អ្វីទៅជា សាជីវកម្មកម្មធានាឥណទាន?
សាជីវកម្មធានាឥណទាន គឺជាយន្តការឆ្លើយតបបន្ទាន់របស់រាជរដ្ឋាភិបាល ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ ក្នុងដំណាក់កាលនៃវិបត្តិ ជំងឺកូវីដ-១៩ និងស្តារ និងជំរុញកំណើនសេដ្ឋកិច្ចកម្ពុជាក្រោយពីវិបត្តិ។ សាជីវកម្មធានាឥណទានកម្ពុជា មានតួនាទី ផ្តល់សេវាធានាឥណទាន ដល់ក្រុមហ៊ុនអាជីវកម្ម-ធុរកិច្ច នៅក្នុងវិស័យអាទិភាព ដែលទទួលរងផលប៉ះពាល់ធ្ងន់ធ្ងរពីវិបត្តិជំងឺកូវីដ-១៩ ដើម្បីបង្កើនលទ្ធភាពទទួលបានហិរញ្ញប្បទាន សម្រាប់ជាទុនបង្វិលរបស់ក្រុមហ៊ុនទាំងនោះ សំដៅ ធានាបាននិរន្តរភាពអាជីវកម្ម និងសម្របទៅតាមបរិបទថ្មីនៃធុរកិច្ចបន្ទាប់ពីវិបត្តិជំងឺកូវីដ-១៩។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានបញ្ជាក់ថា សាជីវកម្មធានាឥណទាន ដែលជាយន្តការបន្ទាន់មួយរបស់រដ្ឋាភិបាលនេះ នឹងត្រូវដាក់ឲ្យអនុវត្តនៅចុងខែមីនានេះហើយ ក្រោយរៀបចំ និងដំណើរការនីតិវិធីអស់រយៈពេលប្រមាណ១ឆ្នាំកន្លងមកនេះ។ គោលបំណងនៃការបង្កើតយន្តការនេះ គឺដើម្បីជួយស្តារសេដ្ឋកិច្ចកម្ពុជា ដែលរងផលប៉ះពាល់ដោយសារការរាតត្បាតនៃជំងឺកូវីដ-១៩។
អត្ថបទទាក់ទង!
លោកបណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា បានវាយតម្លៃខ្ពស់ចំពោះយន្តការសាជីវកម្មធានាឥណទាន ក្នុងការជំរុញកំណើនការផ្តល់ឥណទានរបស់មីក្រូហិរញ្ញវត្ថុ និងធនាគារនៅកម្ពុជា។ ជាពិសេស វានឹងជួយឲ្យគ្រឹះស្ថានមីក្រូហិរញ្ញវត្ថុ និងធនាគារមានលទ្ធភាពកាន់តែច្រើនក្នុងការផ្តល់ប្រាក់កម្ចីដល់អតិថិជនរបស់ខ្លួន។
សម្រាប់លោកបណ្ឌិត អុិន ចាន់នី សាជីវកម្មធានាឥណទាននេះ មិនត្រឹមតែជួយបង្កើនលទ្ធភាពសម្រាប់គ្រឹះស្ថានមីក្រូហិរញ្ញវត្ថុ និងធនាគារក្នុងការផ្ដល់ប្រាក់កម្ចីប៉ុណ្ណោះទេ តែវានឹងជួយបំពេញចំណុចខ្វះខាតពាក់ព័ន្ធនឹងទ្រព្យធានារបស់ម្ចាស់អាជីវកម្ម សហគ្រាសធុនតូច និងមធ្យម ឲ្យមានលទ្ធភាពកាន់តែខ្ពស់ក្នុងការទទួលបានប្រាក់កម្ចី សម្រាប់ពង្រីកអាជីវកម្មរបស់ខ្លួន។ លើសពីនេះ វានឹងជួយផ្តល់ដើមទុនបន្ថែម ដើម្បីដំណើរការ និងរក្សានិរន្តរភាពអាជីវកម្ម ក៏ដូចជាបង្កើតមុខរបរថ្មីបន្ថែមទៀត ក្នុងអំឡុងពេល ដែលពួកគេកំពុងរងផលប៉ះពាល់ដោយសារការរាតត្បាតនៃជំងឺកូវីដ-១៩។
ជុំវិញនឹងគម្រោងដាក់ឲ្យដំណើរការសាជីវកម្មធានាឥណទាននេះដែរ លោក ផល វ៉ាន់ឌី នាយកប្រតិបត្តិសមាគមមីក្រូហិរញ្ញវត្ថុកម្ពុជា បានលើកឡើងដែរថា វាគឺយន្ដការចាំបាច់មួយ សម្រាប់ជួយដល់វិស័យមីក្រូហិរញ្ញវត្ថុ ដើម្បីឲ្យគ្រឹះស្ថានមីក្រូហិរញ្ញវត្ថុ ក៏ដូចជាធនាគារអាចមានលទ្ធភាពកាន់តែច្រើនក្នុងការផ្ដល់កម្ចីទៅដល់សហគ្រាសខ្នាតតូច និងមធ្យម ហើយវាក៏ជាកត្តាយុទ្ធសាស្ត្រមួយជួយជំរុញដល់ការស្ដារសេកិច្ចកម្ពុជាឲ្យស្ទុះងើបឡើងវិញផងដែរ។
សូមបញ្ជក់ថា សាជីវកម្មធានាឥណទានរបស់រាជរដ្ឋាភិបាលមិនផ្តល់ប្រាក់កម្ចីឲ្យអតិជនដោយផ្ទាល់នោះទេ។ ប៉ុន្តែ វាជាយន្តការមួយសម្រាប់ជួយសម្របសម្រួលក្នុងការផ្តល់ និងទទួលបានកម្ចី រវាងប្រជាពលរដ្ឋជាមួយធនាគារ និងគ្រឹះស្ថានមីក្រូហិរញ្ញវត្ថុឯកជន។ ដើម្បីរួមចំណែកជួយស្តារវិស័យសេដ្ឋកិច្ច មីក្រូហិរញ្ញវត្ថុ និងម្ចាស់អាជីវកម្ម ដែលមានផលប៉ះពាល់ដោយសារការរាតត្បាតនៃជំងឺកូវីដ-១៩៕
None
