនិយោគបរទេសនៅក្នុងប្រទេសជាបន្តបន្ទាប់។
ពាក់ព័ន្ធនឹងការត្រួតពិនិត្យនេះ លោក លី ស៊ី ( Li Xi )ប្រធានស្ថាប័នប្រឆាំងអំពើពុករលួយរបស់ចិន បាននិយាយថា ការធ្វើអធិការកិច្ចថ្មីនេះ នឹងផ្តោតលើស្ថាប័នហិរញ្ញវត្ថុសំខាន់ៗ និងអង្គភាពពាក់ព័ន្ធនឹងសេដ្ឋកិច្ច ស្របពេលដែលទីក្រុងប៉េកាំង កំពុងផ្តោតការយកចិត្តទុកដាក់លើការគ្រប់គ្រងហិរញ្ញវត្ថុនៅក្នុងប្រទេស។
អត្តបទគួរអាន
ស្ថាប័ននិយ័តករសេដ្ឋកិច្ច ធនាគារ និង ហិរញ្ញវត្ថុដែលជាគោលដៅសំខាន់ៗនៃការត្រួតពិនិត្យនេះ រួមមាន ធនាគារកណ្តាលរបស់ប្រទេសចិន និយ័តករផ្សារមូលបត្រចិន និងនិយ័តករគ្រប់គ្រងការប្តូរប្រាក់បរទេសចិន ស្ថាប័នរៀបចំផែនការសេដ្ឋកិច្ច និង ក្រសួងហិរញ្ញវត្ថុចិនជាដើម។ ជាមួយគ្នានេះដែរ ធនាគាររដ្ឋធំៗមួយចំនួនរបស់ប្រទេសចិន ដូចជា ធនាគារឧស្សាហកម្ម និង ពាណិជ្ជកម្ម, ធនាគារកសិកម្ម, ធនាគារចិន, ធនាគារសំណង់ និង ធនាគារទំនាក់ទំនង រួមទាំងក្រុមហ៊ុនធានារ៉ាប់រងរបស់រដ្ឋចំនួនពីរ និង ធនាគារនាំចេញ-នាំចូលចិន ក៏នឹងបើកទ្វារទទួលការត្រួតពិនិត្យឡើងវិញ ដោយស្ថាប័នប្រឆាំងអំពើពុករលួយរបស់មហាយក្សចិននេះផងដែរ។
ការដាក់ចេញនូវយន្តការត្រួតពិនិត្យនេះ ធ្វើឡើងក្រោយ លោក ស៊ី ជិនពីង ប្រធានាធិបតីចិនបានលើកឡើងកាលពីពេលថ្មីៗថា ការការពារហានិភ័យហិរញ្ញវត្ថុ គឺជាប្រធានបទដែលចិនត្រូវតែធ្វើជាប្រចាំ ដើម្បីការពារចក្ខុវិស័យសេដ្ឋកិច្ចឲ្យមានប្រសិទ្ធភាព៕
ដោយៈ សរ សុជាតិ
None
