អង្គការឃ្លាំមើលសិទិ្ធមនុស្ស បាននិយាយក្នុងសេចក្តីថ្លែងការណ៍ ចុះថ្ងៃទី៦ ខែមេសា ឆ្នាំ២០២០នេះ ថា អាជ្ញាធរគួរតែដោះលែងជាបន្ទាន់នូវអ្នកទោសដែលត្រូវបានឃុំខ្លួនបណ្តោះអាសន្នពីបទល្មើសតូចតាច និងអ្នកទោសនយោបាយ។
អង្គការឃ្លាំមើលសិទិ្ធមនុស្ស បានបន្តថា អាជ្ញាធរក៏គួរតែពិចារណាលើជម្រើសផ្សេងដើម្បីឃុំខ្លួន សម្រាប់អ្នកជាប់ឃុំដែលមានបញ្ហាសុខភាព អ្នកទោសចាស់ និងស្ត្រីដែលមានផ្ទៃពោះ ឬក៏អ្នកជាប់ពន្ធនាគារដែលមានកុមារតូចៗផងដែរ។
លោក Phil Robertson នាយករងអង្គការឃ្លាំមើលសិទិ្ធមនុស្សប្រចាំនៅអាស៊ី បាននិយាយថា “ប្រទេសកម្ពុជាគួរតែដោះលែងអ្នកទោសដែលមានហានិភ័យខ្ពស់ ប្រសិនបើមានការឆ្លង ក៏ដូចជាអ្នកដែលត្រូវបានឃុំខ្លួនពីបទល្មើសតូចតាច និងចាត់វិធានការបន្ទាន់ដើម្បីធានាថា អ្នកទោសទទួលបានការថែទាំសុខភាពគ្រប់គ្រាន់។”
អត្ថបទទាក់ទង
អង្គការឃ្លាំមើលសិទិ្ធមនុស្សបាននិយាយថា ដើម្បីកាត់បន្ថយហានិភ័យនៃការឆ្លងនៅក្នុងពន្ធនាគារ អាជ្ញាធរគួរតែតាមដានជាប្រចាំនូវរាល់រោគសញ្ញា ធ្វើតេស្តភ្លាមៗចំពោះអ្នកដែលមានជំងឺ ដាក់ឲ្យនៅដាច់ដោយឡែកនូវអ្នកមានតេស្តវិជ្ជមាន និងដាក់ដាច់ដោយឡែកអ្នកជាប់ឃុំឃាំងដែលមានទំនាក់ទំនងជិតស្និទ្ធជាមួយអ្នកដែលត្រូវបានគេរកឃើញថា មានជំងឺកូវីដ១៩។
គិតត្រឹមខែមករាឆ្នាំ២០២០នេះ ពន្ធនាគារមានអ្នកឃុំខ្លួនចំនួន ២៣៧៤៨ នាក់ ក្នុងនោះមានស្ត្រី ១៦១៤ នាក់ ដោយ ៤៣នាក់កំពុងមានផ្ទៃពោះ។ ពន្ធនាគារទាំងនោះក៏មានអ្នកជាប់ឃុំដែលមានកុមារចំនួន១០៣នាក់ ដែលជាប់នៅជាមួយម្តាយ និងមានកុមារចំនួន ៥៤២នាក់ ផ្សេងទៀត។
ក្នុងចំណោមទណ្ឌិតចំនួន ៨៨៥៥នាក់ ដែលត្រូវបានផ្តន្ទាទោស មានចំនួន៦១៩នាក់ ជាស្ត្រី ៤នាក់ជាក្មេងស្រី និង ១៥៦នាក់ ជាក្មេងប្រុស។ នេះបើយោងតាមអង្គការឃ្លាំមើលសិទិ្ធមនុស្ស។
លោកចាន់ គឹមសេង អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃបាននិយាយនៅថ្ងៃទី៧ ខែមេសា ឆ្នាំ២០២០នេះ ថាមិនមានច្បាប់ណាមួយចែងអំពី ការដោះលែងអ្នកជាប់ឃុំណាម្នាក់ ទាក់ទងនឹងជំងឺអ្វីមួយនោះ ហើយក៏មិនមែនជាដែនសមត្ថកិច្ចរបស់លោកដែរ ក៏ប៉ុន្តែលោកក៏មានការព្រួយបារម្ភពីការរីករាលដាលជំងឺកូវីដ១៩ដូចគ្នា។
លោក ចាន់ គឹមសេង ជាមួយនឹងសំណើច បាននិយាយដូច្នេះថា “ខាងខ្ញុំជាមន្រ្តីអនុវត្តន៍ច្បាប់ កាលណាមានដីកា មានសាលក្រមពីតុលាការ យើងអនុវត្តតាមខាងហ្នុងតើ យើងអត់មានថាចង់អ៊ីចេះ ចង់អ៊ីចុះកើត។ ខ្ញុំនិយាយអ៊ីចេះ អាចយល់ហើយ។”
លោក ចាន់ គឹមសេង បាននិយាយបន្តថា “ជាទឹកចិត្តមនុស្សធម៌ យើងចេះតែមានទឹកចិត្តដែរ ប៉ុន្តែ ត្រូវច្បាប់អនុញ្ញាត។”
លោក ចាន់ គឹមសេង បានអះអាងផងដែរថា ខាងពន្ធនាគារបានត្រៀមខ្លួនរួចហើយ ជាមួយនឹងជំងឺកូវីដ១៩ រួមមានទទួលបានការហ្វឹកហ្វឺនពីនាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាលកម្ពុជា។
លោកចាន់ គឹមសេង បាននិយាយដូច្នេះថា “អាហ្នឹងព្រួយ វាព្រួយហើយ ប៉ុន្តែ យើងបានចាត់វិធានការតាំងពីដើមទីមកហើយ។ យើងសហការជាមួយ ICRC សហការជាមួយការិយាល័យឧត្តមស្នងការ ជាមួយនឹងការីតាស ជាមួយអី ចែកអាល់កុល ចែក Gel សាប៊ូ ខ្ល ឧបករណ៍វាស់កម្ដៅពីចំងាយ៕”
