ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានចាត់ទុកការឯកភាពលើពាក្យស្នើសុំពិនិត្យលទ្ធភាពអាចចុះបញ្ជីរបស់ក្រុមហ៊ុន ម៉េងលី ជេគួច អេឌ្យូខេសិន និងក្រុមហ៊ុនផលិតថាមពលអគ្គិសនី សឺស្តែនណេប៊ល វេនឈ័រ ក្នុងពេលតែមួយព្រមគ្នា វាជាជោគជ័យថ្មីមួយទៀតសម្រាប់ផ្សារមូលបត្រកម្ពុជា។ ព្រោះការណ៍នេះ វាបានបង្ហាញពីល្បឿននៃការអភិវឌ្ឍរបស់ផ្សារមូលបត្រកម្ពុជា ដ្បិតថា កន្លងមក CSX មិនធ្លាប់បានចេញលិខិតឯកភាពលើសំណើរក្រុមហ៊ុនពីរក្នុងពេលតែមួយបែបនេះនោះទេ។
ដើម្បីអាចចុះបញ្ជី និងជួញដូរជាផ្លូវការនៅផ្សារមូលបត្រ ក្រុមហ៊ុនទាំងពីរត្រូវតែទទួលបានការអនុញ្ញាតឱ្យបោះផ្សាយលក់មូលបត្រជាសាធារណៈពីនិយ័តករមូលបត្រកម្ពុជា និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅផ្សារមូលបត្រជាមុនសិន។ ក្នុងន័យនេះ ក្រោយទទួលបានការអនុញ្ញាតលើពាក្យស្នើសុំពិនិត្យលទ្ធភាពអាចចុះបញ្ជីខាងលើក្រុមហ៊ុនទាំងពីរត្រូវបន្តធ្វើការងារជាមួយនិយ័តករមូលបត្រកម្ពុជា និងផ្សារមូលបត្រកម្ពុជាជាច្រើនទៀត ដើម្បីអាចទទួលបានសិទ្ធិពេញលេញក្នុងការជួញដូរជាផ្លូវការ។
គួរបញ្ជាក់ថា កាលពីថ្ងៃទី៧ ខែមីនា ឆ្នាំ២០២៣ ផ្សារមូលបត្រកម្ពុជាបានចេញសេចក្តីជូនដំណឹងដោយសម្រេចឯកភាពលើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិរបស់ក្រុមហ៊ុន ម៉េងលី ជេគួច អេឌ្យូខេសិន ដែលគេស្គាល់ថាជាក្រុមហ៊ុនរបស់អ្នកឧកញ៉ា គួច ម៉េងលី ដែលវិនិយោគក្នុងវិស័យអប់រំដ៏ល្បីល្បាញមួយនៅកម្ពុជា។ នៅក្នុសេចក្ដីជូនដំណឹងដដែលនោះ CSX ក៏បានសម្រេចឯកភាពលើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុលរបស់ក្រុមហ៊ុន សឺស្តែនណេប៊ល វេនឈ័រ ដែលវិនិយោគលើការផលិតថាមពលអគ្គិសនីដោយពន្លឺព្រះអាទិត្យចំនួន២០មេហ្គាវ៉ាត់នៅខេត្តស្វាយរៀងផងដែរ។
បើតាមការគូសបញ្ជាក់របស់ឯកឧត្តម ហុង សុហួរ បច្ចុប្បន្នមានក្រុមហ៊ុនចំនួន១៨បានចុះបញ្ជីបោះផ្សាយលក់ភាគហ៊ុននៅផ្សារមូលបត្រកម្ពុជា ក្នុងនោះ៩ក្រុមហ៊ុនបានបោះផ្សាយលក់មូលបត្រកម្មសិទ្ធិ និង៩ក្រុមហ៊ុនបោះផ្សាយលក់សញ្ញាបណ្ណ ឬមូលបត្របំណុល។ ក្រុមហ៊ុនទាំងនេះប្រមូលទុនវិនិយោគបានប្រមាណ៣១៧លានដុល្លារអាមេរិកក្នុងមួយឆ្នាំ។ នៅឆ្នាំ២០២២ កន្លងទៅ ការជួញដូរភាគហ៊ុនមានជាមធ្យម៥០ម៉ឺនដុល្លារក្នុង១ថ្ងៃ៕
