ឯកឧត្តម ឈុន សម្បត្តិ អគ្គនាយករងនៃគណៈកម្មការមូលបត្រកម្ពុជា បានថ្លែងនាពេលថ្មីៗនេះថា ការវិនិយោគទៅលើមូលបត្រកម្មសិទ្ធិក្តី មូលបត្របំណុលក្តី សុទ្ធតែត្រូវការចំណេះដឹង និងជំនាញច្បាស់លាស់ ក៏ដូចជា យុទ្ធសាស្ត្រច្បាស់លាស់ ដើម្បីអាចចាប់យកឱកាសសក្តានុពលនៅក្នុងវិស័យមូលបត្របាន។
ឯកឧត្តម បន្តថា តាមរយៈការបង្កើតសកម្មភាព សិក្ខាសាលា និងវគ្គបណ្តុះបណ្តាល ដែលសហការជាមួយនឹងធនាគារអេស៊ីលីដា នឹងជំរុញឲ្យមានកំណើនទីផ្សារមួយកម្រិតទៀត ជាពិសេសគឺបង្កើត និងបង្កើនទំនុកចិត្តដល់ វិនិយោគិន និងសាធារណជន ឲ្យកាន់តែចាប់អារម្មណ៍មកលើ ផ្សារមូលបត្រកម្ពុជា។
អត្ថបទទាក់ទង
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានគូសបញ្ជាក់ដែរថា នាពេលបច្ចុប្បន្ន ទីផ្សារមូលបត្រកម្ពុជា កំពុងតែមានភាពទាក់ទាញ ជាពិសេសនៅពេលដែលមានវត្តមានមូលបត្រកម្មសិទ្ធិរបស់ ធនាគារអេស៊ីលីដា បានទាក់ទាញវិនិយោគិន និងសាធារណជន ឲ្យចាប់អារម្មណ៍មកលើ វិស័យមូលបត្រកាន់តែច្រើន ជំរុញឲ្យមានសកម្មភាពជួញដូរ កាន់តែមមាញឹក និងទទួលបានអត្ថប្រយោជន៍ពីការទិញ-លក់ មូលបត្រនេះ។ លោកបណ្ឌិត អ៊ិន ចាន់នី ក៏បានបន្ថែមថា ជាក់ស្តែង វិស័យធនាគារ និងហិរញ្ញវត្ថុ ពិតជាទទួលរងផលប៉ះពាល់ពី វិបត្តិមេរោគកូវីដ-១៩ ក៏ប៉ុន្តែ ដោយសារតែមានការជួយគាំទ្រពីសំណាក់រាជរដ្ឋាភិបាលកម្ពុជា ទើបវិស័យមួយនេះ នៅដំណើរការល្អ មានហានិភ័យទាប និងអាចបន្តជួយគាំទ្រដល់អតិថិជនរបស់ខ្លួនថែមទៀតផង។
លោកស្រី ម៉ារ អមរា គណៈប្រធាននាយិកាប្រតិបត្តិហិរញ្ញវត្ថុនៃ ធនាគារអេស៊ីលីដា ភីអិលស៊ី បានលើកឡើងដែរថា មួយរយៈពេលចុងក្រោយនេះ ការទិញ-លក់មូលបត្រកម្មសិទ្ធិរបស់ធនាគារអេស៊ីលីដា ហាក់មានតម្លៃទាបជាងពេលមុនបន្តិច ដោយសារតែ វិនិយោគិនអាចមានតម្រូវការសាច់ប្រាក់បន្ទាន់ ក្នុងកាលៈទេសៈណាមួយ ក៏ប៉ុន្តែ លោកស្រី មានសុទិដ្ឋិនិយមខ្ពស់សម្រាប់ ភាពរីកចម្រើនលូតលាស់របស់ធនាគារអេស៊ីលីដាក្នុងរយៈពេលវែង។
លោកស្រី ម៉ារ អមរា បន្តថា នាពេលបច្ចុប្បន្ន ធនាគារអេស៊ីលីដា ពុំទាន់មានផែនការពង្រីកដើមទុន តាមរយៈការបោះផ្សាយមូលបត្របន្ថែមនោះទេ តែធនាគារអេស៊ីលីដា នៅតែស្វាគមន៍ចំពោះវិនិយោគិន ដែលមានបំណងចូលមកវិនិយោគលើមូលបត្រដែលបានបោះផ្សាយរួចជាស្រេច។
None
