ក្រុមហ៊ុន Didi អាចនឹងត្រូវផាកពិន័យជាង ១ ពាន់លានដុល្លារ ដែលស្មើនឹងទំហំ ៤,៧% នៃប្រាក់ចំណូលសរុបរបស់ខ្លួន ដែលទទួលបានជាង ២៧ ពាន់លានដុល្លារកាលពីឆ្នាំមុន។ កាសែត Wall Street Journal បានរាយការណ៍ជាលើកដំបូងអំពីទំហំទឹកប្រាក់ដ៏ច្រើនលើសលុបនៃការផាកពិន័យពីសំណាក់ទីក្រុងប៉េកាំងលើក្រុមហ៊ុន កាលពីថ្ងៃអង្គារ ទី ១៩ ខែកក្កដា។
ការផាកពិន័យរបស់ក្រុមហ៊ុន Didi នឹងក្លាយជាការផាកពិន័យដ៏ធំបំផុតមួយ ដែលត្រូវបានដាក់លើក្រុមហ៊ុនបច្ចេកវិទ្យាយក្សៗរបស់ចិនមួយនេះ ខណៈកន្លងមកនិយ័តករចិន ធ្លាប់បានផាកពិន័យ ក្រុមហ៊ុន Alibaba Group ចំនួនជិត ៣ ពាន់លានដុល្លារ និង ក្រុមហ៊ុនដឹកជញ្ជូនខ្នាតយក្ស Meituan ចំនួន ៥២៧ លានដុល្លា កាលពីឆ្នាំមុន។
ក្នុងនោះ ការផាកពិន័យរបស់ក្រុមហ៊ុន Alibaba ស្មើនឹងប្រហែល ៤% នៃការលក់ក្នុងស្រុករបស់ក្រុមហ៊ុននេះក្នុងឆ្នាំ ២០១៩ ខណៈដែលការផាកពិន័យលើក្រុមហ៊ុន Meituanវិញ គឺស្មើនឹង ៣% នៃការលក់ក្នុងស្រុកឆ្នាំ ២០២០ របស់ខ្លួន។
ក្រុមហ៊ុន Didi គឺជាក្រុមហ៊ុន កក់សេវាធ្វើដំណើរ ដែលត្រូវបានបង្កើតឡើងក្នុងឆ្នាំ ២០១២ ដោយលោក Will Wei Cheng អតីតបុគ្គលិកក្រុមហ៊ុន Alibaba ហើយក្រុមហ៊ុន Didi នេះ ត្រូវបានគាំទ្រការវិនិយោគដ៏សម្បើមដោយក្រុមហ៊ុនយក្ស SoftBank Group និងក្រុមហ៊ុន Uber Technologies។
អត្ថបទគួរអាន
ក្រុមហ៊ុន Didi ធ្លាប់មានផែនការបោះផ្សាយលក់មូលបត្រនៅក្នុងទីក្រុងញ៉ូវយក សហរដ្ឋអាមេរិកកាលពីឆ្នាំ២០២១ ក្នុងតម្លៃដល់ទៅជាង៤ពាន់៤រយលានដុល្លារ ប៉ុន្ដែ ក៏ត្រូវបានបង្ក្រាបដោយនិយ័តករចិន ធ្វើឲ្យការបោះផ្សាយលក់មូលបត្រនេះ មិនអាចធ្វើទៅដោយជោគជ័យនោះឡើយ ហើយតាំងពីពេលនោះមក ក្រុមហ៊ុននេះ បានជួបបញ្ហាជាច្រើននៅក្នុងដំណើរការអាជីវកម្មរបស់ខ្លួន។
គេនៅចាំបានថា នៅប៉ុន្មានថ្ងៃបន្ទាប់ពីក្រុមហ៊ុន Didi បានប្រកាសអំពីផែនការបោះផ្សាយលក់ភាគហ៊ុននោះ ក្រុមអ្នកឃ្លាំមើលសន្តិសុខអ៊ីនធឺណិតរបស់ប្រទេសចិនដ៏មានឥទ្ធិពល បានចាប់ផ្តើមការស៊ើបអង្កេតសុវត្ថិភាពតាមអ៊ីនធឺណិត ចំពោះការអនុវត្តរបស់ក្រុមហ៊ុននេះ។ ក្រោយមក និយ័តករចិន ក៏បានបញ្ជាឱ្យក្រុមហ៊ុន App Store ដកចោលកម្មវិធីចំនួន ២៥ ដែលដំណើរការដោយក្រុមហ៊ុន Didi ផងដែរ៕
