បន្ថែមពីលើនេះ សហភាពអឺរ៉ុបនៅតែដើរតួនាទីសំខាន់ ផ្គត់ផ្គង់សព្វាវុធសម្រាប់អ៊ុយក្រែន ជាក់ស្តែងសហភាពអឺរ៉ុបបានសម្រេចបង្កើនកញ្ចប់ថវិកាទ្វេមួយជាពីរសម្រាប់ផ្តល់ជំនួយសព្វាវុធដល់អ៊ុយក្រែនរហូតដល់ ១ពាន់លានដុល្លារហើយគិតមកទល់ពេលនេះ។
នៅក្នុងកិច្ចប្រជុំកំពូលរបស់សហភាពអឺរ៉ុបនាទីក្រុង វែសៃ(Versailles) ប្រទេសបារាំងរយៈពេលពីថ្ងៃកាលពីចុងសប្តាហ៍មុននេះ ថ្នាក់ដឹកនាំសហភាពអឺរ៉ុបបានប្រកាសច្បាស់ៗថា មេដឹកនាំនៃរដ្ឋសមាជិកទាំងអស់បានយល់ព្រមលើកញ្ចប់ទឹកប្រាក់ជាង ៥៤៥ លានដុល្លារផ្សេងទៀត បន្ថែមពីលើទឹកប្រាក់ជាង៥៤៥ លានដុល្លារដែលគេបានយល់ព្រមកាលពីលើកមុន សម្រាប់ជំនួយយោធាដើម្បីជួយអ៊ុយក្រែនក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី ។
សរុបទាំងពីរលើកនេះ អ៊ុយក្រែននឹងទទួលបានជំនួយយោធាដែលគិតជាទឹកប្រាក់ជាង ១ពាន់លានអឺរ៉ូ ឬស្មើនឹងជិត ១ពាន់១រយលានដុល្លារអាមេរិកពីប្លុកប្រទេសទាំង២៧។ យ៉ាងណាមិញទឹកប្រាក់ទាំងនេះ មិនបានផ្តល់ឲ្យដោយត្រង់ទៅរដ្ឋាភិបាលទីក្រុងកៀវនោះទេ ដោយមួយចំនួនធំ នឹងត្រូវយកទៅសងរដ្ឋនីមួយៗដែលបានបញ្ចេញអាវុធក្នុងស្តុកទៅជួយអ៊ុយក្រែនកន្លងមក។
អត្ថបទគួរអាន
រដ្ឋាភិបាលរបស់លោក ហ្សេនលេនស្គី បានស្នើសុំចំៗថា សូមប្រគល់សព្វាវុធណាដែលស្រួលប្រើប្រាស់ និងដែលកងទ័ពអ៊ុយក្រែនអាចចេះប្រើប្រាស់បាន ដូចមានមីស៊ីលបាញ់យន្តហោះ មីស៊ីលប្រឆាំងរថក្រោះជាដើម។
គួរជម្រាបថា នេះជាកញ្ចប់ថវិកាដ៏ធំ និងជាប្រវត្តិសាស្ត្រហើយរបស់សហភាពអឺរ៉ុប ដែលយកទៅប្រើប្រាស់ក្នុងជំនួយក្របខណ្ឌយោធា។ ទោះបីប្រទេសទាំង២៧នៃសហភាពអឺរ៉ុបបានយ់ស្របគ្នាក្នុងការផ្តល់ជំនួយឲ្យអ៊ុយក្រែន ប៉ុន្តែគេមិនបាន និយាយពីរឿងឲ្យអ៊ុយក្រែនចូលជាសមាជិកសហភាពអឺរ៉ុបឡើយ ពោលបេក្ខភាពរបស់ទីក្រុងកៀវក្នុងសហភាពគឺបន្តស្ថិតក្នុងភាពស្រពិចស្រពិល និងនៅតែអាចអូសបន្លាយពេលយូរដដែល។
