នាយកប្រតិបត្តិក្រុមហ៊ុន វីនហ្វាស លោកស្រី ឡេ ធី ធុយ (Le Thi Thu Thuy) បាននិយាយនៅក្នុងសម្ភាសថ្មីៗនេះជាមួយសារព័ត៌មាន AP ថា អាម៉េរិក គឺជាទីផ្សារដ៏លំបាកសម្រាប់ក្រុមហ៊ុនលោកស្រីក្នុងការជ្រៀតចូលរថយន្តរបស់ខ្លួន ព្រោះវាមានឧបសគ្គស្មុគស្មាញ និងការប្រកួតប្រជែងខ្លាំង។
ជាក់ស្តែងរហូតមកទល់ពេលនេះក្រុមហ៊ុន វីនហ្វាស លក់រថយន្តអគ្គិសនីរបស់ខ្លួន បានត្រឹមតែជាង២ពាន់គ្រឿងប៉ុណ្ណោះ នៅសហរដ្ឋអាម៉េរិក គឺតិចជាង១%នៃចំនួនលក់រថយន្តអគ្គិសនីសរុបនៅសហរដ្ឋអាម៉េ រិក ខណៈដែលការលក់នៅជុំវិញពិភពលោកមានចំនួនជិត២ម៉ឺនគ្រឿង គិតចាប់ពីខែមេសា ដល់ខែកញ្ញា ឆ្នាំនេះ ពោលគឺស្ថិតនៅក្រោមគោលដៅកំណត់ដែលចង់លក់ឱ្យបាន៥ម៉ឺនគ្រឿង នៅឆ្នាំ២០២៣ នេះ។
ទោះជាយ៉ាងណាក៏ដោយ លោកស្រី ធុយ បាននិយាយក្នុងសម្ភាសជាមួយសារព័ត៌មាន AP នៅទីស្នាក់កណ្ដាលរបស់ក្រុមហ៊ុន វីនហ្វាស នៅរដ្ឋធានីហាណូយ ប្រទេសវៀតណាមថា ក្រុមហ៊ុនរបស់លោកស្រីប្ដេជ្ញាចិត្តថា នឹងជម្នះឧបសគ្គក្នុងការប្រជែងជាមួយប្រទេស ដែលព្យាយាមងាកទៅរករថយន្តអគ្គិសនី ដើម្បីកាត់បន្ថយការបំភាយកាបូន ហើយក្រុមហ៊ុននេះអាចនឹងសាកល្បងលក់បញ្ចុះតម្លៃនៅទីផ្សារអាម៉េរិក ខណៈមកដល់ពេលនេះក្រុមហ៊ុននេះមិនទាន់ហ៊ានលេងល្បែងបែបនេះនៅឡើយទេ។
អត្ថបទគួរអាន
លោកស្រី ធុយ បាននិយាយថា ទោះជាមានបទប្បញ្ញត្តិដ៏តឹងរ៉ឹង ការត្រួតពិនិត្យយ៉ាងតឹងរ៉ឹងពីប្រព័ន្ធផ្សព្វផ្សាយ និងការជំទាស់របស់ទីប្រឹក្សានៅក្នុងក្រុមហ៊ុន Vinfast ក៏ដោយ ប៉ុន្តែក្រុមហ៊ុននេះ នៅតែមានចេតនាផ្តល់អាទិភាពចម្បងចំពោះទីផ្សារសហរដ្ឋអាម៉េរិកដដែល។ ក្រុមហ៊ុន វីនហ្វាស ចង់ទៅបង្កើតឈ្មោះរបស់ខ្លួននៅក្នុងទីផ្សារដ៏លំបាកបំផុតមួយនេះដោយផ្អែកលើហេតុផលដ៏សាមញ្ញបំផុត គឺថាប្រសិនបើខ្លួនអាចធ្វើវាបាននៅទីនោះ មនុស្សនឹងជឿលើសមត្ថភាព និងគុណភាពរថយន្តក្រុមហ៊ុនរបស់ខ្លួន តែវាអាចរាងមានការពិបាកបន្តិច។
ក្រុមហ៊ុន Vinfast គឺជាផ្នែកមួយនៃក្រុមហ៊ុន Vingroup ដែលបានចាប់ផ្តើមពីក្រុមហ៊ុនមីកញ្ចប់នៅក្នុងប្រទេសអ៊ុយក្រែន ក្នុងទសវត្សរ៍ឆ្នាំ១៩៩០ ហើយក្រុមហ៊ុននេះបានផលិតរថយន្តដំបូងរបស់ខ្លួននៅឆ្នាំ២០១៩ នៅក្នុងរោងចក្រមាត់សមុទ្រមួយនៅជិតទីក្រុងហៃផុង (Haiphong) នៅភាគឦសាននៃប្រទេសវៀតណាម។
ពេលនេះ ក្រុមហ៊ុន វីនហ្វាស កំពុងបង្កើនសមត្ថភាពផលិតកម្មរបស់ខ្លួនឱ្យបាន២៥ម៉ឺនគ្រឿង នៅក្នុងមួយឆ្នាំនៅឯរោងចក្រដែលសាងសង់លើផ្ទៃដីទំហំ៣៣៥ហិកតា នៅឆ្នេរសមុទ្ររបស់ខ្លួន៕
អត្ថបទ៖ សុខ ជា
None
