វិស័យសំណង់ និងអចលនទ្រព្យ ជាជន្ទល់សេដ្ឋកិច្ចរឹងមាំ ជួយឲ្យកំណើនសេដ្ឋកិច្ចកម្ពុជាធ្លាក់ចុះយឺត នៅឆ្នាំ២០២០

ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា វិបត្តិបង្កឡើងដោយកូវីដ-១៩ នៅឆ្នាំ២០២០ កំណើនសេដ្ឋកិច្ចកម្ពុជាមានការធ្លាក់ចុះ-៣,៤%។ ឯកឧត្តម បន្ថែមថា បើកុំតែកម្ពុជា មានមូលដ្ឋានសេដ្ឋកិច្ចរឹងមាំ គួបផ្សំនឹងការគ្រប់គ្រងមេរោគឆ្លងបានល្អ ម្ល៉េះកំណើនសេដ្ឋកិច្ចកម្ពុជាអាចនឹងធ្លាក់ចុះខ្លាំងជាងនេះទៅទៀត។ ក្នុងនោះដែរ វិស័យសំណង់ និងអចលនទ្រព្យក៏ បានចូលរួមចំណែកជាជន្ទល់សេដ្ឋកិច្ចមួយរឹងមាំ ក្នុងការទប់សេដ្ឋកិច្ចកុំឲ្យធ្លាក់ចុះលឿន នៅក្នុងអំឡុងវិបត្តិកូវីដ-១៩នេះផងដែរ។

តាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា នៅឆ្នាំ២០២០ វិស័យសំណង់ត្រូវបានប៉ាន់ស្មានថា នឹងមានកំណើនអវិជ្ជមាន -២,៤% ខណៈដែលកាលពីឆ្នាំ២០១៩ មានកំណើនដល់ទៅជាង២០% ។ ការធ្លាក់ចុះនៃវិស័យសំណង់ ត្រូវបានឆ្លុះបញ្ចាំងតាមរយៈការធ្លាក់ចុះនៃកំណើនលំហូរទុនវិនិយោគពីបរទេស ដែលមានជាង -១២% ខណៈដែលកំណើននៃការនាំចូលសម្ភារសំណង់សរុបក៏មានការធ្លាក់ចុះជាង-១៨%ផងដែរ។ទោះយ៉ាងណា វិស័យសំណង់ត្រូវបានព្យាករថា នឹងកើនឡើងវិញប្រមាណ៣%នៅឆ្នាំ២០២១។

ដោយឡែក វិស័យអចលនទ្រព្យវិញ នៅឆ្នាំ២០២០ ត្រូវក្រសួងសេដ្ឋកិច្ចប៉ាន់ស្មានថាមានកំណើនធ្លាក់ចុះ -៤,៩% ប៉ុន្ដែនឹងកើនដល់វិញ ២,៧%នៅឆ្នាំ២០២១៕

សូមទស្សនាសេចក្តីរាយការណ៍ដូចខាងក្រោម៖