កិច្ចប្រជុំកំពូលដល់ទៅ៦ថ្ងៃក្នុងទឹកដីអូស្ត្រាលី ធ្វើឡើងបន្ទាប់ពីកិច្ចប្រជុំថ្នាក់រដ្ឋមន្ត្រីសេដ្ឋកិច្ចសមាជិកទាំង១៤ ប្រទេស បានធ្វើឡើងកាលពីខែកញ្ញា ពុំបានជជែកចរចាលើបញ្ហារនាំងពន្ធគយ។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្មអាមេរិក។
យ៉ាងណាក៏ដោយ មិនខុសគ្នាពីកិច្ចប្រជុំកាលពី៣ខែមុនទេ ការចរចាលើកនេះ នឹងផ្តោតលើសសរស្តម្ភចំនួនបួនធំៗរួមមាន ពាណិជ្ជកម្មដោយយុត្តិធម៌ ភាពធន់នៃចង្វាក់ផ្គត់ផ្គង់ ហេដ្ឋារចនាសម្ព័ន្ធថាមពលស្អាតនិងពន្ធ និងការប្រឆាំងអំពើពុករលួយ។
ប៉ុន្តែ នៅពេលនិយាយដល់ក្របខណ្ឌសេដ្ឋកិច្ចអ្វីមួយ គេតែងនឹងឃើញមុនគេភ្លាមដល់អត្ថប្រយោជន៍ចម្បងដែលបានមក នោះគឺការអនុវត្តពាណិជ្ជកម្មដោយកាត់បន្ថយ ឬមិនមានរនាំងពន្ធ។ ក្រៅពីនោះក៏មានដែរ អត្ថប្រយោជន៍ដែលបានមកដូចជា ការពង្រីកទីផ្សារ ពង្រឹងខ្សែចង្វាក់ផ្គត់ផ្គង់ជាដើម។ ប៉ុន្ដែ រដ្ឋបាលសហរដ្ឋអាមេរិករបស់ប្រធានាធិបតី Joe Biden មិនបានរាប់បញ្ចូលនូវកិច្ចពិភាក្សាស្ដីពីការកាត់បន្ថយពន្ធគយឡើយ នៅក្នុងការចរចាក្របខណ្ឌនេះឡើយ។
ទោះយ៉ាងណា នៅក្រោមសសរស្តម្ភទាំង៤ដដែល សមាជិកនឹងចរចាអំពីការប្តេជ្ញាចិត្តក្នុងវិស័យដូចជា ការសម្របសម្រួលពាណិជ្ជកម្ម ដែលអាចត្រូវបានកែលម្អតាមរយៈនីតិវិធីគយសាមញ្ញ និងងាយជាងមុន។
មន្ត្រីរដ្ឋបាលជាន់ខ្ពស់រដ្ឋាបាលលោក បៃឌិនមួយរូប បាននិយាយនៅមុនកិច្ចប្រជុំថា ការសម្របសម្រួលពាណិជ្ជកម្ម និងកសិកម្ម គឺស្ថិតក្នុងចំណោមវិស័យដែលគេនឹងពិភាក្សាប្រកបដោយការឯកភាពពិតប្រាកដ។
អត្ថបទគួរអាន
ក្រៅតែពីអាមេរិក ប្រទេសដែលជាសមាជិកក្របខណ្ឌសេដ្ឋកិច្ចឥណ្ឌូប៉ាស៊ីហ្វិកនេះ រួមមាន អូស្ត្រាលី ហ្វីជី ឥណ្ឌា ជប៉ុន កូរ៉េខាងត្បូង នូវែសេឡង់ រួមទាំងប្រទេសអាស៊ានចំនួន៧ទៀត ដូចជា ប្រ៊ុយនេ ឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន ថៃ និងវៀតណាម។ ដោយប្រទេសទាំងអស់នេះ តំណាងឲ្យ ៤០% នៃទំហំផលិតផលក្នុងស្រុកសរុបរបស់ពិភពលោក។ កាលពីខែតុលាកន្លងទៅនេះ ប្រទេសកាណាដា ក៏បានស្វែងរកការចូលជាសមាជិកនៅក្នុងក្របខណ្ឌ IPEF នេះដែរ ហើយរដ្ឋបាលលោកចូ បៃឌិន ក៏បានបង្ហាញការគាំទ្រយ៉ាងពេញទំហឹងចំពោះសំណើរបស់កាណាដា។
គេនៅចាំបានថា ប្រធានាធិបតីអាមេរិក បានប្រកាសដាក់ចេញនូវក្របខណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF) កាលពីខែឧសភា កន្លងទៅ អំឡុងពេលដំណើរទស្សនកិច្ចរបស់លោកនៅក្នុងទីក្រុងតូក្យូប្រទេសជប៉ុន ហើយគោលបំណងរបស់អាមេរិក គឺចង់ប្រើក្របខណ្ឌសេដ្ឋកិច្ចមួយនេះ ធ្វើជាផ្លូវ ដើម្បីបង្កើតស្ដង់ដារថ្មីទាក់ទងនឹងបរិស្ថាន ការងារ និងបញ្ហាផ្សេងៗទៀតនៅទូទាំងតំបន់អាស៊ី ខណៈដែលតំបន់នេះ កំពុងមានការប្រទាញប្រទង់ឥទ្ធិពលគ្នាយ៉ាងខ្លាំងក្លា រវាងមហាយក្សអាមេរិក និងមហាយក្សចិន ហើយម៉្យាងវិញទៀត ដើម្បីជំនួសកិច្ចព្រមព្រៀង CP TPP ដែលអាមេរិកបានដកខ្លួនក្នុងរដ្ឋបាលលោកដូណាល់ ត្រាំផងដែរ៕
