ជាក់ស្ដែង មិនត្រឹមតែព្រមានតែមាត់ទេ កាលពីពេលថ្មីៗនេះ រុស្ស៊ីក៏បានសម្រេចកាត់ផ្ដាច់ការផ្គត់ផ្គង់ប្រេងទៅឲ្យប្រទេសអឺរ៉ុបចំនួន២រួចហើយដែរ គឺប្រទេសប៉ូឡូញ និងប៊ុលហ្គារី។ នេះបើតាមការចុះផ្សាយសារព័ត៌មាន Reuters។
ប្រទេសរុស្ស៊ី កាលពីសប្ដាហ៍មុននេះ បានប្រើធម៌ក្ដៅ ដោយបានផ្អាកការផ្គត់ផ្គង់ឧស្ម័នទៅប្រទេសប៉ូឡូញ និង ប៊ុលហ្គារី បន្ទាប់ពីប្រទេសទាំងពីរនេះ រឹងទទឹង មិនព្រមបំពេញតាមការទាមទាររបស់ទីក្រុងម៉ូស្គួ ក្នុងការទូទាត់ថ្លៃឧស្ម័នជាប្រាក់រូប្លដែលជារូបិយបណ្ណរុស្ស៊ី។ ទោះយ៉ាងណាប្រទេសអឺរ៉ុបទាំងពីរនេះ បានត្រៀមខ្លួនរួចហើយថា ពួកគេនឹងឈប់ប្រើប្រាស់ឧស្ម័នរុស្ស៊ីនៅឆ្នាំនេះ ហើយពួកគេបានអះអាងថា ខ្លួនអាចទប់ទល់នឹងការបញ្ឈប់ការផ្គត់ផ្គង់របស់រុស្ស៊ីនេះបាន។
ក៏ប៉ុន្តែការកាត់ផ្តាច់ការផ្គត់ផ្គង់នេះ បានបង្កើនការភ័យខ្លាចថា បណ្តាប្រទេសសហភាពអឺរ៉ុបផ្សេងទៀតរួមទាំងប្រទេសមហាអំណាចសេដ្ឋកិច្ច ដែលពឹងផ្អែកលើឧស្ម័នរបស់រុស្ស៊ីជាង ៥០% គឺ ប្រទេសអាល្លឺម៉ង់អាចក្លាយជាប្រទេសបន្ទាប់ ហើយបើវាកើតឡើងមែន នោះសេដ្ឋកិច្ចអាល្លឺម៉ង់ទំនងជារងទុក្ខមិនតិចនោះទេ ហើយវាក៏អាចប៉ះពាល់ដល់សេដ្ឋកិច្ចសហភាពអឺរ៉ុបទាំងមូលដែរ ដ្បិតថាអាល្លឺម៉ង់នេះ ជាប្រទេសមានសេដ្ឋកិច្ចធំជាងគេនៅប្លុកនេះ។
យ៉ាងណាមិញ ខណៈពេលដែលប៊ុលហ្គារី និងប៉ូឡូញបដិសេធចូលរួមជាមួយគម្រោងរបស់ទីក្រុងមូស្គូ ហើយមានការកាត់ផ្តាច់ការផ្គត់ផ្គង់ឧស្ម័នភ្លាមពីទីក្រុងមូស្គូ ប្រទេសអាល្លឺម៉ង់បានស្នើរសុំគណៈកម្មការសហភាពអឺរ៉ុប ដើម្បីអនុញ្ញាតឱ្យក្រុមហ៊ុនទិញឧស្ម័នរបស់ខ្លួនបង់ប្រាក់ជាប្រាក់រូប្ល តាមការទាមទាររបស់រុស្ស៊ីផងដែរ។
ក្រុមហ៊ុនអ៊ឺរ៉ុបជាច្រើនកំពុងប្រឈមមុខនឹងការផុតកំណត់ នៃការទូទាត់ឧស្ម័នរបស់រុស្ស៊ីនៅចុងខែនេះ សហភាពអឺរ៉ុប កំពុងខិតខំបញ្ជាក់អំពីវិធីសាស្ត្រមួយចំនួនទៅកាន់ក្រុមហ៊ុនទិញប្រេងពីរុស្ស៊ី ដែលពួកគេអាចបន្ដទិញប្រេងពីរុស្ស៊ីបាន ដោយមិនមានការបំពានទណ្ឌកម្មដែលបានដាក់ដោយសហភាពអឺរ៉ុបទៅលើរុស្ស៊ី។
