កន្លងមក ហ្វេសប៊ុកបានចំណាយប្រាក់រាប់សិបលានដុល្លារក្នុងមួយឆ្នាំៗ ដើម្បីជួយស្ថាប័នព័ត៌មានធំៗរបស់ពិភពលោកទាំងនោះ ចែករំលែកមាតិកាព័ត៌មានរបស់ពួកគេនៅលើបណ្ដាញសង្គមហ្វេសប៊ុក។ ប៉ុន្ដែ ឥឡូវនេះ ក្រុមហ៊ុនបណ្ដាញសង្គមយក្សមួយនេះ កំពុងពិចារណាឡើងវិញ ចំពោះការផ្ដល់ជូននេះ ខណៈដែលក្រុមហ៊ុនហាក់កំពុងបង្វែរគោលដៅ គាំទ្រទៅដល់ក្រុមអ្នកផលិតមាតិកាវីដេអូខ្លីៗជំនួសវិញ ដើម្បីប្រជែងនឹងបណ្ដាញសង្គមយក្សរបស់ចិន គឺ Tiktok។
ប្រភព័ត៌មានបានឲ្យដឹងទៀតថា ក្រុមហ៊ុនមេរបស់ Facebook បានចំណាយប្រចាំឆ្នាំជាមធ្យមជាង ១៥ លានដុល្លារដល់កាសែត Washington Post និង ២០ លានដុល្លារទៅឱ្យ The New York Times និង ជាង ១០ លានដុល្លារដល់កាសែត Wall Street Journal។
ហ្វេសប៊ុក កាលពីឆ្នាំ២០១៩ បានយល់ព្រមលើកិច្ចព្រមព្រៀងរយៈពេល៣ឆ្នាំ ដើម្បីបង់ប្រាក់ចំណាយទៅឲ្យក្រុមហ៊ុនសារព័ត៌មានធំៗមួយចំនួន ដើម្បីមាតិកាព័ត៌មានរបស់ស្ថាប័នព័ត៌មានទាំងនោះ អាចផ្សាយចែករំលែកនៅលើបណ្ដាសង្គមហ្វេសប៊ុក ហើយកិច្ចព្រមព្រៀងនេះ នឹងត្រូវផុតកំណត់នៅត្រឹមឆ្នាំនេះហើយ។
ក៏ប៉ុន្ដែ មកទល់ពេលនេះ ក្រុមហ៊ុនមេរបស់ហ្វេសប៊ុក មិនបានបញ្ហាញនូវសញ្ញាណាមួយទាល់តែសោះថា ខ្លួននឹងអាចបន្ដភាពជាដៃគូនេះឡើងវិញតាមទម្រង់កិច្ចព្រមព្រៀងដែលមានស្រាប់។ នេះបើតាមប្រភពជិតស្និទ្ធនឹងបញ្ហានេះ បានបញ្ជាក់នៅក្នុងសារព័ត៌មាន The Wall Street Journal។
ប្រភពព័ត៌មានដដែលនេះបន្ថែមថា ក្រុមហ៊ុនមេរបស់ Facebook កំពុងសម្លឹងមើលការផ្លាស់ប្តូរការវិនិយោគរបស់ខ្លួនចេញពីការបង់ប្រាក់ឲ្យស្ថាប័នសារព័ត៌មានធំៗ ហើយឆ្ពោះទៅរកការវិនិយោគដល់អ្នកបង្កើតផលិតវីដេអូខ្លីៗដែលទាក់ទាញវិញ ដើម្បីប្រកួតប្រជែងជាមួយនឹងបណ្តាញសង្គមយក្សរបស់ចិន គឺ TikTok។
ទន្ទឹមនឹងនោះ នាយកប្រតិបត្តិ Meta លោក Mark Zuckerberg ក៏ធ្លាប់បានសម្ដែងការខកចិត្តដែរ ចំពោះការដាក់ចេញនៅច្បាប់ជុំវិញពិភពលោក ដែលបានបង្ខំឱ្យ Facebook ក៏ដូជាក្រុមហ៊ុនមេរបស់ Google បង់ប្រាក់ឱ្យស្ថាប័នផ្សាយមាតិកាព័ត៌មាន ដែលបានផ្សាយនៅលើបណ្តាញសង្គម។
អត្ថបទគួរអាន
ព័ត៌មានមួយចំនួនបានរាយការណ៍ថា Facebook កំពុងពិចារណាឡើងវិញនូវការបង់ប្រាក់របស់ខ្លួនទៅឱ្យស្ថាប័នព័ត៌មាន និង ផ្លាស់ប្តូរទិសដៅរបស់ខ្លួនកាលពីពេលមុន ដែលចង់ឲ្យព័ត៌មានជាផ្នែកធំបំផុតនៅក្នុងបណ្តាញសង្គមFacebook ។
គួរជម្រាបថា ស្ថាប័នព័ត៌មានមួយចំនួន ដែលជួបការលំបាកក្នុងការប្រកួតប្រជែងដើម្បីទទួលបានប្រាក់ចំណូលពីការផ្សាយពាណិជ្ជកម្មឌីជីថលជាមួយ Google និង Facebook បានរិះគន់ក្រុមហ៊ុនបច្ចេកវិទ្យាយក្សទាំងពីរនេះ ចំពោះការមិនបង់ប្រាក់សម្រាប់មាតិកាព័ត៌មានរបស់ពួកគេ ដែលត្រូវបានបង្ហាញ និងចែករំលែកនៅលើវេទិការលើបណ្តាញសង្គមផងដែរ។
របាយការណ៍ពី The Wall Street Journal បានឲ្យដឹងថា កាលពីឆ្នាំ២០១៨ ក្រុមហ៊ុន Facebook និង Google ទទួលបានចំណូល៧៧% នៃចំណូលផ្សព្វផ្សាយពាណិជ្ជកម្មឌីជីលថល នៅក្នុងទីផ្សារក្នុងស្រុក នៅគ្រាដែលស្ថាប័នកាសែតរបស់អាមេរិកជិត២ពាន់ស្ថាប័ន បានបិទទ្វារតាំងពីឆ្នាំ២០០៤មក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
