គួរជម្រាបថា កាលពីសប្តាហ៍មុននេះ យោធាអ៊ុយក្រែនបានវាយរុញច្រានកងទ័ពរុស្សីឲ្យដកថយ និងវាយដណ្តើមបានមកវិញនូវទឹកដី និងទីក្រុងសំខាន់ៗនៅភាគឦសានក្នុងតំបន់ Kharkiv នៃប្រទេស ខណៈដែលផ្ទៃក្នុងនៃរដ្ឋាភិបាលលោក ពូទីន ត្រូវបានគេសង្កេតឃើញថា កំពុងមានការរង្គោះរង្គើដោយសារភាពបរាជ័យផ្ទួនៗនៃយោធាខ្លួន។
កាលពីពេលមុន លោកពូទីនបានព្រមានម្តងរួចហើយថា ទីក្រុងមូស្គូនឹងឆ្លើយតបជាមួយមធ្យោបាយនឹកស្មានមិនដល់ ប្រសិនបើកងទ័ពរបស់ខ្លួនត្រូវបានដាក់សម្ពាធម្តងហើយម្តងទៀត ដោយគេអាចសម្មតថា លោកអាចប្រើមធ្យោបាយមិនធម្មតា ដូចជាការប្រើអាវុធនុយក្លេអ៊ែរកម្រិតតូច ឬអាវុធគីមីជាដើម។
នៅក្នុងបទសម្ភាសន៍៦០នាទី លោកចូ បៃដិន ប្រធានាធិបតិអាមេរិកបានព្រមានថា បើប្រធានាធិបតីរុស្ស៊ី លោក ពូទីន ពិចារណាប្រើវាមែននោះ វានឹងផ្លាស់ប្តូរបរិបទនៃសង្គ្រាមចាប់តាំងពីសង្គ្រាមលោកលលើកទី២ ហើយអាមេរិកនឹងឆ្លើយតបវិញជាមួយ «ផលវិបាក» កម្រិតធ្ងន់ តែលោកមិនបានបញ្ជាក់លម្អិតជាអ្វីនោះទេ។
លោកបានបន្ថែមថា «ប្រទេសរុស្សីនឹងក្លាយរដ្ឋដ៏ឯកោបំផុតដែលខ្លួនមិនធ្លាប់ជួបប្រទះ» ហើយសហរដ្ឋអាមេរិកនឹងនៅចាំឆ្លើយតបអ្វីដែលម៉ូស្គូត្រៀមធ្វើសកម្មភាពនោះ។
យ៉ាងណាមិញ មន្ត្រីរដ្ឋាភិបាលរុស្ស៊ីបានច្រានចោលការលើកឡើងរបស់លោកខាងលិចដែលថា ទីក្រុងមូស្គូនឹងប្រើប្រាស់អាវុធនុយក្លេអ៊ែរយុទ្ធសាស្ត្រនៅក្នុងសង្គ្រាមជាមួយអ៊ុយក្រែន ប៉ុន្តែវានៅតែជាកង្វល់ចាក់ស្រេះសម្រាប់ប្រទេសលោកខាងលិច ក្រោយពីការឃើញការបរាជ័យដ៏អាម៉ាស់ម្តងហើយម្តងទៀតរបស់យោធារុស្សី។
អត្ថបទគួរអាន
គេក៏នៅចាំមិនភ្លិចដែរថា នៅក្នុងសុន្ទរកថាដែលប្រកាសពីការឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈ លោកពូទីនបានបញ្ជូនយ៉ាងច្បាស់ថា «ប្រសិនបើប្រទេសលោកខាងលិចធ្វើអន្តរាគមន៍យោធាក្នុង «ប្រតិបត្តិការយោធាពិសេស» របស់ខ្លួននោះ លោកនឹងជ្រើសយកការឆ្លើយតបវិញដ៏ខ្លាំងក្លាបំផុត ដែលលោកទំនងជាចង់គំរាមពីការប្រើនុយក្លេអ៊ែរ ដែលវាជាផលវិបាកដែលមិនធ្លាប់មានក្នុងប្រវត្តិសាស្ត្រមនុស្សជាតិ។
ជាមួយគ្នានេះ ជម្រើសផ្សេងទៀតសម្រាប់លោក ពូទីន អាចធ្វើការប្រមែប្រមូល និងកៀរគរកងទ័ពបម្រុងរបស់រុស្សី ដែលមានចំនួនប្រហែល ២លាននាក់ និងដាក់សម្ពាធអឺរ៉ុបឲ្យឈប់ផ្តល់ជំនួយឲ្យកងកម្លាំងអ៊ុយក្រែន ដោយបង្កកការនាំចូលថាមពលទៅកាន់តំបន់អឺរ៉ុបទាំងមូលនៅរដូវរងានាពេលខាងមុខនេះ។
ស្របពេលជាមួយគ្នានេះដែរ ក្រោយពីការបាក់ទ័ព និងដកថយពីការវាយបកដោយកងទ័ពអ៊ុយក្រែននោះ ក្រសួងការពារជាតិរុស្ស៊ី កាលពីថ្ងៃសៅរ៍ ទី ១៧ នេះ បាននិយាយថា កងកម្លាំងរបស់ខ្លួនបានបើកការវាយប្រហារលើទីតាំងរបស់អ៊ុយក្រែនដែលដណ្តើមបាននោះមកវិញ ហើយបានចោទប្រកាន់ទីក្រុងកៀវ (Kyiv) ថាបានបាញ់ផ្លោងនៅជិតរោងចក្រថាមពលនុយក្លេអ៊ែរហ្សាពូរីហ្សៀ (Zaporizhzhia) ផងដែរ។
យោងតាមក្រសួងការពារជាតិរុស្សីបានឱ្យដឹងថា កងកម្លាំងរុស្ស៊ីបានធ្វើការវាយប្រហារនៅក្នុងតំបន់ Kherson, Mykolaiv, Kharkiv និង Donetsk ហើយខ្លួនបានន្ថែមថា កងកម្លាំងអ៊ុយក្រែនបានធ្វើការវាយលុកតបដែរ តែមិនបានសម្រេចនៅជិតស្រុកប្រាវដីន (Pravdyne) ក្នុងខេត្ត Kherson៕
