លោក ចាន់ សីហា អ្នកនាំពាក្យធនាគារអភិវឌ្ឍន៍ជនបទ និងកសិកម្ម បានគូសបញ្ជាក់ថា កិច្ចព្រមព្រៀងរវាងធនាគារអភិវឌ្ឍន៍ជនបទ និងកសិកម្ម ជាមួយស្ថាប័នហិរញ្ញ ចំនួន៣ ក្រោមគម្រោងពិពិធកម្មកសិកម្មកម្ពុជា មានគោលបំណងសំខាន់ ក្នុងការចូលរួមអភិវឌ្ឍ និងជំរុញវិស័យកសិកម្មនៅកម្ពុជា ឲ្យប្រសើរឡើងមួយកម្រិតទៀត។ បើតាមលោក ចាន់ សីហា ទំហំឥណទានដែលធនាគារអភិវឌ្ឍន៍ជនបទ និងកសិកម្ម បានចុះកិច្ចព្រមព្រៀម ជាមួយធនាគារ ធនាគារប្រៃសណីយ៍កម្ពុជា គ្រឹះស្ថានមីក្រូហិរញ្ញវត្ថុចម្រើន និងគ្រឹះស្ថានមីក្រូហិរញ្ញវត្ថុ អេ.អឹម.ខេ មានទំហំទឹកប្រាក់សរុប ៣០លានដុល្លារ។
អត្ថបទគួរអាន
ជាមួយគ្នានោះ លោក ចាន់ សីហា ក៏បានសង្កត់ធ្ងន់ទៀតថា ស្ថាប័នទាំង៣ ខាងលើ ត្រូវតែអនុវត្តទៅតាមលក្ខខណ្ឌនៃគម្រោង ក្នុងការជ្រើសរើសអតិថិជន ដើម្បីធ្វើពាក្យស្នើសម្រាប់ប្រើប្រាស់កម្ចីឥណទាន ទៅតាមលទ្ធភាពរបស់ស្ថាប័ននីមួយៗ។
យោងតាមសេចក្ដីប្រកាសរបស់ធនាគារអភិវឌ្ឍន៍ជនបទ និងកសិកម្ម គម្រោងនេះ ធនាគារអភិវឌ្ឍន៍ជនបទ និងកសិកម្ម នឹងផ្តល់ឥណទានជូនគ្រឹះស្ថានហិរញ្ញវត្ថុ ទាំង៣ខាងលើ ដើម្បីផ្តល់ឥណទានបន្តដល់អ្នកទទួលផល ក្នុងគម្រោង ដូចជា កសិករខ្នាតតួច កសិធុរកិច្ចខ្នាតតូច និងមធ្យម, សហគមន៍កសិកម្ម និងក្រុមអ្នកផលិត សម្រាប់កសិផលទាំងអស់ លើកលែងតែចំពោះដំណាំស្រូវ។ គម្រោងនេះទៀតសោត មានគោលបំណងលើកកម្ពស់បរិយាប័នហិរញ្ញវត្ថុ និងគាំទ្រដល់ខ្សែច្រវាក់តម្លៃពិពិធកម្មវិស័យកសិកម្ម នៅរាជធានីភ្នំពេញ និងខេត្តគោលដៅចំនួន ១២ រួមមាន ខេត្តបាត់ដំបង, មណ្ឌលគីរី, ស្ទឹងត្រែង, រតនគិរី, ព្រះវិហារកំពង់ចាម, ត្បូងឃ្មុំ, ក្រចេះ, សៀមរាប, កណ្ដាលកំពង់ស្ពឺ, និងកំពង់ឆ្នាំង៕
