អ្នកជំនាញក្នុងវិស័យដឹកជញ្ជូនយល់ឃើញថា តម្លៃ១២០ដុល្លារសម្រាប់ការប្រើប្រាស់ទៅមកផ្លូវល្បឿនលឿននេះ គឺជាតម្លៃមួយខ្ពស់ណាស់ និងស្នើឲ្យមានការបន្ធូរបន្ថយបន្តិច ដើម្បីឲ្យវិស័យដឹកជញ្ជូនកម្ពុជាកាន់តែមានភាពល្អប្រសើរ និងប្រកួតប្រជែងខ្ពស់។
បើតាមការគូសបញ្ជាក់របស់ឯកឧត្តទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ផ្លូវល្បឿនលឿនភ្នំពេញ-ក្រុងព្រះសីហនុគ្រោងដាក់ឲ្យដំណើរការបណ្តោះអាសន្នចាប់ពីថ្ងៃទី១ ខែតុលា ឆ្នាំ២០២២ ខណៈបច្ចុប្បន្នការសាងសង់សម្រេចបានប្រមាណ៩៥% ហើយ។ សម្រាប់ការដាក់ឲ្យដំណើរការ១ខែដំបូង ប្រជាពលរដ្ឋ និងក្រុមហ៊ុនដឹកជញ្ជូននានាអាចប្រើប្រាស់ផ្លូវនេះដោយឥតគិតថ្លៃ។ ប៉ុន្តែចាប់ពីក្រោយនោះ អ្នកប្រើប្រាស់ផ្លូវល្បឿនលឿននេះត្រូវបង់ថ្លៃសេវាជូនក្រុមហ៊ុនទៅតាមប្រភេទនៃរថយន្តនីមួយៗ ដែលបានកំណត់។ នេះបើតាមការបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល។
ពាក់ព័ន្ធតម្លៃសេវានៃការប្រើប្រាស់ផ្លូវល្បឿនលឿននេះ ថ្នាក់ដឹកនាំក្រសួងសាធារណការ និងដឹកជញ្ចូន បានលើកឡើងថា រថយន្តលក្ខណៈគ្រួសារត្រូវបង់ ២៤ដុល្លារសម្រាប់ការធ្វើដំណើរទៅមកលើផ្លូវនេះ ពោលគឺធ្វើដំណើរទៅបង់១២ដុល្លារនិងត្រឡប់មកវិញបង់១២ដុល្លារ។ ដោយឡែករថយន្តដឹកទំនិញធំៗនិងកុងតឺន័រត្រូវបង់ប្រាក់១២០ដុល្លារសម្រាប់ការប្រើប្រាស់ទៅនិងមក។ បើតាមឯកឧត្តម ស៊ុន ចាន់ថុល នៅឆ្នាំទីពីរក្រុមហ៊ុន នឹងពិនិត្យយកតម្លៃធ្វើដំណើរយោងតាមកិច្ចព្រមព្រៀងសម្បទាន ដែលកម្ពុជាបានចុះហត្ថលេខាជាមួយក្រុមហ៊ុនសាងសង់។
ជុំវិញថ្លៃសេវាសម្រាប់រថយន្តដឹកទំនិញធំៗនិងកុងតឺន័រលោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាយល់ឃើញថា ចំពោះការបង់ថ្លៃសេវា១២០ដុល្លារលើការប្រើប្រាស់ផ្លូវល្បឿនលឿនទៅនិងមក វាជាតម្លៃមួយខ្ពស់ ដែលស្ថិតក្នុងការពិចារណារបស់ក្រុមហ៊ុនរកស៊ីក្នុងវិស័យដឹកជញ្ជូនសម្រាប់ការប្រើប្រាស់ផ្លូវនេះ។ ឧកញ៉ា ស៊ិន ចន្ធី បន្ថែមថា ប្រសិនបើតម្លៃសេវាទាបជាងនេះទើបការជាការល្អ និងបានជួយដល់វិស័យឡូជីស្ទីកកម្ពុជា ដែលបាននិងកំពុងរងផលប៉ះពាល់ដោយសារវិបត្តិកូវីដ-១៩ និងការកើនឡើងតម្លៃប្រេងឥន្ធនៈ។
អត្ថបទគួរអាន
ជាមួយគ្នានេះលោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជាបានគូសបញ្ជាក់ថា លោកមិនហ៊ានវាយតម្លៃទេថា តម្លៃសេវា១២០ដុល្លារលើការប្រើប្រាស់ផ្លូវល្បឿនលឿនសម្រាប់រថយន្តដឹកទំនិញធន់ធំ និងកុងតឺន័រមានតម្លៃថ្លៃ ឬថោកនោះទេ។ សម្រាប់លោកតម្លៃសេវាថ្លៃ ឬថោកវានឹងត្រូវបកស្រាយតាមរយៈចំនួនរថយន្តដែលប្រើប្រាស់ផ្លូវនេះមានចំនួនតិច ឬច្រើន។ ទោះយ៉ាងណាលោកយល់ថា ផ្លូវល្បឿនលឿនវានឹងដើរតួនាទីយ៉ាងសំខាន់ក្នុងការជួយសម្រួលដល់ដឹកជញ្ជូនទំនិញ និងកាត់បន្ថយការកកស្ទះចរាចរណ៍។
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល ក្រសួងសាធារណការ និងដឹកជញ្ជូននឹងបង្កើតវីដេអូអប់រំពន្យល់ពីរបៀបប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុដល់ប្រជាពលរដ្ឋ ដើម្បីពួកគេមានការយល់ដឹងបន្ថែម មុនផ្លូវនេះត្រូវបានដាក់ប្រើប្រាស់ជាបណ្តោះអាសន្ននៅដើមខែតុលា ខាងមុខ។ កន្លងមកក្រសួងសាធារណការបានអនុញ្ញាតឲ្យប្រជាពលរដ្ឋប្រើប្រាស់សាកល្បងលើផ្លូវនេះម្តងរួចមកហើយ ប៉ុន្តែកាលពីពេលថ្មីៗក្រសួងបានហាមឃាត់រថយន្តគ្រប់ធ្វើចរាចរណ៍លើផ្លូវនេះវិញ បន្ទាប់ពីសង្កេតមានគ្រោះថ្នាក់ចរាចរណ៍បានកើតឡើងជាបន្តបន្ទាប់ក្នុងអំឡុងបើកឲ្យធ្វើដំណើរសាកល្បងនេះ។
គួររំលឹកថា ផ្លូវល្បឿនលឿនភ្នំពេញ-ក្រុងព្រះសីហនុបានបើកការដ្ឋានសាងសង់កាលពីថ្ងៃទី២២ មីនា ឆ្នាំ២០១៩ ក្រោមការអនុវត្តការងារសាងសង់ដោយក្រុមហ៊ុន Cambodian PPSHV Expressway Co., Ltd ដែលជាក្រុមហ៊ុនវិនិយោគបុត្រសម្ព័ន្ធនៃក្រុមហ៊ុនសាជីវកម្មស្ពានថ្នល់ចិន CRBC និងត្រួតពិនិត្យបច្ចេកទេសដោយក្រុមហ៊ុន Minconsult SDN. BHD។ ផ្លូវដែលឆ្លងកាត់រាជធានីភ្នំពេញ ខេត្តកណ្តាល កំពង់ស្ពឺ កោះកុង និងព្រះសីហនុនេះមានចម្ងាយជាង១៩០គីឡូម៉ែត្រ ដោយគ្រោងចំណាយថវិកាប្រមាណ២ពាន់លានដុល្លារអាមេរិក៕
