ក្រុមហ៊ុនអភិវឌ្ឈន៍អចលនទ្រព្យដ៏ធំមួយនៅចិន ទទួលបានការគាំទ្រពីរដ្ឋាភិបាលតាមតំបន់

ក្រុមអភិវឌ្ឍន៍អចលនទ្រព្យ Country Garden ដែលមានតម្លៃវិនិយោគប្រមាណជា៣០ពាន់លានដុល្លារមានមូលដ្ឋាននៅក្វាងទុង បានអះអាងថា គម្រោងរបស់ខ្លួនជាង៣០កន្លែង កំពុងទទួលបានការគាំទ្រ ដោយរដ្ឋាភិបាលក្នុងតំបន់នានានៅក្នុងប្រទេសចិន។ ក្រុមហ៊ុននេះបានប្រកាសថា រាល់គម្រោងរបស់ខ្លួននឹងទទួលបានការគាំទ្រផ្នែកហិរញ្ញប្បទានពីរដ្ឋាភិបាលនៅក្នុងតំបន់នានា ខណៈដែលអាជ្ញាធរមានគោលបំណងបញ្ចូលសាច់ប្រាក់ងាយស្រួលទៅក្នុងវិស័យ ដែលកំពុងជួបវិបត្តិមួយនេះ។

ក្រុមហ៊ុនអភិវឌ្ឍន៍អចលនទ្រព្យឯកជនរបស់ចិនមួយនេះ ក៏បាននិយាយនៅក្នុងសេចក្តីថ្លែងការណ៍មួយដែរថា គម្រោងរបស់ខ្លួនកំពុងបញ្ចូលក្នុងបញ្ជី ដែលអាជ្ញាធរចិនហៅថា «បញ្ជីស» ដើម្បីសង្រ្គោះនៅក្នុងខេត្ត ហឺណាន, ហឺប៉ី, ស៊ីឈូន, សាន់ទុង និងក្រុងចុងគីង។

ក្រុមហ៊ុន Country Garden បានអះអាងថា គម្រោងទាំងនេះ បន្ទាប់ពីត្រូវបានបញ្ចូលទៅក្នុងបញ្ជីស នឹងទទួលបានការគាំទ្រផ្នែកហិរញ្ញប្បទាន ដែលនឹងជួយបន្ធូរបន្ថយសម្ពាធលើសាច់ប្រាក់ងាយស្រួល និងធានាបាននូវគម្រោងកសាងលំនៅឋានរបស់ខ្លួន។

បញ្ជីស ត្រូវបានគេដឹងថា គឺជាបញ្ជីថ្មី ដែលមហាយក្សចិនបានដាក់ចេញដើម្បីពង្រឹងវិធានការសង្រ្គោះវិស័យអលនទ្រព្យ ដែលកំពុងជួបព្យុះភ្លៀងដ៏ខ្លាំងក្លាជាបន្តបន្ទាប់ ហើយនៅក្រោមយន្តការ បញ្ជីសនេះ រដ្ឋាភិបាលនៃទីក្រុងចំនួន៣៥ នៅទូទាំងប្រទេសចិន គឺកំពុងមមាញឹករៀបចំការណែនាំដល់គម្រោងលំនៅឋានដល់ធនាគារ ដែលត្រូវការជំនួយផ្នែកហិរញ្ញវត្ថុ៕

ដោយៈ សរ សុជាតិ