នេះបើតាមការចុះផ្សាយរបស់ភ្នាក់ងារសារព័ត៌មាន Reuter។ ក្រុមហ៊ុន Ford Motor គ្រោងកាត់បន្ថយការងារដល់ចំនួន ៣២០០កន្លែងនៅទូទាំងតំបន់អឺរ៉ុប ហើយនឹងគ្រោងរើការងារផ្នែកអភិវឌ្ឍផលិតកម្មទៅទឹកដីអាមេរិកវិញ។ ក្នុងនោះ ប្រទេសអាល្លឺម៉ង់ នឹងរងផលប៉ះពាល់ជាងគេ ដោយសហជីពរបស់ប្រទេសមួយនេះ គឺសហជីព IG Metall បានហៅគម្រោងនេះថា ជាសកម្មភាពដែលបង្កការអាក់ខានដល់ Ford នៅទូទាំងអឺរ៉ុប ប្រសិនបើពិតជាកាត់បន្ថយការងារនេះមែន។ ទោះយ៉ាងណាក្រុមហ៊ុន Ford មិនបានចេញមកប្រតិកម្ម បញ្ជាក់ច្បាស់អ្វីពីផែនការនេះនៅឡើយ។
បើតាមសហជីព IG Metall បានឱ្យដឹងថា ក្រុមហ៊ុន Ford ចង់កាត់បន្ថយការងារ ២៥០០កន្លែងនៅក្នុងផ្នែកអភិវឌ្ឍផលិតផល និងការងារ៧០០កន្លែង សម្រាប់មុខតំណែងរដ្ឋបាល ក្នុងនោះទីតាំងរោងចក្រនៅអាល្លឺម៉ង់ គឺនឹងទទួលរងផលប៉ះពាល់ខ្លាំងជាងគេ។
អត្ថបទគួរអាន
ក្រុមអ្នកវិភាគលើកឡើងថា ការឡើងថ្លៃនូវគ្រឿងបង្គុំសម្រាប់ផលិតអាគុយរថយន្តអគ្គិសនី និងការព្យាករពីកំណើនសេដ្ឋកិច្ចយឺតនៅអាមេរិក និងអឺរ៉ុប កំពុងដាក់សម្ពាធទៅលើក្រុមហ៊ុនផលិតរថយន្ត ឱ្យកាត់បន្ថយការចំណាយរបស់ពួកគេ។ លើសពីនេះអ្វីដែលគួរឱ្យកត់សម្គាល់ទៀតនោះ សង្គ្រាមតម្លៃរថយន្តអគ្គិសនី ដែល Tesla បានលក់បញ្ចុះតម្លៃរថយន្តថ្មីៗនេះ កាន់តែបង្កើនសម្ពាធខ្លាំងថែមទៀត ចំពោះគូប្រជែងដូចជា Ford ជាដើម។
អ្នកនាំពាក្យម្នាក់នៅទីស្នាក់ការកណ្តាលរបស់ក្រុមហ៊ុន Ford ក្នុងរដ្ឋ Michigan សហរដ្ឋអាមេរិកបាននិយាយថា ការពិភាក្សាជាមួយក្រុមប្រឹក្សាការងារអាល្លឺម៉ង់ កំពុងបន្តធ្វើឡើង ហើយថាក្រុមហ៊ុន Ford នឹងត្រូវប្រកួតប្រជែងកាន់តែច្រើន ខណៈដែលខ្លួនផ្លាស់ប្តូរទៅផ្តោមលើការផលិតរថយន្តអគ្គិសនី។
សូមរំលឹកថា កាលពីឆ្នាំមុន Ford បានប្រកាសថា នឹងវិនិយោគទឹកប្រាក់២ពាន់លានដុល្លារ ដើម្បីពង្រីកផលិតកម្មនៅរោងចក្ររបស់ខ្លួនក្នុងទីក្រុងកូឡូញ (Cologne) ប្រទេសអាល្លឺម៉ង់ ដើម្បីផលិតប្រភេទរថយន្តអគ្គិសនីសម្រាប់ទីផ្សារដ៏ធំនេះ។ បច្ចុប្បន្នរោងចក្រនេះ បានផលិតរថយន្ត Ford Fiesta ព្រមទាំងម៉ាស៊ីន និងប្រអប់លេខរបស់វារួចហើយ៕
អត្ថបទ ៖ នៅ សំភី
