ប្រទេសថៃបានប្រើវ៉ាក់សាំងស៊ីណូវ៉ាក់ជាង ៣១ លានដូស ចាប់តាំងពីខែកុម្ភៈមក ដោយផ្តើមចាក់វ៉ាក់សាំងនេះចំនួន ២ ដូសជូនកម្មករជួរមុខ ដែលមានហានិភ័យខ្ពស់ និងប្រជាជននៅខេត្តភូកេតដែលបានបើកដំណើរការទទួលទេសចរបរទេសដែលបានចាក់វ៉ាក់សាំងកាលពីខែកក្កដា។
បន្ទាប់មក ប្រទេសថៃបានចាប់ផ្តើមប្រើប្រាស់វ៉ាក់សាំងនេះជាដូសទី១ និង វ៉ាក់សាំងអាស្ត្រាហ្សរនីកាជាដូសទី ២ ។ ប្រទេសថៃ គឺជាប្រទេសទី១ដែលប្រើប្រាស់វ៉ាក់សាំងរួមបញ្ជូលគ្នារវាងវ៉ាក់សាំងចិន និងវ៉ាក់សាំងលោកខាងលិច។
យ៉ាងណាមិញ បើតាមរដ្ឋមន្ត្រីក្រសួងសុខាភិបាលបានឱ្យដឹងថា ការប្រើប្រាស់វ៉ាក់សាំងរួមបញ្ចូលគ្នានេះ មិនបានបង្កហានិភ័យអ្វីនោះទេ ផ្ទុយទៅវិញវាបានបង្ហាញពីសុវត្ថិភាព និងប្រសិទ្ធភាពក្នុងការបង្កើតភាពស៊ាំប្រឆាំងនឹងមេរោគបំប្លែងថ្មី ឌែលតា។
សូមជម្រាបថា ប្រទេសថៃមានគម្រោងទិញវ៉ាក់សាំងជំងឺកូវីដ -១៩ ចំនួន ១២០ លានដូសបន្ថែម ខណៈដែលថ្មីៗនេះ រដ្ឋាភិបាលបានកក់ទិញវ៉ាក់សាំងអាស្ត្រាហ្សេនីកា ដែលផលិតក្នុងស្រុកចំនួន ៦០ លានដូសរួចទៅហើយ។ គួរបញ្ជាក់ថា វ៉ាក់សាំងកូវីដ១៩ប្រភេទអាស្ត្រាហ្សេនីកា ដែលផលិតដោយក្រុមហ៊ុន Siam Bioscience របស់ថៃ ត្រូវបានអង្គការសុខភាពពិភពលោកទទួលស្គាល់ និងបានដាក់បញ្ជូលនៅក្នុងបញ្ជីឈ្មោះវ៉ាក់សាំងសម្រាប់ការប្រើប្រាស់បន្ទាន់រួចហើយដែរកាលពីថ្ងៃទី ១១ខែតុលា ឆ្នាំ២០២១។
អត្ថបទគួរអាន
រហូតមកដល់ពេលនេះ ប្រទេសថៃបានចាក់វ៉ាក់សាំងជូនពលរដ្ឋប្រមាណ ៣៦% នៃប្រជាជនប្រមាណ ៧២ លាននាក់ដែលរស់នៅក្នុងប្រទេសថៃ ហើយនឹងសង្ឃឹមថាការចាក់វ៉ាក់សាំងនឹងឈានដល់ ៧០% នៅចុងឆ្នាំនេះ។បើគិតត្រឹមថ្ងៃទី ១៩ តុលា អ្នកឆ្លងថ្មីក្នុងប្រទេសថៃមានចំនួនជាង ១ ម៉ឺននាក់ និងអ្នកស្លាប់ថ្មីចំនួន ៦៣នាក់បន្ថែមទៀត ដែលធ្វើឱ្យករណីឆ្លងសរុបកើនឡើងប្រមាណ ១ លាន ៨សែននាក់ ព្រមទាំងករណីស្លាប់សរុបកើនឡើងជាង ១ម៉ឺន ៨ពាន់នាក់៕
អត្ថបទ៖ ស៊ើង និមល់
None
