នៅអំឡុងឈប់សម្រាប់បុណ្យអុំទូកកាលពីសប្ដាហ៍មុននេះ ពោលគឺគិតចាប់ពីថ្ងៃទី១៨ ដល់ថ្ងៃទី២១ ខែវិច្ឆិកា សម្ទុះកំណើនភ្ញៀវទេសចរផ្ទៃក្នុងបានហក់ឡើងដល់ទៅជាង ១លាននាក់ឯណោះ នៅតាមតំបន់រមណីយដ្ឋានទេសចរណ៍នានានៅទូទាំងប្រទេសកម្ពុជា ខណៈដែលថ្មីៗនេះទៀតសោតរាជរដ្ឋាភិបាលក៏បានបើកឲ្យទេសចរចាក់វ៉ាក់សាំងអាចធ្វើដំណើរចូលមកកាន់កម្ពុជាដោយមិនចាំបាច់ធ្វើចត្តាឡីស័កនោះឡើយ។
ក្រសួងទេសចរណ៍បានកត់សម្គាល់ឃើញថា នាឱកាសបុណ្យអុំទូក ហាក់មានមនុស្សម្នារយ៉ាងច្រើនបានចេញដើរកម្សាន្ត បើប្រៀបនឹងពិធីបុណ្យភ្ជុំបិណ្ឌ កាលពីពេលកន្លងទៅ មានការកើនឡើងរហូតជិត២៦% ឯណោះ។ ឯកឧត្តម តុប សុភ័ក អ្នកនាំពាក្យក្រសួងទេសចរណ៍ បានគូសបញ្ជាក់ប្រាប់សារព័ត៌មានខេមបូណូមីសថា លំហូរភ្ញៀវទេសចរ អំឡុងពិធីបុណ្យអុំទូក ជាឱកាសដ៏ប្រសើរក្នុងការឈានទៅរកភាពប្រសើរឡើងវិញនៃសេដ្ឋកិច្ចជាតិ និងសេដ្ឋកិច្ចមូលដ្ឋានទាំងមូល។ ជាមួយគ្នានេះ ឯកឧត្តម បានបញ្ជាក់ទៀតថា រហូតមកដល់ពេលនេះ សន្ទុះនៃទេសចរបរទេសដែលចូលមកកម្ពុជា នៅមានចំនួនតិចតួចនៅឡើយ ក៏ប៉ុន្តែ ជុំវិញការចេញដើរកម្សាន្ដរបស់ប្រជាពលរដ្ឋកម្ពុជា អំឡុងពិធីបុណ្យអុំទូក ក៏បានបង្ហាញពីភាពវិជ្ជមាន ក៏ដូចជា បង្កើននូវទំនុកចិត្តដល់ភ្ញៀវទេសចរបរទេសដែលមានបំណងចូលមកកម្ពុជា ផងដែរ។
អត្ថបទគួរអាន
ជាមួយគ្នានេះដែរ ក្រុមអ្នកជំនាញនៅក្នុងវិស័យទេសចរ បានអះអាងដែរថា សន្ទុះនៃការដើរហើររបស់ទេសចរក្នុងស្រុក គឺបានជះឥទ្ធិពលវិជ្ជមានដល់ផែនការស្ដារឡើងវិញ និងឈានទៅរកការបើកសង្គមសេដ្ឋកិច្ចពេញលេញឡើងវិញ។ មិនតែប៉ុណ្ណោះ សម្ទុះកំណើនទេសចរផ្ទៃក្នុង ក៏ត្រូវបានអ្នកជំនាញចាត់ទុកថា គឺជាផ្នែកមួយជួយបង្កើនទំនុកចិត្តដល់ទេសចរបរទេស ដែលមានបំណងចូលមកកម្សាន្តនៅកម្ពុជាផងដែរ។ក៏ប៉ុន្តែ កម្ពុជា នៅតែត្រូវការពេលវេលាបន្ថែមទៀត ដើម្បីវិលទៅរកស្ថានភាពដូចដើមមុនពេលកម្ពុជាមានការរាតត្បាតជំងឺកូវីដ-១៩។
យោងតាមរបាយការណ៍របស់ក្រសួងទេសចរណ៍ បានបង្ហាញថា ក្នុងចំណោមភ្ញៀវទេសចរផ្ទៃក្នុងជាង១លាននាក់ ដែលបានចេញដើរកម្សាន្ដនាឱកាសឈប់សម្រាក ៤ថ្ងៃនៅសប្ដាហ៍មុននេះ រាជធានីភ្នំពេញ គឺទទួលបានមានទេសចរច្រើនជាងគេបំផុតរហូតជាង២០ម៉ឺននាក់ បន្ទាប់មកគឺខេត្តព្រះសីហនុ មានទេសចរដើរកម្សាន្តច្រើនជាងគេរហូត១៤ម៉ឺន៥ពាន់នាក់, ខេត្តសៀមរាបប្រមាណ១៤ម៉ឺននាក់, ខេត្តកំពតប្រមាណ១០ម៉ឺននាក់ និងខេត្តកែប មានជាង៩ម៉ឺននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
