ទិន្នន័យបឋមពីវិទ្យាស្ថានសិក្សាស្ថិតិ និងសេដ្ឋកិច្ចជាតិរបស់បារាំង ហៅកាត់ថា អ៊ីនស៊ី (INSEE) បានបង្ហាញថា សន្ទស្សន៍តម្លៃបញ្ជាទិញទំនិញប្រើប្រាស់របស់បារាំង ជាមួយសហភាពអឺរ៉ុបបានធ្លាក់ចុះ ០,២% នៅខែកញ្ញា ធៀបនឹងខែសីហាកន្លងទៅនេះ ដែលវាបានរុញច្រានឲ្យអត្រាអតិផរណារបស់បារាំងនៅក្នុងរយៈពេល១២ខែ គឺមានដល់ទៅ២,៧% ជាអត្រាអតិផរណាខ្ពស់បំផុតមិនធ្លាប់មានក្នុងរយៈពេលជិត១ទសវត្សរ៍កន្លងមកនេះ។
បច្ចុប្បន្ននេះ មិនមែនមានតែបារាំងនោះទេ ប្រទេសជាច្រើនទៀតនៅអឺរ៉ុបក៏មានការឡើងថ្លៃថាមពលរហូតដល់ ១៤,៤% ផងដែរនៅក្នុងខែកញ្ញានេះ ដែលវាបាននិងកំពុងជំរុញអតិផរណានៅប្រទេសទាំងនោះ ក៏កំពុងកើនឡើងដូចបារាំង។
តែយ៉ាងណាក៏ដោយ ប្រធានធនាគារកណ្តាលអ៊ឺរ៉ុប លោកស្រី គ្រីស្ទីន ឡាហ្កាដ (Christine Lagarde) បាននិយាយកាលពីថ្ងៃពុធថា កើនឡើងអតិផរណាដ៏ខ្ពស់នេះ គឺវាមិនស្ថិតនៅយូរនោះទេ មានន័យថា ចំនួនអតិផរណានឹងអាចធ្លាក់ចុះទៅវិញនាពេលខាងមុខ នៅគ្រាដែលសេដ្ឋកិច្ចមានភាពប្រសើរឡើងវិញ។
សូមរំឭកដែរថា ជុំវិញបញ្ហាការកើនឡើងអាត្រាអតិផរណានេះ ក៏ត្រូវបានគេមើលឃើញថា អាចនឹងដាក់សម្ពាធសន្ថែមទៀតដល់លោក Macron ប្រធានាធិបតីបារាំង ខណៈ នៅសល់តែជាង ៦ ខែទៀតប៉ុណ្ណោះដល់ថ្ងៃបោះឆ្នោតប្រធានាធិបតី។ ដូចនេះ រដ្ឋាភិបាលរបស់លោក Macron ត្រូវតេប្រយ័ត្នប្រយែងចំពោះប្រតិកម្មតបតជាសាធារណៈប្រឆាំងនឹងកើនឡើងតម្លៃថាមពលនេះ។
អត្ថបទគួរអាន
ក្រៅតែពីបារាំង សហភាពអឺរ៉ុបទាំងមូល នាពេលថ្មីៗនេះ ក៏បានសន្យាចំណាយប្រាក់រាប់ពាន់លាន ដើម្បីកាត់បន្ថយថ្លៃថាមពលសម្រាប់ជួយដល់គ្រួសារក្រីក្របំផុតនៅតំបន់អឺរ៉ុបផងដែរ.
សូមរំឭកបន្ដិចថា បារាំងបច្ចុប្បន្នក៏នៅតែបន្ដជាប់ដៃទប់ទល់នឹងកូវីដ១៩ឆ្លងរីករាលដាលផងដែរ ខណៈដែលកន្លងមករដ្ឋាភិបាលប្រទេសនេះ ក៏បានដាក់វិធានការតឹងរ៉ឺង ដើម្បីឆ្លើយតបទប់ស្កាត់ការរីករាតត្បាតនៃមេរោគជាសកលមួយនេះ។ យ៉ាងណាមិញ គិតមកទល់ពេលនេះ បារាំងមានអ្នកឆ្លងកូវីដ១៩ប្រចាំថ្ងៃប្រមាណជាង ៥ពាន់នាក់ក្នុងមួយថ្ងៃ ដែលបានធ្វើឲ្យចំនួនអ្នកឆ្លងសរុបនៅក្នុងប្រទេសនេះ កើនដល់ ជាង៧លាននាក់ហើយ និងអ្នកស្លាប់សរុបមានដល់ទៅជិត១២ម៉ឺននាក់៕
អត្ថបទ៖ ស៊ើង និមល់
None
