នៅក្នុងសេចក្តីជូនដំណឹងទាំង៣លើក បានភ្ជាប់ជាមួយឈ្មោះរោងចក្រសហគ្រាសកាត់ដេរ និងស្ថាប័នឯកជន ដែលមានអាជីវកម្មទាក់ទងនឹងវិស័យទេសចរណ៍ ដូចជាក្រុមហ៊ុនទេសចរណ៍ សណ្ឋាគារ និងភោជនីយដ្ឋានជាដើម។ ជាការកត់សម្គាល់ កម្មករនិយោជិតផ្នែកវិស័យទេសចរណ៍មានចំនួន ១២៩ក្រុមហ៊ុន ខណៈដែលផ្នែករោងចក្រសហគ្រាសកាត់ដេរមានចំនួន ២១៤រោងចក្រ។
នៅក្នុងសេចក្តីជូនដំណឹងដដែលបានបញ្ជាក់ថា ប្រាក់ឧបត្ថម្ភដែលកម្មករត្រូវបើកទាំងអស់ គឺជាប្រាក់រៀលដោយចំនួនប្រាក់ដែលឧបត្ថម្ភនឹងត្រូវចែកជា ៣ប្រភេទរួមមាន៖
ទីមួយ ចំនួន ៦១.៥០០រៀល ឬស្មើនឹង១៥ដុល្លារ សម្រាប់កម្មករដែលព្យួរការងារ ពី៧ដល់១០ថ្ងៃ។
ទីពីរ ចំនួន ១២៣.០០០រៀល ឬស្មើនឹង៣០ដុល្លារ សម្រាប់កម្មករនិយោជិតដែលព្យួរការងាររយៈពេលពី១១ទៅ២០ថ្ងៃ
ទីបី ចំនួន ១៦៤.០០០រៀល សម្រាប់កម្មករដែលព្យួរការងារក្នុងរយៈពេលពី ២១ថ្ងៃដល់ ១ខែ។ កម្មករនឹងអាចទៅបើកប្រាក់ឧបត្ថម្ភនេះបាន លុះណាទទួលបានសារពីធនាគារវីងជាមុនសិន ទើបអាចបើកបាន។
អត្ថបទទាក់ទង!
ប្រាក់ឧបត្ថម្ភនេះ គឺជាការអនុវត្តវិធានការជុំទី៣ហើយ របស់រាជរដ្ឋាភិបាល ក្នុងការសង្គ្រោះវិស័យដែលរងគ្រោះធ្ងន់ជាងគេដោយសារជំងឺកូវីដ-១៩នេះ ជាពិសេសវិស័យកាត់ដេរ និងវិស័យទេសចរណ៍។
នៅក្នុងនោះដែរ ចំពោះវិស័យកាត់ដេររហូតមកទល់នឹងពេលនេះ មានរោងចក្រប្រមាណជាង ២០០រោងចក្រហើយ ដែលបានផ្អាកប្រតិបត្តិការ និងព្យួរការងារ ដែលធ្វើឲ្យប៉ះពាល់ដល់កម្មករប្រមាណជាង ១០ម៉ឺននាក់ ហើយទំនងជាអាចនឹងកើនឡើងជាបន្តបន្ទាប់ទៀត ប្រសិនបើជំងឺនេះនៅតែបន្តអូសបន្លាយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
