អ្នកស្រី សំ សុផល ពលរដ្ឋរស់នៅជាប់ផ្លូវហាណូយ បានប្រាប់សារព័ត៌មាន ខេមបូណូមីស ថា ពលរដ្ឋនៅសងខាងផ្លូវនេះមិនសូវពេញចិត្តចំពោះការធ្វើផ្លូវ ដែលមានបង្គោលភ្លើងនៅចំកណ្តាលនោះទេ ព្រោះ វាបានធ្វើឲ្យប៉ះពាល់និងបង្កគ្រោះថ្នាក់ដល់អ្នកដំណើរ។
អ្នកស្រី សំ សុផល ដែលរស់នៅជាប់ផ្លូវនេះជាង២០ឆ្នាំមកហើយនោះ បានរៀបរាប់យ៉ាងដូច្នេះថា៖ «ពេលថ្ងៃ យើងមើលឃើញ តែពេលយប់វិញ គឺប៉ះពាល់ខ្លាំងណាស់ ព្រោះផ្លូវនេះអត់មានអំពូលភ្លើងផង»។
ដូចគ្នាដែរ លោក ជួន ធី ជាងជួសជុលម៉ូតូនៅជាប់ផ្លូវនេះ បានឲ្យដឹងថា អ្នកដែលរស់នៅម្តុំនេះ គេបានដឹងដែលធ្វើឲ្យពួកគេមានការប្រុងប្រយ័ត្ន ប៉ុន្តែ សម្រាប់អ្នកមកពីចម្ងាយ ដែលមិនធ្លាប់ធ្វើដំណើរតាមផ្លូវនេះ ទើបងាយបង្កគ្រោះថ្នាក់ចរាចរណ៍។
តើអ្នកបានអានអត្ថបទនេះ ឬនៅ?
លោកនិយាយថា៖ «អ្នកជិះអត់មានការប្រុងប្រយ័ត្ន ណាមួយគ្នាអត់ដឹងថា មានបង្គោលភ្លើងនៅកណ្ដាលផ្លូវ យើងអត់មានសញ្ញា មកដល់បុកគ្រោះថ្នាក់ដល់ជីវិតក៏មានដែរ»។
ចំណែក លោក ស៊ីដែន ពលរដ្ឋនៅជាប់ផ្លូវនេះដែរ បានរៀបរាប់ថា បង្គោលភ្លើងតែមួយនៅមុខផ្ទះរបស់លោក បានធ្វើឲ្យមានគ្រោះថ្នាក់ចរាចរណ៍ចំនួន៣ករណី ដោយមានអ្នកស្លាប់និងរងរបួសធ្ងន់។ លោកនិយាយថា៖ «បុក ៣ដងហើយបង ព្រោះបង្គោលហ្នឹងវានៅចំកណ្ដាលផ្លូវជាងគេ។ ថ្ងៃមុន បុករហូតដល់ស្លាប់ ហើយមិនដល់មួយអាទិត្យផង មានឡានមួយបុកចំកណ្ដាលឡានតែម្តង»។
កាលពីថ្ងៃបើកសម្ពោធស្ពានអាកាសផ្សារដីហុយ ឯកឧត្តម ស៊ុន ចាន់ថុល រដ្ឋមន្ដ្រីក្រសួងសាធារណការនិងដឹកជញ្ជូន បានសម្តែងការសោកស្តាយ និងចូលរួមរំលែកទុក្ខចំពោះក្រុមគ្រួសារជនរងគ្រោះ ដែលបានបាត់បង់ជីវិតដោយសារជិះបុកបង្គោលភ្លើងទាំងនេះ ហើយរដ្ឋមន្ដ្រីដ៏មានប្រជាប្រិយរូបនេះ ក៏បានលើកដៃសុំទោសប្រជាពលរដ្ឋ និងសុំការអធ្យាស្រ័យ ដែលក្រសួងនិងអាជ្ញាធរនៅមិនទាន់បានដកបង្គោលភ្លើងចេញពីផ្លូវ។
ឯកឧត្តមបានអំពាវនាវដល់ពលរដ្ឋឲ្យមានការប្រុងប្រយ័ត្ន និងសន្យាថា ក្រសួងសាធារណការនិងដឹកជញ្ជូន និងអាជ្ញាធរអគ្គិសនីកម្ពុជា នឹងដកបង្គោលភ្លើងទាំងនេះ ចាប់ពីចន្លោះខែមេសា ដល់ខែមិថុនា ឆ្នាំ២០១៨។
តាមពិតទៅ បង្គោលភ្លើងទាំងនេះមានតាំងពីឆ្នាំ២០០៩មកម៉្លេះ មិនមែនទើបតែពង្រីកផ្លូវនេះរួច ហើយដាក់តាមក្រោយនោះទេ។ ដោយសារតែការពង្រីកផ្លូវនេះហើយ ទើបបង្គោលភ្លើងនេះបានរត់មកនៅចំកណ្ដាលផ្លូវទៅវិញ។
យ៉ាងណាក៏ដោយ ពលរដ្ឋសំណូមពរឲ្យអាជ្ញាធរពន្លឿនការដកបង្គោលផ្លូវនេះ ឲ្យបានឆាប់ ដើម្បីបញ្ចៀសគ្រោះថ្នាក់ចរាចរណ៍ ដែលបង្កឡើងដោយបង្គោលភ្លើងពិឃាដនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
