យ៉ាងណាក៏ដោយចុះ សម្រាប់ទីផ្សារក្រពើនៅឆ្នាំនេះ មានការធ្លាក់ចុះខ្លាំងស្ទើរតែមិនធ្លាប់មាន ក្នុងរយៈពេលជិត៣ទសវត្សរ៍កន្លងមកនេះ ពោលគឺកូនក្រពើមួយក្បាលមានតម្លៃមិនដល់១០ដុល្លារផង ខណៈដែលឆ្នាំមុនៗមានតម្លៃជាមធ្យមជាង ១០ដុល្លារឡើងទៅ ឬជិត៣០ដុល្លារក៏មាន។
លោក កាំង សារិន ម្ចាស់កសិដ្ឋាន Cambo Crocodile Farm ដែលជាកសិដ្ឋានចិញ្ចឹមក្រពើដ៏ធំនិងមានអាយុកាលយូរជាងគេបង្អស់ នៅសង្កាត់ព្រែកកំពឹស ខណ្ឌដង្កោ រាជធានីភ្នំពេញ បានប្រាប់ ខេមបូណូមីស ថា លោកបានចាប់យកមុខរបរនេះអស់រយៈពេលជិត៣០ឆ្នាំមកហើយ ពោលគឺតាំងពីឆ្នាំ១៩៨៩មកម្ល៉េះ ដែលកាលណោះ លោកបានទិញមេក្រពើពូជពីខេត្តសៀមរាប និងកំពង់ធំ មកចិញ្ចឹមប្រមាណ១០ ទៅ ២០ក្បាលប៉ុណ្ណោះ ដែលមេក្រពើពូជមួយក្បាលមានតម្លៃរហូតដល់១៥តម្លឹងមាស ខណៈបច្ចុប្បន្ន តម្លៃមេក្រពើពូជមួយក្បាលមានតម្លៃតែ ៦០០ ទៅ ៧០០ដុល្លារប៉ុណ្ណោះ។
អត្ថបទគួរអាន !!!
គិតរហូតមកទល់ពេលនេះ កសិដ្ឋានរបស់លោកបានពង្រីកខ្លួនកាន់តែធំឡើងៗ ពោលគឺកំពុងចិញ្ចឹមក្រពើប្រមាណ១៥០០ក្បាល លើផ្ទៃដីជាង១ហិកតា។ ក្នុងនោះ ការចិញ្ចឹមរបស់លោកគឺចិញ្ចឹមភ្ញាស់កូនក្រពើលក់ប៉ុណ្ណោះ មិនមានចិញ្ចឹមយកស្បែកនោះឡើយ ដោយសារតែលោកមិនមានដើមទុន និងបច្ចេកទេសគ្រប់គ្រាន់ដើម្បីកែច្នៃយកស្បែកលក់ ខណៈដែលការចិញ្ចឹមយកស្បែកក៏ត្រូវចំណាយពេលយូររហូតដល់៣ ទៅ ៥ឆ្នាំឯណោះ។
យ៉ាងណាក៏ដោយ ការចិញ្ចឹមក្រពើយកកូនរបស់ម្ចាស់កសិដ្ឋានវ័យចំណាស់រូបនេះ មិនសូវជាទទួលបានលទ្ធផលល្អឡើយនៅឆ្នាំនេះ ពោលគឺទិន្នផលបានតិចហើយ តម្លៃទីផ្សារថោកទៀត។ តួយ៉ាង តម្លៃកូនក្រពើបានធ្លាក់ចុះយ៉ាងខ្លាំងស្ទើរតែមិនធ្លាប់មានសោះក្នុងរយៈពេល៣០ឆ្នាំមកនេះ ពោលគឺកូនក្រពើមួយក្បាលបច្ចុប្បន្នអាចលក់បានតែ៩ដុល្លារ ទៅ ៩,៥ដុល្លារប៉ុណ្ណោះ ខណៈដែលកាលពីដើមដៃ (ការប្រមូលផលលើកដំបូងនៃឆ្នាំនេះ) កូនក្រពើមួយក្បាលអាចលក់បានក្នុងតម្លៃ១៥ដុល្លារដែរ។
