ជាមួយគ្នានេះ អាមេរិកក៏បានសម្តែងការព្រួយបារម្ភអំពីសកម្មភាពនៃបទបញ្ជារបស់និយ័តករចិន ចំពោះក្រុមហ៊ុនចិនចុះបញ្ជីនៅអាមេរិកផងដែរ។
គណៈកម្មការមូលបត្រចិន បាននិយាយនៅក្នុងសេចក្តីថ្លែងការណ៍មួយថា ខ្លួនបានកត់សម្គាល់ឃើញនូវការតម្រូវថ្មីៗរបស់គណៈកម្មការមូលបត្រអាមេរិក សម្រាប់ការបង្ហាញព័ត៌មាននានាទាក់ទងនឹងការចុះបញ្ជីក្រុមហ៊ុនចិននៅអាមេរិក។ និយ័តករចិន បានលើកឡើងទៀតថា ភាគីទាំងពីរគួរតែប្រកាន់ខ្ជាប់នូវស្មារតីនៃការគោរពគ្នាទៅវិញទៅមក និង ពង្រឹងទំនាក់ទំនងលើការធ្វើនិយ័តកម្មផ្សារភាគហ៊ុនដែលទាក់ទងនឹងប្រទេសចិន។
គណៈកម្មការមូលបត្រចិន តែងតែបើកចំហឲ្យក្រុមហ៊ុនអាចជ្រើសរើសកន្លែង ដែលពួកគេចង់បោះផ្សាយលក់ភាគហ៊ុនជាសាធារណៈ ហើយមូលដ្ឋានគោលនយោបាយជាតិ នៃការធ្វើកំណែទម្រង់និងការបើកចំហររបស់ប្រទេសចិន គឺមិនមានការកែប្រែនោះទេ ហើយការបើកចំហរផ្នែកហិរញ្ញវត្ថុទៅក្រៅប្រទេសនឹងនៅតែបន្ត” ។
ទោះយ៉ាងណា គណៈកម្មការមូលបត្រអាមេរិក បានបញ្ជាក់នាពេលថ្មីៗនេះដែរ មុនអនុញ្ញាតឱ្យក្រុមហ៊ុនចិនបង្កើនដើមទុនតាមរយៈផ្សារភាគហ៊ុនអាមេរិកបាន ខាងនិយ័តករនឹងតម្រូវឱ្យក្រុមហ៊ុនចិនត្រូវ បង្ហាញព័ត៌មាន របស់ក្រុមហ៊ុនទាំងអស់ ដោយ ត្រូវប្រាកដថា មិនមាន ការលូកដៃពីខាងរដ្ឋចិន ចំពោះប្រតិបត្តិការក្រុមហ៊ុន ក៏ដូចជា លទ្ធភាពដែលអាចកើតឡើង នាពេលខាងមុខ ទាក់ទងនឹង ការជ្រៀតជ្រែកពីរដ្ឋចិន ដែលសកម្មភាពនេះ អាមេរិកចាត់ទុកថា អាចនឹងបង្កផលប៉ះពាល់យ៉ាងខ្លាំងដល់ប្រតិបត្តិការហិរញ្ញវត្ថុរបស់ក្រុមហ៊ុន។
អត្ថបទទាក់ទង
បន្ថែមពីនេះ ក្រុមហ៊ុនចិន ត្រូវតែបង្ហាញដោយបើកចំហរផងដែរ ប្រសិនបើពួកគេត្រូវបានបដិសេធការអនុញ្ញាតពីអាជ្ញាធរចិនក្នុងការចុះបញ្ជីផ្សារភាគហ៊ុននៅអាមេរិក ហើយបើមានបញ្ហាបែបនេះមែន និយ័តករផ្សារមូលបត្រអាមេរិក អាចបដិសេធ ឬលុបចោលសំណើបោះផ្សាយលក់មូលបត្រក្រុមហ៊ុនចិនទាំងនោះ។
ជាមួយគ្នានេះ អាជ្ញាធរចិនបាននិយាយថា ក្រុមហ៊ុនចិនណាដែលមានទិន្នន័យអ្នកប្រើប្រាស់ជាង ១ លាននាក់ត្រូវរាយការណ៍ដើម្បីពិនិត្យឡើងវិញអំពីសន្តិសុខតាមអ៊ីនធឺណែតមុនពេលស្វែងរកការចុះបញ្ជីនៅបរទេស។ សូមបញ្ជាក់ថា ក្រុមហ៊ុនចិនធំៗ មួយចំនួនត្រូវបានគេមើលឃើញថា មានតម្លៃភាគហ៊ុនធ្លាក់ចុះជាបន្តបន្ទាប់នាពេលថ្មីៗនេះដោយសារទីក្រុងប៉េកាំងបានបង្កើនបទបញ្ជានៃការការពារទិន្នន័យ និងសន្តិសុខ ចំពោះក្រុមហ៊ុនទាំងនោះ។
តួយ៉ាង ភាគហ៊ុនក្រុមហ៊ុន Didi Global ដែលបានចុះបញ្ជីនៅសហរដ្ឋអាមេរិក បានធ្លាក់ចុះតម្លៃភាគហ៊ុនជិត ២០% បន្ទាប់ពីក្រុមហ៊ុនត្រូវបានអាជ្ញាធរិន បញ្ជាឱ្យបញ្ឈប់ការចុះឈ្មោះអ្នកប្រើប្រាស់ថ្មីៗ និងលុបកម្មវិធីរបស់ខ្លួនចេញពី App Store នៅក្នុងប្រទេសចិនផងដែរ។ នេះបើយោងតាមការចុះផ្សាយ Nikkei Asia៕
អត្ថបទ៖ ស៊ើង និមល់
None
