ការវិនិយោគក្រៅប្រទេសរបស់មហាយក្សចិន ក្នុងឆ្នាំ២០២៣ បានកើនឡើងខ្ពស់ជាងក្នុងឆ្នាំ២០២២ ដល់ទៅជិត៨០% ដោយបានទាក់ទាញការចូលរួមពី១៥០ប្រទេស ជាមួយទំហំវិនិយោគឈានដល់ជាង១ទ្រីលានដុល្លារអាម៉េរិក ចាប់តាំងពីឆ្នាំ២០១៣ មក។ នេះបើយោងតាមរបាយការណ៍ថ្មីមួយពីសកលវិទ្យាល័យហ្គ្រីហ្វីហ្វ (Griffith University) ដែលមានមូលដ្ឋាននៅប្រទេសអូស្ត្រាលី និងសកលវិទ្យាល័យហ្វូតាន (Fudan University) ដែលមានមូលដ្ឋាននៅក្រុងសៀងហៃ ប្រទេសចិន។
របាយការណ៍ដដែលបានបង្ហាញថា ការវិនិយោគលើគម្រោងបច្ចេកវិទ្យាខ្ពស់រួមទាំងការផលិតរថយន្តអគ្គិសនីផង បានកើនឡើងយ៉ាងខ្លាំង ដោយក្នុងនោះការផលិតអាគុយបានគ្របដណ្ដប់ក្នុងទំហំប្រមាណ៨ពាន់លានដុល្លារអាម៉េរិក ដែលជំរុញដោយផែនការសាងសង់រោងចក្រផលិតអាគុយនៅក្នុងប្រទេសកូរ៉េខាងត្បូង និងរោងចក្រផលិតរថយន្តនៅក្នុងប្រទេសថៃ វៀតណាម ប្រេស៊ីល និងហុងគ្រីជាដើម។
អត្ថបទគួរអាន
ការវិនិយោគក្រៅប្រទេសរបស់មហាយក្សចិន ក្នុងឆ្នាំ២០២៣ បានកើនឡើងដល់កម្រិតខ្ពស់បំផុតមិនធ្លាប់មានចាប់តាំងពីឆ្នាំ២០១៨ មក ទោះបីជាមានការធ្លាក់ចុះការវិនិយោគក្នុងស្រុក និងការព្រួយបារម្ភនៅក្នុងប្រទេសមួយចំនួន អំពីឥទ្ធិពលរបស់មហាយក្សចិន និងការអនុវត្តរបស់មហាយក្សចិន នៅក្នុងការផ្តល់កម្ចីឥណទានយ៉ាងណាក្ដី។
ការធ្លាក់ចុះគម្រោងសាងសង់ក្នុងគំនិតផ្ដួចផ្ដើមខ្សែក្រវាត់ និងផ្លូវ (BRI) បានឆ្លុះបញ្ចាំងពីការព្រួយបារម្ភទាំងនោះ ហើយប្រទេសមួយចំនួនបានរៀបចំឥណទាន ឬបំណុលរបស់ពួកគេឡើងវិញក្នុងរយៈពេលប៉ុន្មានឆ្នាំចុងក្រោយនេះ រួមទាំងប្រាក់ ដែលពួកគេបានខ្ចី ដើម្បីទូទាត់សងថ្លែគម្រោងហេដ្ឋារចនាសម្ព័ន្ធ ដែលដឹកនាំដោយប្រទេសចិនផងដែរ។
របាយការណ៍នេះបញ្ជាក់ថា ជាមធ្យមគម្រោងសាងសង់ដែលត្រូវបានប្រកាសកាលពីឆ្នាំមុនមានទំហំតិចជាង៤០០លានដុល្លារអាម៉េរិក ជាតួលេខទាបបំផុតទី២ ចាប់តាំងពីគំនិតផ្ដួចផ្ដើមខ្សែក្រវាត់ និងផ្លូវ (BRI) ត្រូវបានចាប់ផ្តើមក្នុងឆ្នាំ២០១៣៕
ដោយ: តែម សុខុម
None
