លោក ឌិន សុមេធារិទ្ឋ ប្រធានសហព័ន្ឋទេសចរណ៍កម្ពុជាបានគូសបញ្ជាក់ថា ក្រុមប្រតិបត្តិករទេសចរណ៍ឥណ្ឌា បានចាប់ផ្តើមរៀបចំកញ្ចប់ទេសចរណ៍មកកម្ពុជាបណ្តើរៗហើយ ដើម្បីស្វែងរកកិច្ចសហការ និងវិនិយោគលើវិស័យបដិសណ្ឋារកិច្ច និងទេសចរណ៍នៅកម្ពុជា។ បើតាមអ្នកជំនាញរូបនេះ មានក្រុមហ៊ុនចំនួន២ ដែលពួកគេទទួលបានជោគជ័យរួចហើយលើការវិនិយោគនៅប្រទេសផ្សេងៗ ក្នុងការរៀបចំកញ្ចប់ទស្សនកិច្ចនាំភ្ញៀវទេសចរណ៍ឥណ្ឌា ចេញដើរកម្សាន្តនៅក្រៅប្រទេស ដូច្នេះហើយក្រុមហ៊ុនទាំង២នេះ នឹងមកស្វែងរកឱកាសវិនិយោគនៅប្រទេសកម្ពុជា ដើម្បីនាំភ្ញៀវទេសចរឥណ្ឌាចូលមកកម្ពុជា ហើយពួកគេ ក៏ចង់វិនិយោគលើវិស័យភោជនីយដ្ឋាន និងសណ្ឋាគារនៅកម្ពុជាផងដែរ។
បើតាម លោក ឌិន សុមេធារិទ្ឋ សក្តានុពលនៃវិស័យទេចរណ៍កម្ពុជា ដែលទាក់ទាញភ្ញៀវឥណ្ឌាឱ្យចូលមកនោះ គឺដោយសារប្រទេសឥណ្ឌា មិនមានកាស៊ីណូ ដូច្នេះហើយទេសចរឥណ្ឌាមួយចំនួនពួកគេចូលមកដើម្បីចូលលេងកាស៊ីណូ និងមកកម្សាន្តនៅកម្ពុជា ដើម្បីទស្សនាប្រាសាទបុរាណនៅខេត្តសៀមរាប និងសមុទ្រនៅខេត្តព្រះសីហនុ ជាដើម។ យ៉ាងណាមិញ ស្របពេលដែលកម្ពុជានិងឥណ្ឌា នឹងបើកការហោះហើរត្រង់រវាងគ្នានៅខែមិថុនា ខាងមុខនេះផងនោះ អ្នកជំនាញរូបនេះ ជឿជាក់ថា កម្ពុជានឹងអាចទាក់ទាញភ្ញៀវទេសចរឥណ្ឌាចូលមកកាន់តែច្រើនផងដែរនៅឆ្នាំ២០២៤នេះ។
អត្ថបទគួរអាន
ជាមួយគ្នានេះ លោក ធួន ស៊ីណាន ប្រធានសមាគមទេសចណ៍អាស៊ីប៉ាស៊ីហ្វិកកម្ពុជា បានចាត់ទុកទីផ្សារទេសចណ៍ឥណ្ឌា គឺជាទីផ្សារទេសចរណ៍ធំទី២ បន្ទាប់ពីទីផ្សារចិន ដែលបានចូលរួមក្នុងការអភិវឌ្ឍសេដ្ឋកិច្ចទេសចរណ៍សកល។ ដូច្នេះហើយ នៅពេលដែលមានការបើកការតភ្ជាប់ជើងហោះហើរត្រង់រវាងកម្ពុជា-ឥណ្ឌា នៅពេលខាងមុខនេះ អ្នកជំនាញរូបនេះ មានក្តីរំពឹងខ្ពស់ និងជឿជាក់ថា តាមរយៈការបើកការហោះហើរត្រង់នេះ វាជាក្តីសង្ឈឹមថ្មីមួយសម្រាប់អ្នករកស៊ីក្នុងវិស័យទេសចណ៍ និងជួយជំរុញវិស័យទេសចរណ៍កម្ពុជា ឱ្យកាន់តែមានភាពល្អប្រសើរឡើងវិញផងដែរ។
បើតាមឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បើគ្មានការប្រែប្រួលទេ កម្ពុជា-ឥណ្ឌានឹងបើកការហោះហើរត្រង់រវាងគ្នានៅថ្ងៃទី១៦ ខែមិថុនា ឆ្នាំ២០២៤ ខាងមុខនេះ ជាមួយការហោះហើរក្នុង១សប្តាហ៍ចំនួន៤ជើង។ មន្ត្រីជាន់ខ្ពស់រូបនេះ បានគូសបញ្ជាក់ដែរថា តាមរយៈការតភ្ជាប់នេះ វានឹងកាន់តែផ្តល់ភាពងាយស្រួលជាងមុន ក្នុងការជួយជំរុញការផ្លាស់ប្តូរជាវិជ្ជមានសម្រាប់វិស័យទេសចរណ៍ វិនិយោគ និងទំនាក់ទំនងការទូតផ្សេងៗផងដែរ៕
None
