លោក ហួន សុរង្សី ប្រធាននាយកដ្ឋានកិច្ចការសិប្បកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានគូសបញ្ជាក់ថា គ្មានសញ្ញាណាមួយបង្ហាញថាកម្ពុជាអាចខ្វះអំបិលសម្រាប់ផ្គត់ផ្គង់តម្រូវការប្រើប្រាស់ក្នុងស្រុកនោះទេនៅឆ្នាំនេះ។ ជាក់ស្តែងត្រឹមជាង៥ខែប៉ុណ្ណោះ កសិករនៅខេត្តកែប និងកំពតផលិតអំបិលបានជាង៨ម៉ឺនតោនហើយ សម្រាប់បំពេញតម្រូវការប្រើប្រាស់របស់ប្រជាពលរដ្ឋជាលក្ខណៈគ្រួសារ និងឧស្សាហកម្ម។ បរិមាណនេះមានការកើនឡើងជាង១០០% បើធៀបនឹងទិន្នផលដែលផលិតបានកាលពីឆ្នាំ២០២២ ដែលមានត្រឹមតែប្រមាណ៣ម៉ឺនតោនប៉ុណ្ណោះ។ នេះបើតាមការគូសបញ្ជាក់របស់លោក ហួន សុរង្សី ដែលបានបន្ថែមថា ការកើនឡើងទិន្នផលអំបិលនេះ គឺដោយសារឆ្នាំនេះមានការអំណោយផលល្អពីអាកាសធាតុ។
តាមរយៈទិន្នផលអំបិល ដែលសម្រេចបានជាង៨ម៉ឺនតោនខាងលើ គួបផ្សំការផលិតអំបិលនៅតែបន្ត ធ្វើឲ្យមន្ត្រីជាន់ខ្ពស់រូបនេះជឿជាក់ថា ឆ្នាំនេះកម្ពុជានឹងមានអំបិលប្រើប្រាស់គ្រប់គ្រាន់ ដោយមិនចាំបាច់នាំចូលពីបរទេស ហើយកម្ពុជាក៏គ្មានផែនការក្នុងការនាំចូលអំបិលនោះដែរ។
អត្ថបទគួរអាន
បើតាមការលើកឡើងរបស់អ្នកជំនាញសុខភាព អំបិលដែលផលិតដោយកសិករនៅខេត្តកែប និងខេត្តកំពតជាអំបិលធម្មជាតិ១០០% ដែលមានអត្ថប្រយោជន៍ខ្ពស់សម្រាប់សុខភាពរបស់អ្នកបរិភោគ។
គួរបញ្ជាក់ថា បច្ចុប្បន្នកម្ពុជាមានផ្ទៃដីផលិតអំបិលសរុបចំនួន ៤ពាន់៥៧៧ហិកតា ដែលអាចផលិតអំបិលបានជាង៩ម៉ឺនតោនក្នុង១ឆ្នាំ ប្រសិនបើផលិតពេញសមត្ថភាព និងអាកាសអំណោយផល។ កម្ពុជាមានតម្រូវការប្រើប្រាស់អំបិលចន្លោះពី ៩ម៉ឺនទៅ១០ម៉ឺនតោនក្នុង១ឆ្នាំ ខណៈកាលពីឆ្នាំ២០២២ កម្ពុជាផលិតអំបិលបានតែជាង ៣ម៉ឺន២ពាន់តោនប៉ុណ្ណោះ ដែលបង្ខំឲ្យកម្ពុជាត្រូវនាំចូលអំបិលធម្មជាតិ ពីប្រទេសឥណ្ឌាចំនួន១ម៉ឺន៦ពាន់តោន ដើម្បីបម្រុងទុក និងបំពេញតម្រូវការប្រើប្រាស់ក្នុងស្រុក៕
