ក្រោយពីមានការប្រជុំកំពូលរយៈពេល២ថ្ងៃនៅទីក្រុងប្រ៊ុចសែល នាដើមសប្ដាហ៍នេះ មេដឹកនាំប្រទេសក្នុងតំបន់អឺរ៉ុប បានសម្រេចយល់ព្រមសន្យាបន្ដកិច្ចខិតខំប្រឹងប្រែង បង្កើនសមត្ថភាពផលិតកម្មវ៉ាក់សាំងនៅក្នុងសកលលោក ដើម្បីឆ្លើយតបបានបានគ្រប់គ្រាន់ទៅនឹងតម្រូវការ។
ក្រុមមេដឹកនាំអឺរ៉ុប ក៏បានអំពាវនាវផងដែរថា ត្រូវបង្កើនការងារដើម្បីធានាថា ការទទួលបានវ៉ាក់សាំងកូវីដ-១៩ជាសកលមានភាពស្មើគ្នា ហើយពួកគេក៏បានបញ្ជាក់ពីជំហរគាំទ្ររបស់អឺរ៉ុបសម្រាប់កម្មវិធី Covax របស់អង្គការសហប្រជាជាតិ ខណៈដែលកម្មវិធីនេះ គឺមានបំណងធានាឲ្យបាននូវការទទួលបានវ៉ាក់សាំងប្រកបដោយសមធម៌ សម្រាប់ប្រទេសចំណូលទាប និងប្រទេសចំណូលមធ្យម។
ការសម្រេចយល់ព្រមចែករំលែកវ៉ាក់សាំងមកដល់ប្រទេសក្រីក្រនេះ ក៏ដោយសារតែអឺរ៉ុប រំពឹងថានៅចុងខែកញ្ញាខាងមុខនេះ ខ្លួននឹងទទួលបានវ៉ាក់សាំងរហូតដល់ទៅ ជាង១ពាន់លានដូសឯណោះពីក្រុមហ៊ុនផលិតវ៉ាក់សាំងធំៗចំនួន៤របស់ពិភពលោក។ ជាមួយគ្នានេះ នៅចុងរដូវក្ដៅនេះ អឺរ៉ុបសង្ឃឹមថា នឹងអាចចាក់វ៉ាក់សាំងដល់ពលរដ្ឋពេញវ័យរបស់ខ្លួនដល់ទៅ ៧០% នៃពលរដ្ឋពេញវ័យសរុប។
អត្ថបទទាក់ទង!
តាមការរំពឹងទុក នៅត្រីមាសទី២នេះ អឺរ៉ុបនឹងទទួលបានវ៉ាក់សាំងជាង ៤០០លានដូស ហើយនឹងបន្ដមកដល់ជាង ៥០០លានដូសទៀតនៅត្រីមាសទី៣ ខណៈដែលកាលពីត្រីមាសទី១អឺរ៉ុបទទួលបានវ៉ាក់សាំងជាង១០០លានដូសរួចហើយដែរ។ ដូច្នេះ សរុបទៅរហូតដល់ចុងឆ្នាំនេះ អឺរ៉ុបរំពឹងទទួលបានវ៉ាក់សាំងប្រមាណ១ពាន់៥រយលានដូស។
ក្រុមមេដឹកនាំអឺរ៉ុប បានទទួលស្គាល់ថា ការចាក់វ៉ាក់សាំងរបស់ពួកគេ គឺមានភាពយឺតយ៉ាវ ក្នុងការទទួលបានពីអ្នកផ្គត់ផ្គង់ ធៀបនឹងអាមេរិក អង់គ្លេស និង អ៊ីស្រាអែល ដែលទទួលបានជោគជ័យច្រើនលើការចាក់វ៉ាក់សាំងនេះ។
លោកស្រី អ៊ូសូឡា វ័នឌឺ លីយិន ប្រធានគណៈកម្មការអឺរ៉ុប បានលើកឡើងថា វ៉ាក់សាំង ៣០០លានដូស នឹងត្រូវបានចែកចាយនៅក្នុងតំបន់អឺរ៉ុបនៅត្រឹមចុងខែឧសភា ដោយមានពលរដ្ឋ ៤៦% នៃពលរដ្ឋពេញវ័យសរុបបានចាក់វ៉ាក់សាំងដូសទី១ ខណៈដែលនៅតំបន់អឺរ៉ុបមានពលរដ្ឋសរុបប្រមាណ ៤៥០លាននាក់។
ទោះយ៉ាងណាក៏ដោយចុះ យុទ្ធនាការចាក់វ៉ាក់សាំងនៅបន្ដធ្វើឡើងនៅក្នុងប្រទេសលោកខាងលិច ប៉ុន្ដែប្រទេសក្រីក្រវិញ កំពុងប្រឈមនឹងការរាំងស្ទះក្នុងការទទួលបានការផ្គត់ផ្គង់វ៉ាក់សាំង។ ថ្លែងនៅក្នុងកិច្ចប្រជុំកាលពីសប្ដាហ៍មុន លោក ម៉ារីអូ ដ្រាជី នាយករដ្ឋមន្ត្រីអ៊ីតាលី បាននិយាយថា មានវ៉ាក់សាំងជិត១ពាន់៥រយលានដូសហើយ ដែលត្រូវបានចាក់នៅក្នុងប្រទេសចំនួន១៨០ ប៉ុន្ដែ ក្នុងនោះ មានតែ០,៣%ប៉ុណ្ណោះ ដែលបានចាក់នៅក្នុងប្រទេសចំណូលទាប និងមធ្យម ខណៈដែលប្រទេសអ្នកមានវិញបានចាក់ដល់ទៅ ៨៥%ទៅហើយ។
សូមបញ្ជាក់ថា សហភាពអឺរ៉ុប មានផែនការនឹងបើកឲ្យមានការធ្វើដំណើរឆ្លងដែននៅក្នុងតំបន់របស់ខ្លួន ចាប់ពីថ្ងៃទី១ខែមិថុនាតទៅ។ សម្រាប់ផែនការនេះ អ្នកដែលបានចាក់វ៉ាក់កូវីដ-១៩បានរួចរាល់ នឹងអាចចេញធ្វើដំណើរឆ្លងដែនក្នុងតំបន់អឺរ៉ុបបាន ហើយអ្នកដែលធ្វើតេស្ដរកកូវីដ-១៩ លទ្ធអវិជ្ជមាន ឬអ្នកដែលបានជាសះស្បើយពីកូវីដ-១៩ ក៏នឹងត្រូវបានអនុញ្ញាតឲ្យធ្វើដំណើរដូចគ្នាដែរ៕
None
