ទុនវិនិយោគក្នុងវិស័យសំណង់រអិលធ្លាក់ចុះ ខណៈការទិញលក់ដីធ្លីនៅតែមមាញឹក

បើទោះបីជាការចាក់បញ្ចូលទុនវិនិយោគក្នុងវិស័យសំណង់នៅក្នុងរយៈពេលបីត្រីមាសឆ្នាំនេះ មានការរអិលដាំដូងចុះយ៉ាងណាក៏ដោយ ក៏សកម្មភាពទិញលក់ ដោះដូរដីធ្លីផ្ទះសម្បែងមិនស្ងប់ស្ងាត់ឡើយ ពោលគឺនៅតែមានសកម្មភាពមមាញឹកដដែល។

សំណង់អគារខ្ពស់នៅរាជធានីភ្នំពេញ

បើផ្អែកទៅលើរបាយការណ៍វិនិយោគវិស័យសំណង់នៅក្នុងរយៈពេល ៩ខែ ដើមឆ្នាំ២០១៨នេះ បានបង្ហាញឲ្យឃើញថា ទុនវិនិយោគក្នុងវិស័យសំណង់ ដែលទទួលបានលិខិតអនុញ្ញាត មានប្រមាណជិត ៥ពាន់លានដុល្លារអាមេរិក រអិលធ្លាក់ចុះ ១៤% បើធៀបទៅនឹងរយៈពេលដូចគ្នាកាលពីឆ្នាំមុន។

ទោះបីជាមានការធ្លាក់ចុះបែបនេះក្តី ក៏ក្រុមអ្នកជំនាញអចលនទ្រព្យ មិនមានការព្រួយបារម្ភសោះឡើយ ដោយពួកគេនៅតែអះអាងថា ការទិញលក់អចលនទ្រព្យនៅតែមានសកម្មភាពមមាញឹកដដែល។

លោកឧកញ៉ា ចេង ខេង ប្រធានក្រុមប្រឹក្សាភិបាល សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុន អចលនទ្រព្យ ស៊ី ភី អិល បានលើកឡើងថា តួលេខគ្រាន់តែជាទិន្នន័យនៅលើក្រដាសមួយតែប៉ុណ្ណោះ ប៉ុន្តែអ្វីដែលជាក់ស្តែង ការវិនិយោគលើសំណង់នានា គឺកើនឡើងយ៉ាងគំហុក បានន័យថា កើនឡើងជាងឆ្នាំមុនៗ គម្រោងជាច្រើនកំពុងតែបន្តសាងសង់ និងត្រូវការពេលវេលា ៣ ទៅ ៤ឆ្នាំ ដើម្បីបញ្ចប់ការសាងសង់ រីឯការទិញលក់វិញ គឺគ្មានការព្រួយបារម្ភឡើយ។

លោកឧកញ៉ា ចេង ខេង ប្រធានក្រុមប្រឹក្សាភិបាលនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុន ស៊ីភីអិល

លោកឧកញ៉ា ចេង ខេង បន្តថា នៅក្នុងរយៈពេល ១០ខែដំបូងដើមឆ្នាំ២០១៨នេះ តម្លៃអចលនទ្រព្យគឺល្អ គ្មានការធ្លាក់ចុះនោះទេ ជាពិសេស ក្នុងខែសីហា និងខែកញ្ញាកន្លងទៅនេះ ការទិញលក់អចលនទ្រព្យរបស់ក្រុមហ៊ុន ស៊ីភីអិល មានការកើនឡើងរហូតដល់ជាង ៧ពាន់ប្រតិបត្តិការ ក្នុងមួយខែ។ ជាមួយនឹងការកើនឡើងខ្លាំងបែបនេះហើយ ទើបធ្វើឲ្យក្រុមហ៊ុន ស៊ីភីអិល បានសម្រេចចិត្តបង្កើតគម្រោងភ្នាក់ងារសហប្រតិបត្តិការនៅទូទាំងខណ្ឌទាំងអស់ក្នុងរាជធានីភ្នំពេញ។

នៅក្នុងសិក្ខាសាលាពិសេសមួយស្តីពីឱកាសសហការបង្កើតប្រាក់ចំណូលបន្ថែមពីកម្រៃជើងសារនិងការវិនិយោគ កាលពីពេលថ្មីៗនេះ ឧកញ៉ា ចេង ខេង បានថ្លែងថា ក្រុមហ៊ុនស៊ីភីអិល បានបង្កើតកម្មវិធីគម្រោងសហប្រតិបត្តិការភាពជាដៃគូ CAPP (CPL Agent Partnership Program) ដែលផ្តល់ឱកាសឲ្យសាធារណជន អាចក្លាយជាដៃគូសហការជាមួយក្រុមហ៊ុនដោយផ្ទាល់ នឹងទទួលបានការបណ្តុះបណ្តាល បច្ចេកវិទ្យា ប្រេន និង វិធីសាស្រ្ត ក្នុងការប្រកបរបរក្នុងវិស័យអចលនទ្រព្យប្រកបដោយភាពជោគជ័យ។

យោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានប្រកាសឲ្យដឹងថា រយៈពេល ៩ខែ ដើមឆ្នាំ២០១៨នេះ ក្រសួងបានផ្តល់លិខិតអនុញ្ញាតសាងសង់ចំនួនជាង ២៥០០គម្រោង មានផ្ទៃក្រឡាសាងសង់សរុបជាង ១០លានម៉ែត្រការ៉េ ដែលមានតម្លៃប៉ាន់ស្មាន ៤៨០០លានដុល្លារអាមេរិក ពោលគឺធ្លាក់ចុះ ១៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។

សូមជម្រាបដែរថា វិស័យសំណង់នៅកម្ពុជានៅតែជាវិស័យសំខាន់មួយក្នុងការចូលរួមអភិវឌ្ឍន៍សេដ្ឋកិច្ចជាតិ បន្ទាប់ពីវិស័យឧស្សាហកម្ម កសិកម្ម និងទេសចរណ៍ ហើយបច្ចុប្បន្ន បានផ្តល់ការងារដល់អ្នកជំនាញ និងកម្មករប្រមាណ២២ម៉ឺននាក់ ក្នុងមួយថ្ងៃ ដែលធ្វើការតាមការដ្ឋានសំណង់ទូទាំងប្រទេស៕

None