ការប្តេជ្ញាចិត្តក្នុងការផ្តល់កម្ចីចំពោះប្រទេសកំពុងអភិវឌ្ឍន៍ចំនួន១០០ នៅលើពិភពលោក ដោយធនាគារអាហារ័ណនីហរ័ណចិន ឬដែលមានឈ្មោះជាភាសាអង់គ្លេសថា China EximBank និងធនាគារអភិវឌ្ឍន៍ចិន បានធ្លាក់ចុះជារៀងរាល់ឆ្នាំ ក្រោយមានកំណត់ត្រាខ្ពស់បំផុតកាលពីឆ្នាំ២០១៦។ យ៉ាងណាមិញចិន បានចាប់ផ្តើមកាត់បន្ថយការផ្តល់ហិរញ្ញប្បទានរួចមកហើយ គឺតាំងពីនៅមុនមានជំងឺរាតត្បាតកូវីដ១៩ ដែលបានកើតឡើងក្នុងដើមឆ្នាំ២០២០។
ទោះយ៉ាងណា ធនាគារអាហារ័ណនីហរ័ណចិន និងធនាគារអភិវឌ្ឍន៍ចិន បានបង្កើនទឹកប្រាក់ ៤៩៨ពាន់លានដុល្លារជាសាកល នៅចន្លោះឆ្នាំ ២០០៨-២០២១ ដែលជាផ្នែកមួយនៃគម្រោងខ្សែក្រវាត់និងផ្លូវ របស់រដ្ឋាភិបាលក្រុងប៉េកាំង។
ការផ្តល់កម្ចីក្នុងគោលបំណងទូទៅចំពោះក្រុមហ៊ុនប្រេងគ្រប់គ្រងដោយរដ្ឋ ឧទាហរណ៍ដូចជានៅអង់ហ្គោឡា ប្រេស៊ីល អេក្វាឌ័រ រុស្ស៊ី និង វេណេហ្ស៊ុយអេឡា បានឈានដល់ ៦០ពាន់លានដុល្លារ នៅចន្លោះឆ្នាំ២០០៩ និង ២០១៧។
ចាប់តាំងពីពេលនោះមក ការផ្តល់កម្ចីគឺកាន់តែតិច សម្រាប់អ្នកផលិតប្រេង ចំណែកឯបង់ក្លាដែស និងស្រីលង្កា ស្ថិតក្នុងចំណោមអ្នកទទួលបានកម្ចីធំៗ។ ទំហំជាមធ្យមនៃកម្ចីដែលបានសន្យា ក៏បានធ្លាក់ចុះផងដែរ ពីចំនួន ៥៣៤លានដុល្លារ នៅឆ្នាំ២០១៣-២០១៧ មកត្រឹម ៣៧៨លានដុល្លារ នៅឆ្នាំ២០១៨-២០២១។
អត្ថបទគួរអាន
រុស្ស៊ី ជាអ្នកទទួលបានកម្ចីធំំបំផុត ក្នុងទឹកប្រាក់ ៥៨ពាន់លានដុល្លារ នៅឆ្នាំ ២០០៨-២០២១ តាមពីក្រោយដោយ វេណេហ្ស៊ុយអេឡា ជាមួយនឹងទឹកប្រាក់ ៥៥ពាន់លានដុល្លារ។ ចំណែកទី៣ គឺប្រទេសអង់ហ្គោឡា ដែលទទួលបានកម្ចីពីចិន ៣៣ពាន់លានដុល្លារ លើគម្រោងដឹកជញ្ជូន កសិកម្ម ទឹក និងប្រេង។ ក្រៅពីនេះ មានកេនយ៉ា អេត្យូពី និងអេហ្ស៊ីប ផងដែរ។
បើយោងតាមទិន្នន័យធនាគារពិភពលោក ឱ្យដឹងថា ចិនគឺឱ្យជាអ្នកផ្តល់កម្ចីទ្វេភាគីដ៏ធំបំផុតក្នុងពិភពលោក។ ជាមួយគ្នានេះប្រទេសលោកខាងលិច ដូចជាសហរដ្ឋអាមេរិក និងអ្នកផ្តល់កម្ចីចម្រុះភាគី បានដាក់សម្ពាធឱ្យក្រុងប៉េកាំង ផ្តល់នូវការសម្រាលបន្ទុកបំណុល ចំពោះប្រទេសកំពុងអភិវឌ្ឍន៍ ដូចជា ហ្សាំប៊ី និងស្រីលង្កា។ ប៉ុន្តែចិនបានបង្ហាញតិចតួចប៉ុណ្ណោះ ចំពោះលក្ខខណ្ឌកម្ចី និងរបៀបដែលខ្លួនធ្វើការចរចាឡើងវិញជាមួយអ្នកខ្ចី។
យ៉ាងណាមិញ សម្រាប់ធនាគារពិភពលោក បានផ្តល់កម្ចីទៅប្រទេសកំពុងអភិវឌ្ឍន៍ប្រមាណ ៤០ពាន់លានដុល្លារក្នុង១ឆ្នាំ នៅចន្លោះឆ្នាំ២០១៦-២០១៩ មុនពេលដំឡើងដល់ ៦៧ពាន់លានដុល្លារ ដើម្បីឆ្លើយតបនឹងជំងឺរាតត្បាតកូវីដ១៩ ពោលគឺច្រើនជាងរាប់ដងនៃហិរញ្ញប្បទានរបស់ចិន៕
