សហភាពអឺរ៉ុបគ្រោងបង្កើតបណ្ណឆ្លងដែនពិសេសដើម្បីសម្គាល់អ្នកបានចាក់វ៉ាក់សាំងកូវីដរួចអាចចេញធ្វើដំណើរបាន

ប្រធានគណៈកម្មការសហភាពអឺរ៉ុបបានឲ្យដឹងថា គោលដៅនៃការបង្កើតបណ្ណពិសេសនេះឡើង ដើម្បីអាចសម្គាល់បុគ្គលទាំងឡាយណា ដែលបានធ្វើតេស្តឃើញអវិជ្ជមានកូវីដ-១៩ និង បានចាក់វ៉ាក់សាំងរួចរាល់។ ដូចនេះ ពួកគេអាចធ្វើដំណើរឆ្លងប្រទេសដោយមានសុវត្ថិភាព និងមិនចាំបាច់ឆ្លងកាត់ការធ្វើតេស្ត ឬតម្រូវឲ្យស្នាក់នៅដាច់ដោយឡែករយៈពេល ១៤ថ្ងៃទៀតនោះទេ។

គណៈកម្មការអឺរ៉ុបនឹងសម្រេចនូវផែនការនេះឲ្យបានក្នុងដំណាច់ខែមីនានេះ។

យ៉ាងណាមិញ ប្រធានគណៈកម្មការសុខភាពសាធារណៈនៃសហភាពអឺរ៉ុបក៏បានសម្តែងក្តីបារម្ភដោយហេតុថា គេមិនទាន់ដឹងច្បាស់ថា តើមនុស្សដែលចាក់វ៉ាក់សាំងហើយ នៅតែអាចចម្លងវីរុស ទៅអ្នកដទៃបាន ឬមិនបាន។

ជាមួយគ្នានោះ ប្រទេសមួយចំនួនទៀតដូចជា បារាំង និងបែលហ្ស៊ិកក៏បានបង្ហាញការព្រួយបារម្ភផងដែរថា ការបន្ធូរបន្ថយការធ្វើដំណើរសម្រាប់តែអ្នកមានបណ្ណឆ្លងដែនពិសេស និងបង្កើតឲ្យមានការរើសអើង និងជាពិសេស គឺអយុត្តិធម៌សម្រាប់ប្រជាជនក្រីក្រ។

ជាការឆ្លើយតប គណៈកម្មការអឺរ៉ុបបានលើកឡើងថា ខ្លួននឹងខិតខំរៀបចំ ធ្វើយ៉ាងណាកុំឲ្យមានការរើសអើង ពីពលរដ្ឋដែលមិនបានទទួលវ៉ាក់សាំង និងបណ្ណពិសេសនេះ៕