ទោះយ៉ាងណា អ្នកជំនាញចាត់ទុកការលើកលែងការធ្វើចត្តាឡីស័កសម្រាប់អ្នកដំណើរចូលកម្ពុជាដែលបានចាក់វ៉ាក់សាំងរួច គឺជាសញ្ញាល្អមួយក្នុងការស្តារ និងជំរុញទីផ្សារខុនដូនៅកម្ពុជាឲ្យមានភាពល្អប្រសើរឡើងវិញ។ ព្រោះយន្តការនេះ វានឹងជួយទាក់ទាញវិនិយោគិនបរទេសឲ្យមកសំឡឹងរកឱកាសវិនិយោគលើវិស័យនេះនៅកម្ពុជាឡើងវិញ។
អគារខុនដូ ឬអគារសហកម្មសិទ្ធិអាចចាត់ទុកជាវិស័យមួយដែលបានរងផលប៉ះពាល់ខ្លាំងជាងគេក្នុងអំឡុងនៃវិបត្តិជំងឺកូវីដ-១៩ ហើយមកទល់ពេលនេះមិនទាន់មានសញ្ញាវិជ្ជមានងើបឡើងវិញនៅឡើយទេ។ លោក ងួន ឆាយលាង នាយកប្រតិបត្តិនៃក្រុមហ៊ុន Pointer បានគូសបញ្ជាក់ថា ទីផ្សារលក់ខុនដូមិនទាន់មានការប្រែប្រួលគួរឲ្យកត់សម្គាល់នោះទេ តាំងពីរាជរដ្ឋាភិបាលកម្ពុជា ប្រកាសបើកប្រទេសលើគ្រប់វិស័យឡើងវិញមកដល់ពាក់កណ្តាលខែវិច្ឆិកានេះ។ ទោះយ៉ាងណា លោក រំពឹងថា លំហូរវិនិយោគិនបរទេសចូលមកស្វែងរកឱកាសវិនិយោគលើវិស័យនេះនៅកម្ពុជានឹងចាប់ផ្តើមមានចរន្តឡើងវិញ ក្រោយរាជរដ្ឋាភិបាលសម្រេចលើកលែងការធ្វើចត្តាឡីស័កចំពោះអ្នកដំណើរចូលមកកម្ពុជា ដែលបានចាក់វ៉ាក់សាំងរួច។ បើតាមអ្នកជំនាញរូបនេះអះអាងថា បច្ចុប្បន្នតម្លៃខុនដូហាក់នៅទ្រឹងដដែល មិនមានការប្រែប្រួលនោះឡើយ។អត្ថបទគួរអាន
ពាក់ព័ន្ធទីផ្សារខុនដូនេះដែរ ឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL សង្កេតឃើញថា ចរន្តនៃការទិញ-លក់ខុនដូមានធ្លាក់ចុះគួរឲ្យកត់សម្គាល់ក្នុងអំឡុងនៃវិបត្តិកូវីដ-១៩ក្រោយមានការរឹតបន្តឹងលើវិធានការមួយចំនួន និងការបិទជើងហោះហើរនៅតាមបណ្តាប្រទេសមួយចំនួន រួមទាំងកម្ពុជា។ ព្រោះទីផ្សារខុនដូនៅកម្ពុជាបច្ចុប្បន្នភាគច្រើនពឹងផ្អែកលើជនបរទេស ខណៈទំនោរជនជាតិខ្មែរចូលចិត្តរស់នៅតាមផ្ទះដែលមានទីធ្លារធំទូលាយ និងនៅផ្ទាល់ដី ដោយសារកម្ពុជានៅសល់ដីទំនេរច្រើន។ ប៉ុន្តែអ្នកជំនាញមានបទពិសោធន៍ជាង២០ឆ្នាំក្នុងវិស័យអចលនទ្រព្យរូបនេះជឿជាក់ថា ទៅថ្ងៃអនាគតទីផ្សារខុនដូ ដែលអាចនឹងជាវិស័យដ៏មានសក្តានុពលនៅកម្ពុជា នឹងគ្រប់ដណ្តប់ភាគច្រើនដោយអ្នកប្រើប្រាស់ក្នុងស្រុក។
យើងសង្កេតឃើញថា បច្ចុប្បន្នវិស័យខុនដូបាន និងកំពុងរីកដុះដាលយ៉ាងខ្លាំងនៅកម្ពុជា ជាពិសេសនៅរាជធានីភ្នំពេញ និងខេត្តព្រះសីហនុតែម្តង។ ខុនដូ និងអាផាតមិនអាចទុកជាវិស័យរងផលប៉ះពាល់ខ្លាំងជាងគេក្នុងចំណោមអចលនទ្រព្យផ្សេងៗក្នុងអំឡុងនៃវិបត្តិកូវីដ-១៩ ដោយសារខុនដូមានតម្លៃថ្លៃ គួបផ្សំនឹងការខ្សត់លំហូរចូលនៃជនជាតិបរទេសមកកម្ពុជា ដែលទីផ្សារធំសម្រាប់វិស័យមួយនេះ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