ទីក្រុងមូស្គូនិយាយដោយសង្កត់ធ្ងន់ៗថា អ្នកទិញឧស្ម័នបរទេសធ្លាប់តែទូទាត់ប្រាក់អឺរ៉ូ ឬដុល្លារទៅក្នុងគណនីនៅធនាគារឯកជនរុស្ស៊ី Gazprombank ត្រូវតែផ្លាស់ប្តូរការទូទាត់ទៅជាប្រាក់រូប្ល។
អត្ថបទគួរអាន
គណៈកម្មកាអឺរ៉ុបបានប្រាប់ប្រទេសជាសមាជិករបស់ខ្លួនថា ការអនុវត្តទៅតាមការទាមទាររបស់រុស្ស៊ីនេះ គឺជាការបំពានទណ្ឌកម្មរបស់សហភាពអឺរ៉ុប ដែលបានដាក់លើប្រទេសមួយនេះ។ គណៈកម្មការអឺរ៉ុប បានស្នើដែរថា ប្រទេសសហភាពអឺរ៉ុប អាចធ្វើប្រតិបត្តិការទូទាត់ថ្លៃប្រេងបាន ប្រសិនបើពួកគេអាចបញ្ជាក់បានថា ការទូទូទាត់បានរួចរាល់នោះ គឺធ្វើឡើងជាប្រាក់អឺរ៉ូ ហើយមុននឹងវាត្រូវបានប្ដូរទៅជារូបិយបណ្ណរូប្លរបស់រុស្ស៊ី។
នៅពេលនេះ គណៈកម្មការអឺរ៉ុបកំពុងរៀបចំសេចក្ដីព្រៀងណែនាំលើការទូទាត់នេះ បន្ទាប់ពីប្រទេសជាច្រើនបានស្នើឲ្យមានការបញ្ជាក់ឲ្យបានលម្អិតពីវិធីសាស្ត្រនេះ។
គួរជម្រាបថា ការទូទាត់ជាប្រាក់រូប្លអាចជួយដល់សេដ្ឋកិច្ចរបស់រុស្ស៊ីពីផលប៉ះពាល់នៃទណ្ឌកម្មបាន ខណៈដែលចំណូលពីប្រេងឥន្ធនៈអាចជួយផ្តល់ហិរញ្ញប្បទានដល់ប្រតិបត្តិការយោធាលុកលុយនៅក្នុងប្រទេសអ៊ុយក្រែនបានបន្ថែមមួយកម្រិតទៀត។
បើគិតតាំងពីថ្ងៃដែលរុស្ស៊ីចូលឈ្លានពានអ៊ុយក្រែននៅថ្ងៃទី២៤កុម្ភៈ មកទល់ពេលនេះ ប្រទេសសហភាពអឺរ៉ុប បានទូទាត់ថ្លៃប្រេង និងឧស្ម័នទៅឲ្យរុស្ស៊ីក្នុងតម្លៃសរុបជាង៤៧ពាន់លានដុល្លារអាមេរិក ខណៈដែលរុស្ស៊ីមានចំណែកផ្គត់ផ្គង់ឧស្ម័ន ៤០% និង ប្រេង ២៦% ទៅសហភាពអឺរ៉ុប។
យ៉ាងណាមិញ គណៈកម្មាការអឺរ៉ុប នៅចុងខែនេះនឹងបង្ហាញពីផែនការ ដើម្បីបញ្ចប់ការពឹងផ្អែករបស់អឺរ៉ុបលើឥន្ធនៈហ្វូស៊ីលពីរុស្ស៊ីនៅត្រឹមឆ្នាំ ២០២៧ រួមទាំង ការពង្រីកថាមពលកកើតឡើងវិញ។ក្នុងនោះ ក្រសួងសេដ្ឋកិច្ចអាល្លឺម៉ង់កាលពីថ្ងៃអាទិត្យក៏បានអះអាងដែរថា ប្រទេសអាល្លឺម៉ង់ចង់សាងសង់កន្លែងចំនួន ៤ សម្រាប់ជំនួសកន្លែងស្តុកឧស្ម័នទាំងបី (FSRUs)របស់ខ្លួន ខណៈដែលខ្លួនព្យាយាមកាត់បន្ថយឧស្ម័នរុស្ស៊ីមកនៅត្រឹមសូន្យក្នុងរយៈពេល ២ ឆ្នាំខាងមុខ ជាមួយនឹងការជំនួសដោយប្រើឧស្ម័នធម្មជាតិរាវ (LNG) ដែលអាចមានប្រភពមកពីប្រទេសជាច្រើន៕
អត្ថបទ៖ វ៉ាន់ ស្រីរ័ត្ន
None
