កសិករមានការរំពឹងទុកយ៉ាងដូច្នេះ នៅក្រោយពេលដែលពួកគាត់បានដឹងថា ដំណើរការនៃការនាំចេញមៀនប៉ៃលិនកម្ពុជា ទៅកាន់ប្រទេសចិន បានចូលជាធរមានហើយ កាលពីថ្ងៃទី១៦ ខែមីនា ឆ្នាំ២០២២ ខណៈដែលខាងក្រសួងក៏បានអំពាវនាវឲ្យម្ចាស់ចម្ការមៀន ទៅចុះបញ្ជីដើម្បីអាចធ្វើការនាំចេញមៀនដោយត្រង់ទៅកាន់ទីផ្សារចិនផងដែរ។ នេះបើតាមសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់និងនេសាទ ដែលបានចុះនៅថ្ងៃទី ២៥ ខែមីនា ឆ្នាំ២០២២។
យោងតាមសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់និងនេសាទ នៅថ្ងៃទី២៥ ខែមីនា ឆ្នាំ២០២២ បានគូសបញ្ជាក់ដូច្នេះ ពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់នាំចេញផ្លែមៀនស្រស់កម្ពុជា ទៅកាន់ប្រទេសចិន ត្រូវបានចូលជាធរមាន កាលពីថ្ងៃទី១៦ ខែមីនា ឆ្នាំ២០២២ ថ្មីៗនេះ។ មន្ត្រីកសិកម្ម សហគមន៍មៀនប៉ៃលិន និងកសិករ សុទ្ធតែបានបង្ហាញការសាទរយ៉ាងពេញទំហឹង ចំពោះការសម្រេចរបស់ភាគីចិនដែលអនុញ្ញាតឲ្យកម្ពុជា អាចនាំចេញផ្លែមៀនទៅកាន់ទីផ្សាររបស់ខ្លួន។ លោក សាយ សុផាត ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តប៉ៃលិន បានគូសបញ្ជាក់ថា កសិករក្នុងខេត្តបៃលិនបានត្រៀមខ្លួនជាស្រេចក្នុងការនាំចេញមៀនប៉ៃលិន ទៅទីផ្សារប្រទេសចិន ហើយលោកសង្ឃឹមថា មៀនប៉ៃលិន នឹងមានទីផ្សារឡើងវិញ បន្ទាប់ពីបានជួបបញ្ហាទីផ្សារកាលពីកន្លងមក។
ប្រធានមន្ទីរកសិកម្មខេត្តប៉ៃលិន លោក សាយ សុផាត បានបន្ថែមថា ខេត្តប៉ែលិន មានផ្ទៃដីដាំដុះដំណាំមៀន ជិត៤ពាន់ហិកតា និងមានសមត្ថភាពផលិតផ្លែមៀន បានប្រមាណ ២ម៉ឺន ទៅ ៣ម៉ឺនតោន ក្នុងមួយឆ្នាំ។ បន្ថែមលើនេះ លោកក៏បានសង្កត់ធ្ងន់ទៀតថា កន្លងមក ការនាំចេញមៀនប៉ៃលិន កម្ពុជា គឺជាការនាំចេញក្រៅផ្លូវការ ទៅកាន់ប្រទេសថៃ ប្រទេសវៀតណាម ជាដើម និងមួយចំនួនទៀតបានផ្គត់ផ្គង់ទីផ្សារក្នុងស្រុក។ ក៏ប៉ុន្តែ បើទោះជាបែបនេះក្ដី លោក សុផាត ក៏បានបញ្ជាក់ដែរថា ចាប់ពីមានការផ្ទុះឡើងនូវជំងឺកូវីដ១៩ ការនាំចេញមៀនប៉ៃលិនទៅកាន់ប្រទេសជិតខាងក៏មិនអាចធ្វើទៅបាន ដែលបានធ្វើឲ្យផ្លែមៀននៅតាមបណ្ដាខេត្ត ដូចជា ខេត្តបាត់ដំបង ប៉ៃលិន និងបន្ទាយមានជ័យ ត្រូវកកស្ទះ និងខ្វះទីផ្សារ។
អត្ថបទគួរអាន
លោក សួស ស៊ីយ៉ាត ប្រធានសហគមន៍មៀនប៉ៃលិន បានគូសបញ្ជាក់ដូច្នេះ ដំណើរការនាំចេញមៀនប៉ៃលិនទៅប្រទេសចិន មិនមែនជាការងាយស្រួលនោះទេ ក៏ប៉ុន្តែ ក្នុងនាមលោកជាប្រធានសហគមន៍ រួមទាំងកសិករដទៃសាទរ នៅពេលប្រទេសចិន បើកភ្លើងខៀវឲ្យកម្ពុជា នាំចេញមៀនប៉ៃលិន។ បើតាមលោក សួស ស៊ីយ៉ាត បន្ទាប់ពីមៀនប៉ៃលិន មិនអាចនាំចេញទៅប្រទេសថៃ ផ្លែមៀនរបស់កសិករ មិនមានទីផ្សារនោះទេ ខណៈតម្រូវការក្នុងស្រុកមានតិចតួចប៉ុណ្ណោះ។ លោកបន្តថា កសិករខ្មែរ នឹងមិនបារម្ភពីទីផ្សារមៀនប៉ៃលិនទៀតនោះ នៅពេលដល់រដូវប្រមូលផលលើកក្រោយនៅពេលមៀនអាចនាំចេញទៅចិនបាន ខណៈពេលនេះ ចម្ការមៀនរបស់កសិករទើបចេញផ្កាជាបណ្ដើៗប៉ុណ្ណោះ។
សូមបញ្ជាក់ថា បន្ទាប់ពីលក្ខខណ្ឌតម្រូវភូតគាមអនាម័យនៃការនាំចេញមៀនទៅចិនបានចូលជាធរមាន ក្រសួងកសិកម្ម ក៏បានអំពាវនាវដល់ម្ចាស់ចម្ការ សហគមន៍មៀនប៉ៃលិន និងម្ចាស់រោងចក្រវេចខ្ចប់ ដែលមានបំណងផលិតនិងកែច្នៃវេចខ្ចប់ នាំចេញផ្លែមៀនស្រស់ទៅកាន់ទីផ្សារប្រទេសចិន រួសរាន់ដាក់ពាក្យស្នើសុំចុះបញ្ជីចម្ការ និងរោងចក្រកែច្នៃវេចខ្ចប់ នាំចេញផ្លែមៀនស្រស់ទៅកាន់ទីផ្សារប្រទេសចិន នៅអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់និងនេសាទ ដើម្បីបំពេញនូវលក្ខខណ្ឌតម្រូវសម្រាប់នាំចេញ៕
None