ម្ចាស់កសិដ្ឋានរូបនេះ បានគូសបញ្ជាក់ថា តាំងពីលោកចិញ្ចឹមក្រពើជិត៣០ឆ្នាំមកនេះ នេះគឺជាលើកទី២ហើយដែលតម្លៃកូនក្រពើលើទីផ្សារបានធ្លាក់ចុះមកនៅក្រោម១០ដុល្លារក្នុងមួយក្បាល ខណៈដែលកាលពីលើកមុននោះ (ល្បាក់ឆ្នាំ១៩៩០) គឺធ្លាក់ចុះមកនៅតម្លៃប្រហាក់ប្រហែលនេះដែរ។
អ្នកចិញ្ចឹមក្រពើត្អូញត្អែរពីតម្លៃកូនក្រពើធ្លាក់ចុះខ្លាំង។
(រូបភាព៖ ហេង ភារម្យ)
លោកបន្តថា តម្លៃកូនក្រពើបានបន្តធ្លាក់ចុះក្នុងរយៈពេល៣ឆ្នាំចុងជាប់ៗគ្នា ពោលគឺ កាលពីដើមដៃឆ្នាំ២០១៥ កូនក្រពើមួយក្បាលអាចលក់បាន២២ដុល្លារ និងចុងដៃអាចលក់បាន ២៧ដុល្លារ។ រីឯដើមដៃឆ្នាំ២០១៦ កូនក្រពើមួយក្បាលអាចលក់បាន១៧ដុល្លារ ទៅ ២០ដុល្លារ និងចុងដៃអាចលក់បាន ១២,៥ដុល្លារ។
ដោយឡែក នៅដើមដៃឆ្នាំ២០១៧នេះ អាចលក់បានតែ១៥ដុល្លារនៃកូនក្រពើមួយក្បាល ខណៈដែលមកទល់ពេលនេះ លក់បានក្នុងតម្លៃទាបបំផុត គឺ ៩ដុល្លារ ទៅ ៩,៥ដុល្លារ។
បើតាមប្រសាសន៍របស់លោក កាំង សារិន ការធ្លាក់ចុះនៃកូនក្រពើនៅឆ្នាំនេះ គឺដោយសារតែកាលពីមុនទីផ្សារក្រពើ គឺពឹងផ្អែកលើឈ្មួញពីប្រទេសថៃនិងវៀតណាម តែរហូតមកទល់ពេលនេះ ថៃហាក់មិនសូវបញ្ជាទិញកូនក្រពើពីកម្ពុជាច្រើននោះទេ ដូច្នេះទីផ្សារក្រពើធំបំផុត គឺត្រូវពឹងលើវៀតណាមតែម្ខាង ដូច្នេះហើយទើបឈ្មួញកណ្ដាលបានឱកាសទាញទម្លាក់តម្លៃទីផ្សារ។
អ្នកចិញ្ចឹមក្រពើអំពាវនាវឲ្យរដ្ឋាភិបាលជួយរកទីផ្សារសម្រាប់ការលក់កូនក្រពើ។
(រូបភាព៖ ហេង ភារម្យ)
ដោយឡែក សម្រាប់ទីផ្សារទៅប្រទេសចិនវិញគឺលោកមិនសូវជាមាននាំចេញទៅច្រើននោះទេ ដោយសារតែប្រទេសចិនភាគច្រើនទិញយកតែក្រពើដែលចិញ្ចឹម៣ឆ្នាំឡើង ដែលមានប្រវែង ១,៥ម៉ែត្រ ទៅ ១,៨ម៉ែត្រប៉ុណ្ណោះ ដែលជាប្រភេទក្រពើសម្រាប់យកស្បែក។
ទោះជាយ៉ាងនេះក្ដី លោកថាសម្រាប់អ្នកមានចិញ្ចឹមក្រពើច្រើនក្បាល និងយូរឆ្នាំ អាចនឹងនៅទប់ទល់នឹងការធ្លាក់ចុះនៃតម្លៃទីផ្សារនេះបាន ប៉ុន្ដែ សម្រាប់អ្នកចិញ្ចឹមតិចតួច ឬចិញ្ចឹមថ្មីថ្មោង អាចនឹងប្រឈមមុខនឹងការខាតបង់ច្រើនដែរ។
