តម្រូវការទុរេនពីសំណាក់ទីផ្សារក្នុងស្រុកមានកំណើនខ្ពស់នៅឆ្នាំនេះ, តើមកពីមូលហេតុអ្វី?

លោក ឡេង ប៉លីន ម្ចាស់ចម្ការទុរេនម្នាក់នៅខេត្តកំពង់ចាម បានគូសបញ្ជាក់ថា នៅឆ្នាំនេះទុរេននៅចម្ការខ្លួនទទួលបានការគាំទ្រខ្លាំងគួរឱ្យកត់សម្គាល់ បើធៀបទៅនឹងឆ្នាំមុន ជាពិសេសអតិថិជនភាគច្រើនបាននាំគ្នាមកទិញទុរេនដល់ចម្ការតែម្តង ដែលជំរុញឱ្យការប្រមូលផលទុរេនប្រភេទម៉ូសាំងឃីងនៅចម្ការលោក ជិតបានបិទបញ្ចប់ហើយមកទល់ពេលនេះ។ បើតាមម្ចាស់ចម្ការទុរេនរូបនេះ ការកើនឡើងខ្ពស់នៃតម្រូវការទុរេនក្នុងស្រុកនៅឆ្នាំនេះ ក៏ដោយសារតែប្រជាពលរដ្ឋមិនហ៊ានទិញទុរេននាំចូលមកបរិភោគ ដោយសារខ្លាចមានសារធាតុគីមី ដែលប៉ះពាល់ដល់សុខភាព ដូច្នេះហើយពួកគេបានងាកមកគាំទ្រទុរេនដែលដាំក្នុងស្រុកជំនួសវិញ។ ទន្ទឹមនឹងតម្រូវការមានការកើនឡើង ទិន្នផលទុរេននៅចម្ការរបស់​លោកនាឆ្នាំនេះ ក៏មានការកើនឡើងផងដែរ ដោយសារដើមទុរេនមានអាយុកាន់តែច្រើន ទទួលផលបានកាន់តែខ្ពស់។ បើតាមម្ចាស់ចម្ការរូបនេះ បច្ចុប្បន្នទុរេនរបស់លោកអាចលក់បានតម្លៃចន្លោះពី១៥,០០០រៀលទៅ២០,០០០រៀលក្នុងមួយគីឡូក្រាម តម្លៃនេះមានការធ្លាក់ចុះបន្តិចបើធៀបនឹងតម្លៃកាលពីឆ្នាំមុន។

​លោក ធឿន ប៊ុនហុង អ្នកបច្ចេកទេសផលិតកម្មដំណាំទុរេននៃក្រុមហ៊ុន អង្គរហ្គ្រីន កត់សម្គាល់ឃើញថា ទិន្នផលទុរេនរបស់ប្រជាកសិករនៅឆ្នាំនេះ មានកំណើនខ្ពស់ប្រមាណ៣០% បើធៀបនឹងទិន្នផលដែលទទួលបានកាលពីឆ្នាំមុន ដោយសារការយល់ដឹងពីបច្ចេកទេសនៃការដាំដុះ និងថែទាំទុរេនរបស់កសិករមានភាពទូលំទូលាយជាងមុន។ បើតាមអ្នកជំនាញរូបនេះ តម្រូវការទុរេនរបស់កម្ពុជា នៅឆ្នាំនេះ មានការកើនឡើងខ្ពស់ ទាំងសម្រាប់ផ្គត់ផ្គង់ក្នុងស្រុក និងនាំចេញទៅទីផ្សារប្រទេសជិតខាង។

​ជាមួយគ្នានេះ ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ការដាំដុះដំណាំទុរេននៅកម្ពុជា មានការកើនឡើងជាបន្តបន្ទាប់មកទល់ពេលនេះ ខណៈមន្ត្រីជំនាញនៃក្រសួងកសិកម្ម ​កំពុងធ្វើបច្ចុប្បន្នភាពនៃស្ថានភាពដាំដុះដំណាំទុរេនរបស់កម្ពុជា នៅឆ្នាំនេះផងដែរ។ បើតាមមន្រ្តីជាន់ខ្ពស់រូបនេះ ដំណាំទុរេននៅកម្ពុជា បច្ចុប្បន្នចាប់ផ្តើមប្រមូលផលជាបណ្តើរៗហើយនៅតាមតំបន់មួយចំនួន ហើយតំបន់ខ្លះអាចនឹងប្រមូលផលរហូតដល់អំឡុងខែសីហា ឯណោះ។

​គួរបញ្ជាក់ថា រដ្ឋាភិបាលកម្ពុជា បានដាក់ចេញនូវវិធានការទប់ស្កាត់ការនាំចូលទុរេន ដែលមានផ្ទុកសារធាតុគីមី និងខូចគុណភាព ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋពីទីផ្សារប្រទេសជិតខាងចូលមកទីផ្សារកម្ពុជា ជាបន្តបន្ទាប់ ក្រោយប្រទេសចិន ដែលជាអ្នកនាំចូលទុរេនធំជាងគេនៅអាស៊ី រឹតបន្តឹងលើការត្រួតពិនិត្យរកសារធាតុម្យ៉ាង ដែលអាចបង្កឱ្យកើតជំងឺមហារីកលើទុរេននាំចូលពីវៀតណាម បានធ្វើឱ្យទុរេននៅប្រទេសនេះកកស្ទះនៅតាមព្រំដែន និងចាល់ពេញទីផ្សារក្នុងស្រុក៕