ក្រៅពីសហភាពអឺរ៉ុប ក៏មានដែរសហរដ្ឋអាមេរិក កំពុងប្រញាប់ប្រញាល់ស្វែងរកទឹកប្រាក់ជាច្រើនលានដុល្លារ ក្នុងជំនួយសព្វាវុធបន្ថែមទៀតដល់អ៊ុយក្រែន។ ជាក់ស្តែងនៅថ្ងៃសៅរ៍សប្តាហ៍មុនប្រធានាធិបតីអាមេរិក លោកចូ បៃឌិន បានសន្យាថាលោកនឹងព្យាយាមស្នើសុំទឹកប្រាក់២០០លានដុល្លារបន្ថែមពីលើទឹកប្រាក់ដែលផ្ដល់ជូនលើកមុនៗ សម្រាប់ទំនុកបម្រុងអាវុធដល់អ៊ុយក្រែន។
ការសម្រេចចិត្តរបស់វ៉ាស៊ីនតោនលើកនេះ បាននាំឲ្យជំនួយយោធាសរុបរបស់សហរដ្ឋអាមេរិក ដែលបានផ្តល់ដល់អ៊ុយក្រែន កើនដល់ ១ពាន់២រយលានដុល្លារ គិតចាប់តាំងពីខែមករា ឆ្នាំ ២០២១ និងបានកើនដល់ទៅ ៣ពាន់២រយលានដុល្លាររាប់គិតតាំងពីឆ្នាំ ២០១៤ នៅពេលដែលប្រទេសរុស្ស៊ីបានកាត់យកតំបន់គ្រីមៀរបស់អ៊ុយក្រែន។
គួរជម្រាបដែរថា អាមេរិកជាអ្នកផ្គត់ផ្គង់សព្វាវុធ និងជំនួយមនុស្សធម៌សំខាន់មួយដែរសម្រាប់អ៊ុយក្រែនបន្ទាប់ពីសហភាពអឺរ៉ុប។ ជាក់ស្ដែងកាលពីសប្តាហ៍មុន សភាអាមេរិកបានអនុម័តទឹកប្រាក់ជាង ១៣ពាន់លានដុល្លារសម្រាប់ជំនួយសង្គ្រោះបន្ទាន់ដល់អ៊ុយក្រែន។
សង្គ្រាមដែលអូសបន្លាយពេលអស់ជិត២០ថ្ងៃមកនេះ មិនមានសញ្ញាថមថយនោះឡើយ មានតែការវាយប្រហារថែម។ កងទ័ពរុស្ស៊ីកំពុង សម្រុកវាយខ្លាំងនៅរដ្ឋធានី និងទីក្រុងធំៗនៅភាគខាងកើត និងខាងត្បូងប្រទេស។ ទាហានរុស្ស៊ីបានរុលមកដល់កាន់តែកៀកមាត់ច្រកចូលក្រុងនៅទិសខាងកើតនៃរដ្ឋធានីកៀវ ហើយបានចាប់វាយប្រហារលើទីតាំងការពារអ៊ុយក្រែន នៅខាងលិច និងខាងជើងរដ្ឋធានីបន្ថែមទៀត ក្នុងបំណងឡោមព័ទ្ធបិទខ្ទប់ក្រុងកៀវតែម្តង។
ប្រធានាធិបតីអ៊ុយក្រែនលោកហ្សេលេនស្គី បានព្រមាននៅថ្ងៃអាទិត្យម្សិលមិញថា កងកម្លាំងរុស្ស៊ីនឹងប្រឈមមុខនឹងការប្រយុទ្ធគ្នាជាមួយទ័ពអ៊ុយក្រែន រហូតដល់ស្លាប់តែម្តង ប្រសិនបើពួកគេព្យាយាមកាន់កាប់រដ្ឋធានីកៀវ ព្រោះថា ពួកគេនឹងតស៊ូដល់ដង្ហើមចុងក្រោយ៕
None
