ទោះជាយ៉ាងណា សេដ្ឋកិច្ចចិននៅឆ្នាំនេះ ក៏កំពុងប្រឈមនឹងការគំរាមកំហែងធ្ងន់ធ្ងរដោយសារតែកូវីដ១៩ផងដែរ ខណៈពេលនេះ នៅទីក្រុងសំខាន់មួយចំនួន រួមទាំង ទីក្រុងស៊ិនជិន ទីក្រុងសៀងហៃ កំពុងរងនូវវិធានការតឹងរ៉ឹង និង ការបិទខ្ទប់ផងដែរ។
របាយការណ៍ថ្មីចុងក្រោយមួយរបស់ការិយាល័យស្ថិតិជាតិចិនបានបង្ហាញថា នៅ៣ខែដំបូងឆ្នាំ២០២២ សេដ្ឋកិច្ចចិនមានសន្ទុះ៤,៨% ជាអត្រាលើសការរំពឹងទុកកន្លងមកដែលមានត្រឹម៤,៣%ប៉ុណ្ណោះ ហើយតួលេខនេះមានកំណើនល្អប្រសើរផងដែរបើធៀបនឹងបីខែដំបូងឆ្នាំ២០២១ ដែលមានកំណើនត្រឹម៤%។
ជារួម យើងសង្កេតឃើញថា សេដ្ឋកិច្ចចិនមានលំនឹង និងស្ទុះឡើងល្អជាប្រចាំបើទោះបីជាមិនស្ថិតក្នុងអត្រាខ្លាំងក្លាណាស់ណាក៏ដោយ។ អាជ្ញាធរចិនបានអះអាងថា នៅខែ៣កន្លងមកនេះ កម្លាំងផលិតកម្ម ក្នុងវិស័យឧស្សាហកម្ម បានស្ទុះឡើងប្រមាណ៥% រវាង១ឆ្នាំចុងក្រោយនេះ។ គួរជម្រាបថា កំណើនផ្នែកឧស្សាហកម្មនេះហើយ ដែលបានទាញសេដ្ឋកិច្ចចិន ឲ្យមានកំណើននៅក្នុងត្រីមាសទី១នេះ។
ទោះបីជាបែបនេះក្តី កំណើនសេដ្ឋកិច្ចរបស់ចិនបាននិងកំពុងរងការគម្រាមកំហែង ពីភាពមិនច្បាស់លាស់នៃការរីករាលដាលកូវីដ១៩នៅក្នុងស្រុក។
សេដ្ឋកិច្ចចិនកំពុងស្ថិតក្នុងហានិភ័យជាថ្មីម្តងទៀត ដោយសារតែកូវីដ១៩បានរាតត្បាតនៅក្នុងស្រុក អស់ពេលជាង១មួយខែមកនេះ។ មែនទែនទៅ សម្រាប់ប្រទេសផ្សេងក្រៅពីចិន ការរីករាលនៃកូវីដ១៩ក្នុងស្រុក មិនមែនជាចំណោទបញ្ហាធំឡើយ។ យ៉ាងណាក៏ដោយ សម្រាប់ ទីក្រុងប៉េកាំង គេនៅតែប្រកាន់ខ្ជាប់វិធានការតឹងតែងដដែលចំពោះមុខជំងឺឆ្លងផ្លូវដង្ហើមមួយនេះ។ ទីក្រុងធំៗ និងសំខាន់ៗរបស់ចិនជាច្រើន បាននិងកំពុងតែអនុវត្តវិធានការតឹងរ៉ឹង។ នៅទីក្រុងប៉េកាំង បើទោះមិនមានការបិទខ្ទប់ទាំងស្រុងមែន តែអាជ្ញាធរចិន បានចេញវិធានការ ហាមឃាត់មួយចំនួន មិនឲ្យប្រជាជនធ្វើចរាចរណ៍កុះករពេកទេ។ ដោយឡែក គឺក្រុងសិនចិន និងទីក្រុងសៀងហៃ ដែលជាទីក្រុងសេដ្ឋកិច្ច ដ៏សំខាន់បំផុតរបស់ចិន បានស្ថិតក្រោមការបិទខ្ទប់ទាំងស្រុង អស់ពេលជាច្រើនសប្តាហ៍មកហើយ។
អត្ថបទគួរអាន
គួរកត់សម្គាល់ថា សូម្បីតែរដ្ឋអំណាចប៉េកាំងក៏បានទទួលស្គាល់ខ្លួនឯងដែរថា សេដ្ឋកិច្ចខ្លួនមានឧបសគ្គប្រឈមជាច្រើន។ យ៉ាងណាមិញ ក្នុងឆ្នាំពេញមួយ២០២២នេះ រដ្ឋាភិបាលចិន បានព្យាករណ៍ថា សេដ្ឋកិច្ចអាចថាមានកំណើន ប្រមាណតែ៥,៥%ប៉ុណ្ណោះ។ ពោលការព្យាករណ៍នេះ ជាការព្យាករកំណើនដ៏ទាបបំផុតមិនធ្លាប់មាន បើគិតពីទសវត្សឆ្នាំ៩០មក។
បន្ថែមពីលើនេះសង្គ្រាមក្នុងប្រទេសអ៊ុយក្រែន ដែលបានជំរុញឱ្យមានការកើនឡើងនៃតម្លៃទំនិញត្រូវបាន អ្នកសេដ្ឋកិច្ចបាននិយាយថា នឹងផ្តល់ការរំខានកាន់តែខ្លាំងឡើង ពីលើគោលនយោបាយគ្មានកូវីដរបស់ចិន ហើយនឹងធ្វើឱ្យមានផលលំបាកក្នុងការឈានសម្រេចគោលដៅកំណើនសេដ្ឋកិច្ចប្រចាំឆ្នាំ ៥,៥%នេះ។
មូលនិធិរូបិយវត្ថុអន្តរជាតិ IMF ធ្លាប់បានព្យាករណ៍ថា កំណើនសេដ្ឋកិច្ចរបស់ប្រទេសចិននៅឆ្នាំ២០២២ នឹងថយចុះមកនៅត្រឹម ៤,៩% ដែលជាការធ្លាក់ចុះយ៉ាងខ្លាំងពី ៨.១% កាលពីឆ្នាំមុន៕
None