លោកបានលើកឡើងយ៉ាងដូច្នេះថា «កាលពីមុន ពេលចិញ្ចឹមក្រពើលក់បានលុយ យកទៅទិញដី តែដល់ពេលដែលក្រពើចុះថោក ត្រូវលក់ដីយកលុយទិញចំណីឲ្យក្រពើស៊ីវិញ»។
សូមបញ្ជាក់ដែរថា ការឲ្យចំណីរបស់ក្រពើ គឺធ្វើឡើងក្នុងចន្លោះ១០ថ្ងៃ ទៅ១៥ថ្ងៃម្ដង ហើយបើតាមប្រសាសន៍របស់លោក កាំង សារិន សម្រាប់កសិដ្ឋានរបស់លោកផ្ទាល់ដែលមានក្រពើជាង ១៥០០ក្បាលនោះ ត្រូវចំណាយលើការឲ្យចំណីម្ដងប្រមាណ ៣,៥តោន ដែលភាគច្រើនជាត្រីនិងក្បាលត្រីងៀតដែលទិញមកពីវៀតណាម។
នៅកម្ពុជា អ្នកចិញ្ចឹមក្រពើភាគច្រើនលើសលប់ចិញ្ចឹមភ្ញាស់កូនលក់ មិនមានអ្នកចិញ្ចឹមយកស្បែកកែច្នៃទេ។
(រូបភាព៖ ហេង ភារម្យ)
គួរបញ្ជាក់ដែរថា ខាងក្រសួងកសិកម្ម រុក្ខាប្រមាញ់ និងនេសាទ ក៏ធ្លាប់បានចេញសេក្ដីប្រកាសដល់អ្នកដែលរកស៊ីចិញ្ចឹមក្រពើនេះផងដែរថា គប្បីតែនាំគ្នាចិញ្ចឹមយកស្បែកលក់នាំចេញ ជាជាងការចិញ្ចឹមយកកូនលក់ ព្រោះការចិញ្ចឹមយកកូនលក់នេះ គឺវាច្រើនតែត្រូវជួបវិបត្តិទីផ្សារ ដោយសារតែឈ្មួញកណ្ដាលទម្លាក់តម្លៃ នៅពេលដែលមានការចិញ្ចឹមកើនឡើង។
យ៉ាងណាដ៏ដោយចុះ បច្ចុប្បន្ន ម្ចាស់កសិដ្ឋានចិញ្ចឹមក្រពើនៅកម្ពុជាពុំទាន់មានលទ្ធភាពចិញ្ចឹមក្រពើ និងកែច្នៃយកសាច់ និងស្បែកដោយខ្លួនឯងសម្រាប់លក់ទៅក្រៅស្រុកនោះទេ ដោយសារតែត្រូវចំណាយទុនច្រើន និងកង្វះបច្ចេកទេស។
ត្បិតតែទីផ្សារកូនក្រពើបច្ចុប្បន្នកំពុងធ្វើឲ្យម្ចាស់កសិដ្ឋានមួយចំនួនរងទឹកភ្នែកក៏ដោយ ប៉ុន្ដែ លោក កាំង សារិន បានលើកឡើងថា នេះគឺជាឱកាសល្អសម្រាប់អ្នកដែលមានបំណងចង់ទិញកូនក្រពើយកទៅចិញ្ចឹម ព្រោះថា ពេលនេះតម្លៃធ្លាក់ចុះខ្លាំងសម្រាប់អ្នកទិញទុកចិញ្ចឹម ហើយលោកជឿជាក់ថា នៅថ្ងៃខាងមុខ វាច្បាស់ជាអាចឡើងថ្លៃវិញ ដូច្នេះហើយវាជាឱកាសល្អសម្រាប់អ្នកចង់រកស៊ីក្នុងវិស័យនេះ៕
None
