នាយករដ្ឋមន្ត្រីឥណ្ឌា លោក ណារិនដ្រា ម៉ូឌី បាននិយាយនៅក្នុងវីដេអូ Conference ជាមួយនឹងថ្នាក់ដឹកនាំអឺរ៉ុប ដែលបានចូលរួមកិច្ចប្រជុំកំពូលនៅក្នុងប្រទេស ព័រទុយហ្គាល់នាពេលថ្មីៗនេះថា ឥណ្ឌា និងអឺរ៉ុប បានប្រកាសពីការបន្ដកិច្ចចរចាគ្នាឡើងវិញ បន្ទាប់ពីភាគីទាំងពីរ បានបោះបង់ចោលតាំងពីឆ្នាំ២០១៣មក ក៏ដូចជាការពិភាក្សាគ្នាលើកិច្ចសហប្រតិបត្តិការលើបញ្ហាជាច្រើនផ្សេងទៀត។
មន្ត្រីជាន់ខ្ពស់អឺរ៉ុប បានលើកឡើងពីក្ដីរីករាយ ដោយសារតែមានក្ដីសង្ឃឹមចំពោះទំនាក់ទំនងកាន់តែជិតស្និទ្ធរវាងអឺរ៉ុបនឹងឥណ្ឌា។
លោកស្រី អូស៊ូឡា វ័ន ឌឺ លីយិន ប្រធានគណៈកម្មការអឺរ៉ុប បាននិយាយដែរថា ការព្រមព្រៀងវិលមករកការចរចានៃកិច្ចព្រមព្រៀងពាណិជ្ជកម្មសេរីឡើងវិញរវាងអឺរ៉ុប និងឥណ្ឌា គឺជាភាពលេចធ្លោ និងជាពេលវេលាដ៏សំខាន់មួយ ហើយវាក៏ជាការបើកនូវ ទំព័រដ៏សំខាន់ថ្មីមួយទៀត សម្រាប់ទំនាក់ទំនងទ្វេភាគីរវាងប្រទេសទាំងពីរ ។
អត្ថបទទាក់ទង!
លោកស្រី អូស៊ូឡា បន្ថែមថា មានប្រទេសចំនួន១៧នៅអឺរ៉ុប បាន និងកំពុងផ្ដល់ជំនួយស្មើនឹងទឹកប្រាក់ប្រមាណ ១២២លានដុល្លារ សម្រាប់ឥណ្ឌាក្នុងការប្រយុទ្ធប្រឆាំងនឹងកូវីដ-១៩ រួមមាន ឧបករណ៍ផលិតខ្សល់អុកស៊ីហ្សែន, ថ្នាំពេទ្យ និងម៉ាស៊ីនជំនួយដង្ហើមជាដើម។
ទំនាក់ទំនងដ៏កក់ក្ដៅជាមួយឥណ្ឌា ត្រូវបានគេមើលឃើញថា នឹងបន្ថែមនូវចំណុចទាក់ទាក់ន្ថែមទៀតសម្រាប់អឺរ៉ុប ក្នុងការពង្រីកឥទ្ធិពលរបស់ខ្លួននៅក្នុងតំបន់ឥណ្ឌូប៉ាស៊ីហ្វិក។
ដោយឡែក បើក្រឡេកទៅមើលទំនាក់ទំនងរវាងអឺរ៉ុប ជាមួយនឹងមហាយក្សចិនវិញ គឺហាក់មិនសូវល្អូកល្អឺនប៉ុន្មានទេ ដោយសារតែទង្វើរបស់ទីក្រុងប៉េកាំង ចំពោះជនជាតិភាគតិចម៉ូស្លីមអ៊ួហ្គ័រ រហូតធ្វើឲ្យអឺរ៉ុបសម្រេចផ្អាកការផ្ដល់សច្ចាប័នដល់កិច្ចព្រមព្រៀងវិនិយោគទ្វេភាគីជាមួយចិនថែមទៀតផង។
ប្រទេសចិន និងឥណ្ឌា កាលពីឆ្នាំមុននេះ មានការប៉ះទង្គិចគ្នាគួរសមក្នុងរឿងព្រំដែន និងជម្លោះបច្ចេកវិទ្យាមួយចំនួនផងដែរ ខណៈដែលអាមេរិក ក៏ជាសម្ព័ន្ធមិត្តចាក់ទឹកមិនលិចរបស់ឥណ្ឌាដែរ។ ដូច្នេះ ចង់ ឬមិនចង់ អឺរ៉ុបច្បាស់ជាត្រូវចោលភ្នែកពីចិន សម្លឹងមើលឥណ្ឌាខ្លះហើយ ដើម្បីទប់ឥទ្ធិពលពីចិន និងពង្រីកឥទ្ធិពលខ្លួននៅក្នុងតំបន់ និងបង្ហាញពីជំហររបស់ខ្លួនទៅកាន់អាមេរិក។
យ៉ាងណាក៏ដោយចុះ ការឈានទៅបញ្ចប់កិច្ចព្រមព្រៀងពាណិជ្ជកម្មសេរីរវាងអឺរ៉ុប និងមហាយក្សឥណ្ឌា ប្រហែលជាមិនមែនងាយស្រួលទេ។ ជាក់ស្ដែង ការចរចាគ្នា កាលពីលើកមុន មានរយៈពេល ៦ឆ្នាំ គឺគ្មានទទួលបានកិច្ចព្រមព្រៀងអ្វីទាំងអស់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
