ក្រុមអ្នកជំនាញសេដ្ឋកិច្ចនៅមានមន្ទិល និងចង់បានការបញ្ជាក់លម្អិតពីផែនការទិញយកបំណុលពលរដ្ឋទាំងអស់របស់លោក ថាក់ស៊ីន

លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ដ៏មានឥទ្ធិពល និងជាឪពុកបង្កើតរបស់នាយករដ្ឋមន្ត្រីថៃ បច្ចុប្បន្ន គឺលោកស្រី ផែថងថាន ស៊ីណាវ៉ាត្រា បានស្នើផែនការទិញយកបំណុលរបស់ពលរដ្ឋទាំងអស់ពីធនាគារនានា និងលុបចោលប្រវត្តិឥណទានរបស់ពួកគេចេញពីប្រព័ន្ធធនាគារ ហើយអនុញ្ញាតឱ្យប្រជាជនសងបំណុលត្រលប់មករដ្ឋវិញបន្តិចម្តងៗទៅតាមលទ្ធភាពដែលអាចទៅរួច។ ដំណឹងដ៏គួរឱ្យភ្ញាក់ផ្អើលនេះត្រូវបានសារព័ត៌មានថៃ ចុះផ្សាយព្រោងព្រាត និងទទួលបានការអបអរសាទរពីសំណាក់ប្រជាជនពាសពេញផ្ទៃប្រទេស។ ទោះជាយ៉ាងណា ក្រុមអ្នកជំនាញសេដ្ឋកិច្ចហាក់នៅមានមន្ទិល និងចង់បានសេចក្ដីលម្អិតបន្ថែមទៀតអំពីផែនការដ៏មហិច្ឆតានេះ។

ឆ្លើយតបទៅនឹងសំណើរបស់លោក ថាក់ស៊ីន រដ្ឋមន្ត្រីក្រសួងហិរញ្ញវត្ថុ លោក ពិឆៃ ជុនហាវ៉ាជីរ៉ា (Pichai Chunhavajira) បាននិយាយកាលពីថ្ងៃទី១៨ ខែមីនា ថា ក្រសួងចាំបាច់ត្រូវពិនិត្យផ្ទៀងផ្ទាត់ព័ត៌មានទាំងអស់ និងពិចារណាមតិយោបល់របស់អ្នកពាក់ព័ន្ធផ្សេងៗទៀត។ ហើយនៅក្នុងអំឡុងកិច្ចប្រជុំរួមជាមួយសមាគមធនាគារថៃ (TBA) ក្នុងថ្ងៃដដែល រដ្ឋមន្ត្រីរូបនេះ បានបង្ហើបឱ្យដឹងថា បញ្ហានេះទំនងជាត្រូវពិភាក្សាលម្អិតបន្ថែមទៀត។ ​​​​​

លោក ធើតសាក់ ថាវីធីរ៉ាថាម (Therdsak Thaveeteeratham) អនុប្រធានប្រតិបត្តិនៃក្រុមហ៊ុនមូលបត្រ Asia Plus Securities បានថ្លែងថា ផែនការសម្រាលបន្ទុកបំណុលរបស់ពលរដ្ឋដែលស្នើឡើងដោយលោក ថាក់ស៊ីន គឺជាគំនិតដ៏ល្អមួយ ប៉ុន្តែពិបាកក្នុងការអនុវត្ត។ បញ្ហាសំខាន់គឺនៅត្រង់ប្រភពហិរញ្ញប្បទាន ដែលមិនត្រូវបានពន្យល់បកស្រាយ។ តែយ៉ាងណា លោកទទួលស្គាល់ថា ប្រសិនបើផែនការនេះទទួលបានជោគជ័យ វាអាចជួយជំរុញ​កំណើនសេដ្ឋកិច្ច ប្រព័ន្ធធនាគារ និងវិស័យអចលនទ្រព្យក្នុងប្រទេសនេះ។

ទន្ទឹមនេះ អ្នកជំនាញសេដ្ឋកិច្ចផ្សេងៗទៀតដែលរួមមានទាំងប្រធានផ្នែកស្រាវជ្រាវនៅក្រុមហ៊ុនមូលបត្រ Krungsri Securities (KSS) ប្រធានក្រុមអ្នកជំនាញសេដ្ឋកិច្ចនៅអង្គភាពស្រាវជ្រាវមួយក្រោមចំណុះធនាគារ Siam Commercial Bank ប្រធានក្លឹបអាជីវកម្មភោជនីយដ្ឋាន និងអនុប្រធានសភាពាណិជ្ជកម្មថៃ ផងដែរនោះបានលើកឡើងថា លោក ថាក់ស៊ីន ចាំបាច់ត្រូវផ្ដល់សេចក្ដីលម្អិតបន្ថែមទៀតពីផែនការទិញបំណុលរបស់ប្រជាជននេះ ជាពិសេសការចូលរួមពីវិស័យឯកជន ហើយបានជំរុញឱ្យមានការថ្លឹងថ្លែងដោយប្រុងប្រយ័ត្ននៃអត្ថប្រយោជន៍ និងហានិភ័យ។

បណ្ដាថ្នាក់ដឹកនាំធុរកិច្ចបានសង្កត់ធ្ងន់ថា រដ្ឋាភិបាលចាំបាច់ត្រូវមានដំណោះស្រាយដែលមានលក្ខណៈទូលំទូលាយជាងនេះ ពោលគឺដំណោះស្រាយមួយដែលលើសពីការជួយដោះស្រាយឥណទានមិនដំណើរការ NPL ហើយបានអំពាវនាវឱ្យរដ្ឋាភិបាលចាត់វិធានការជាបន្ទាន់ និងដាក់ចេញផែនការល្អិតល្អន់ដើម្បីដោះស្រាយវិបត្តិសេដ្ឋកិច្ចជារួមនៅក្នុងប្រទេស៕

ដោយ: តែម សុខុម