គោលនយោបាយគ្មានកូវីដ១៩ ឬកូវីដ១៩ស្មើសូន្យរបស់រដ្ឋអំណាចទីក្រុងប៉េកាំង ត្រូវបានគេមើលឃើញថា ទំនងជាបានដាក់សម្ពាធទៅលើកំណើនសេដ្ឋកិច្ចសកល តាមរយៈការប៉ះពាល់ដល់ខ្សែចង្វាក់ផ្គត់ផ្គង់ ដែលបន្តអូសបន្លាយអស់ពេលជាច្រើនឆ្នាំមកហើយ។ ប្រការនេះនឹងរុញច្រានឲ្យអតិផរណា មានអត្រាកាន់ខ្ពស់ទៅៗផងដែរ។ នេះបើតាមការអះអាងដោយអ្នកបង្កើតគោលនយោបាយរបស់ធនាគារកណ្តាលជប៉ុន ដែលត្រូវបានចុះផ្សាយដោយសារព័ត៌មាន South China Morning Post។
សមាជិកក្រុមប្រឹក្សាភិបាលធនាគារកណ្តាលជប៉ុន លោក Toyoaki Nakamura បាននិយាយនៅក្នុងសុន្ទរកថាមួយថា ចិនជាប្រទេសដែលមានសេដ្ឋកិច្ចរីកលូតលាស់ធំ ហើយក៏ជាក្បាលម៉ាស៊ីនដឹកនាំសេដ្ឋកិច្ចពិភពលោក ពិសេសលើផ្នែកទីផ្សារ និងឧស្សាហកម្ម។ ដូច្នេះគោលនយោបាយ គ្មានកូវីដ១៩របស់រដ្ឋអំណាចប៉េកាំង ពិសេសនៅអំឡុងពេលមានការរាតត្បាតនៃកូវីដ១៩អូមីក្រុងស្រាប់ផងនោះ អាចជះឥទ្ធិពលអវិជ្ជមានដល់កំណើនសេដ្ឋកិច្ចពិភពលោក ក៏ដូចជាអាចធ្វើឲ្យខ្សែចង្វាក់ផ្គត់ផ្គង់ដែលកំពុងតែយ៉ាប់យឺនស្រាប់ផងនោះ កំពូងជួបហានិភ័យកាន់តែខ្លាំង។ ជាមួយគ្នានេះ វាក៏អាចធ្វើឲ្យអត្រាអតិផរណាបន្តកើនឡើងផងដែរ។
អត្ថបទគួរអាន
ការអះអាងបែបនេះ ធ្វើឡើងស្របពេលដែលមូលនិធិរូបិយវត្ថុអន្តរជាតិ IMF តាមរយៈលោកស្រី គ្រីស្តាលីណា ចចហ្សីវ៉ា (Kristalina Georgieva) បានព្រមានទៅកាន់ប្រទេសចិន គួរតែគិតគូឡើងវិញពីការអនុវត្តគោលនយោបាយគ្មានកូវីដ១៩មួយនេះ ដើម្បីបន្ធូរបន្ថយភាពតានតឹងខាងខ្សែចង្វាក់ផ្គត់ផ្គង់។
គួរជម្រាបថា ចិនជាប្រទេសមានសេដ្ឋកិច្ចជឿនលឿនតែមួយគត់ ដែលនៅបន្តប្រកាន់ខ្ជាប់នូវគោលនយោបាយតឹងរ៉ឹងបំផុត ដើម្បីទប់ស្កាត់ជំងឺរាតត្បាតកូវីដ១៩។ ប៉ុន្តែយក្សសេដ្ឋកិច្ចលេខ២របស់ពិភពលោកមួយនេះ នៅតែអាចសម្រេចបានកំណើនសេដ្ឋកិច្ច ៨,១% កាលពីឆ្នាំ២០២១ ទោះបីមានការដាក់ចេញវិធានការបិទខ្ទប់ ជាអន្លើៗក្តី។
ទោះយ៉ាងណា កំណើននេះ មិនមែនជាកំណើនថេរនោះទេ ដោយសេដ្ឋកិច្ចរបស់ចិន បានបង្ហាញពីកំណើនយឺតខុសពីការរំពឹងទុក ចាប់ពីពាក់កណ្តាលឆ្នាំ២០២១ ពោលគឺចាប់ពីដើមត្រីមាសទី៣មកម្ល៉េះ។
ទោះបីជាយ៉ាងនេះក្តី អាជ្ញាធរក្រុងប៉េកាំង នៅតែបន្តជឿជាក់លើគោលនយោបាយរបស់ខ្លួន និងព្រមទាំងធ្លាប់បានអះអាងថា គ្មានវិធីសាស្ត្រអ្វីដែលអាចទប់ស្កាត់កូវីដ១៩មានប្រសិទ្ធិភាពល្អជាងអ្វីដែលប៉េកាំងបានធ្វើកន្លងមកនោះទេ។ រដ្ឋអំណាចចិនប្តេជ្ញាអនុវត្តគោលនយោបាយនេះបន្តទៀត ខណៈសហគមន៍អន្តរជាតិ មើលឃើញថា វាពិតជាប្រសើរសម្រាប់ការទប់ស្កាត់កូវីដ១៩ ប៉ុន្តែចំពោះវិស័យសេដ្ឋកិច្ច ទំនងជាអាចផ្តល់ភាពអវិជ្ជមានច្រើនជាង។
អ្នកជំនាញផ្នែកជំងឺឆ្លងអាមេរិក លោកវេជ្ជបណ្ឌិត Michael Osterholm បាននិយាយនាពេលថ្មីៗនេះដែរ វិធានការគ្មានកូវីដរបស់ប្រទេសចិន នឹងមិនអាចដាក់កម្រិតលើករណីឆ្លងខ្ពស់នៃមេរោគអូមីក្រុងបានទេ ព្រោះថា អូមីក្រុង គឺមិនដូចជាមេរោគកូវីដ១៩ដទៃទៀតនោះឡើយ។ អ្នកជំនាញផ្នែកជំងឺឆ្លងអាមេរិករូបនេះ បានសង្កត់ធ្ងន់ទៀតថា ការព្យាយាមបញ្ឈប់អូមីគឺដូចជា ព្យាយាមបញ្ឈប់ខ្យល់កុំឲ្យបោកបក់អ៊ីចឹងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
