តើសុខភាពក្នុងវិស័យសំណង់និងអចលនទ្រព្យនៅកម្ពុជា មានស្ថានភាពបែបណានៅពេលនេះ?

លោក សុខ ឡៃ អ្នកគ្រប់គ្រងទូទៅរបស់ក្រុមហ៊ុនពិស្ណុការ ដែលជាក្រុមហ៊ុនម៉ៅការសំណង់ដ៏ធំមួយនៅកម្ពុជា សង្កេតឃើញថា វិស័យសំណង់បច្ចុប្បន្ននៅមានសកម្មភាពទៅតាមផ្នែក និងពុំទាន់មានសកម្មភាព​ខ្លាំងដូចមុនពេលមានវិបត្តិកូវីដ-១៩ និងវិបត្តិសេដ្ឋកិច្ចសកលនៅឡើយទេ។ ប៉ុន្តែលោកគូសបញ្ជាក់ថា ការសាងសង់នៅតែមានសម្រាប់គម្រោងចាស់ និងគម្រោងដែលមានជំនួយហិរញ្ញវត្ថុពីខាងក្រៅដែលមានស្រាប់ ខណៈគម្រោងវិនិយោគរបស់វិស័យឯកជនហាក់ពុំទាន់មានការប្រែប្រួលខ្លាំងនៅឡើយទេ។

បើតាមអ្នកជំនាញរូបនេះ ការកើនឡើងទំហំទឹកប្រាក់នៃការនាំចូលសម្ភារគ្រឿងសំណង់ ពុំទាន់បង្ហាញសញ្ញាឱ្យឃើញពីការស្ទុះឡើងក្នុងវិស័យអចលនទ្រព្យ ឬវិស័យសំណង់លំនៅឋាននៅឡើយទេ ប៉ុន្តែការកើនឡើងនេះ អាចជាសញ្ញាល្អពាក់ព័ន្ធនឹងការវិនិយោគលើផ្នែកឧស្សាហកម្ម។ ទោះបីទំហំនាំចូលសម្ភារគ្រឿងសំណង់នៅក្នុងរយៈពេល៣ខែមកនេះ មានការកើនឡើងក៏ដោយ តែលោក សុខ ឡៃ កត់សម្គាល់ថា តម្លៃគ្រឿងសំណង់ពុំមានការប្រែប្រួលគួរឱ្យកត់សម្គាល់នោះទេ ពោលគឺស្ថិតក្នុងកម្រិតថេរនៅឡើយ ហើយអាចជាសញ្ញាចាប់ផ្ដើមពីភាពប្រសើរឡើងជាងឆ្នាំកន្លងទៅ។

​ជាមួយគ្នានេះ លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា កត់សម្គាល់ឃើញថា មកទល់ពេលនេះ វិស័យសំណង់នៅកម្ពុជាពុំទាន់មានកំណើនគួរឱ្យកត់សម្គាល់នៅឡើយទេ។ បើតាមអ្នកជំនាញរូបនេះ ការកើនឡើងទឹកប្រាក់នៃការនាំចូលសម្ភារសំណង់ វាក៏បានបង្ហាញសញ្ញាវិជ្ជមានមួយសម្រាប់វិស័យសំណង់របស់កម្ពុជា ផងដែរ។

​បើតាមរបាយការណ៍របស់ក្រសួងពាណិជ្ជកម្ម នៅត្រីមាសទី១ ឆ្នាំ២០២៤ កម្ពុជាបាននាំចូលដែក និងដែកថែប ក្នុងទំហំទឹកប្រាក់សរុបជាង១៦៦លានដុល្លារ មានការកើន៤៦លានដុល្លារ ឬស្មើនឹងជាង៣៨% ខណៈការនាំចូលស៊ីម៉ងត៍ មានទំហំទឹកប្រាក់សរុបជាង៥លានដុល្លារ មានការកើនជិត១លានដុល្លារ ឬស្មើនឹង១៥% បើធៀបនឹងរយៈពេលដូចគ្នា កាលពីឆ្នាំ២០២៣៕

អត្ថបទ៖ បូ ដូឡា,រូបភាពឯកសារ