ការសួរដេញដោលនេះ ក្រោយមានរបាយការណ៍ស្រាវជ្រាវថ្មីមួយដែលសង្ស័យពីការរំលោភបំពាននេះ ហើយរកឃើញថាមានការបំពានច្បាប់មែននោះ ក្រុមហ៊ុនរថយន្តធំៗទាំងអស់នោះ ត្រូវប្រឈមមុខនឹងបញ្ហាលក់រថយន្តនៅលើទឹកដីអាមេរិកជាក់ជាមិនខានឡើយ។ នេះបើតាមការចុះផ្សាយរបស់សារព័ត៌មានអន្តរជាតិធំៗ។
លោក Ron Wyden ប្រធានគណៈកម្មាធិការហិរញ្ញវត្ថុនៃព្រឹទ្ធសភាអាមេរិក បានសរសេរសំបុត្រផ្ញើទៅកាន់នាយកក្រុមហ៊ុនរថយន្តធំៗ អំពីខ្សែចង្វាក់ផ្គត់ផ្គង់គ្រឿងបង្គុំរបស់ពួកគេមកពីប្រទេសចិន ដែលវាមានសារៈសំខាន់ខ្លាំងណាស់ក្នុងការត្រួតពិនិត្យឱ្យហ្មត់ចត់នូវទំនាក់ទំនងរបស់ក្រុមហ៊ុនរថយន្ត ជាមួយនឹងបណ្តាញផ្គត់ផ្គង់ទាំងអស់ពាក់ព័ន្ធនឹងខេត្តស៊ីនជាំង ដ្បិតថា តំបន់នេះ គឺស្ថិតនៅក្នុងការហាមឃាត់ការនាំចូលផលិតផលទៅកាន់ទឹកដីសហរដ្ឋអាមេរិក ដោយសារតែមានករណីរំលោភបំពានសិទ្ធិមនុស្សធ្ងន់ធ្ងរ។
តាមរយៈសំបុត្រដែលត្រូវបានផ្ញើទៅកាន់ក្រុមហ៊ុន Toyota, Volkswagen, Stellantis និង Mercedes-Benz បានបង្ហាញថា ប្រសិនបើគ្មានការបញ្ជាក់ថា គ្រឿងបង្គុំរបស់ពួកគេមិនពាក់ព័ន្ធនឹងការរំលោភបំពាននៅក្នុងខេត្តស៊ីនជាំងទេនោះ ក្រុមហ៊ុនរថយន្តមិនអាច និងមិនគួរលក់រថយន្តរបស់ពួកគេនៅលើទឹកដីអាមេរិកឡើយ។
អត្ថបទគួរអាន
ក្នុងខ្លឹមសារសំបុត្ររបស់សមាជិកព្រឹទ្ធសភាអាមេរិករូបនេះ គឺបានដកស្រង់របាយការណ៍ថ្មីមួយដែលបានចេញផ្សាយកាលពីដើមខែធ្នូនេះ ដោយអ្នកស្រាវជ្រាវនៅសាកលវិទ្យាល័យ Sheffield Hallam នៅប្រទេសអង់គ្លេស ទៅលើការប្រើប្រាស់ដែកថែប អាលុយមីញ៉ូម ទង់ដែង អាគុយ អេឡិចត្រូនិច និងគ្រឿងបង្គុំដទៃទៀត សម្រាប់បម្រើឱ្យឧស្សាហកម្មរថយន្ត ដែលត្រូវបានរកឃើញថា គឺបានផលិតនៅក្នុងតំបន់ស៊ីនជាំងប្រទេសចិន។ ក្នុងរបាយការណ៍នេះ អ្នកស្រាវជ្រាវបានជំរុញឱ្យត្រួតពិនិត្យហ្មត់ចត់ចំពោះវត្ថុធាតុដើម និងគ្រឿងបង្គុំរថយន្ត ដើម្បីធានាថា គ្មានការបំពានសិទ្ធិពលកម្មឡើយ។
សូមរំលឹកថា កាលពីខែមិថុនា ច្បាប់អាមេរិកមួយបានចូលជាធរមានដោយហាមឃាត់ការនាំចូលទំនិញរបស់ក្រុមហ៊ុនណា ដែលជាប់ពាក់ព័ន្ធនឹងការរំលោភសិទ្ធិពលកម្មក្នុងតំបន់ស៊ីនជាំង ប្រទេសចិន ដើម្បីប្រឆាំងនឹងការយាយីរបស់ក្រុងប៉េកាំងទៅលើជនជាតិភាគតិចអ៊ុយហ្គួរ។
ទីក្រុងប៉េកាំង តែងតែច្រានចោលការចោទប្រកាន់នានាអំពីការបំពានសិទ្ធិមនុស្សនៅក្នុងតំបន់ស៊ីនជាំង និងបានអះអាងថា ខ្លួនបានបង្កើតមជ្ឈមណ្ឌលបណ្តុះបណ្តាលវិជ្ជាជីវៈ ដើម្បីកាត់បន្ថយភេរវកម្ម ការផ្តាច់ខ្លួន និងក្រុមជ្រុលនិយមសាសនាក្នុងខេត្តនេះជាដើម។
ជុំវិញការចោទសួរខាងលើនេះដែរ ក្រុមហ៊ុនរថយន្តដូចជា GM, Honda និង Volkswagen សុទ្ធតែបានធានាអះអាងថា ខ្សែចង្វាក់ផ្គត់ផ្គង់របស់ពួកគេ មិនជាប់ពាក់ព័ន្ធនឹងការបង្ខិតបង្ខំកម្លាំងពលកម្មណាមួយឡើយ។
ថ្មីៗនេះ សហជីពកម្មកររថយន្តអាមេរិក បានអំពាវនាវឱ្យក្រុមហ៊ុនផលិតរថយន្ត ផ្លាស់ប្តូរខ្សែចង្វាក់ផ្គត់ផ្គង់ទាំងអស់ចេញពីតំបន់ស៊ីនជាំង ប្រទេសចិន ដើម្បីការពារសិទ្ធិពលកម្ម និងសិទ្ធិមនុស្ស ព្រមទាំងបរិស្ថានផងដែរ៕
អត្ថបទ ៖ នៅ សំភី
