លោកប្រាយុត ចាន់អូចារ

លោកប្រាយុត ចាន់អូចារ បញ្ជាឲ្យពន្លឿនការចាក់វ៉ាក់សាំង និងដាក់ចេញវិធានការជំរុញសេដ្ឋកិច្ចបន្ថែម


ករណីឆ្លងកូវីដ-១៩នៅក្នុងប្រទេសថៃ នៅតែបន្ដមានខ្ពស់ក្នុងអត្រាជាង១ម៉ឺននាក់ជារៀងរាល់ថ្ងៃ បើទោះបីជា ការចាក់វ៉ាក់សាំងក្នុងប្រទេសនេះកំពុងធ្វើឡើងជាងបន្ដបន្ទាប់ក្ដី។ ដើម្បីឆ្លើយតបទៅនឹងការដោះស្រាយបញ្ហានេះ នាយករដ្ឋមន្ត្រីថៃបាននិយាយនៅថ្ងៃពុធសប្ដាហ៍នេះថា ប្រទេសថៃនឹងពន្លឿនការចាក់វ៉ាក់សាំង និងដាក់ចេញវិធានការជំរុញជាបន្ទាន់បន្ថែមទៀត ដើម្បីកាត់បន្ថយផលប៉ះពាល់នៃការផ្ទុះឡើងនៃមេរោគឆ្លងកូវីដ១៩។
នាយករដ្ឋមន្ត្រីថៃ លោក ប្រាយុទ្ធ ចាន់អូចា អង្គុយក្នុងរដ្ឋសភា

រាជរដ្ឋាភិបាល​រំពឹង​ថា ស្ថានការណ៍​នេះ នឹង​ជួយ​ឲ្យ​ប្រទេស​ថៃ​នឹង​វិល​មក​រក​ស្ថានភាព​ប្រក្រតី​ឡើង​វិញ​ក្នុង​ពេល​ឆាប់​ៗ​។ នេះ​បើ​យោង​តាម​ការ​ចេញផ្សាយ​ដោយសារ​ព័ត៌មាន​រ៉​យ​ទ័​រ​។

នៅ​រយៈពេល​ចុង​ក្រោយ​នេះ​ប្រទេស​ថៃ​បាន​ដាក់​វិធានការ និង​យុទ្ធនាការ​ជា​បន្តបន្ទាប់ ដែល​ជា​ការ​ខិតខំ​ប្រឹងប្រែង​ដើម្បី​ដោះស្រាយ​វិបត្តិ​កូ​វី​ដ និង​ធ្វើ​ឱ្យ​ប្រជាជន​អាច​វិល​ត្រឡប់​ទៅ​រក​ការ​ប្រកប​របរ​ចិញ្ចឹមជីវិត​បាន​ធម្មតា​វិញ តាម​ដែល​អាច​ធ្វើ​ទៅ​បាន​។ ខណៈ ប​ច្ចប្ប​ន្ន​នេះ ចំនួន​ប្រជាជន​ក្រីក្រ​នៅ​ក្នុង​ប្រទេស​នេះ មានការ​កើនឡើង​កាន់តែ​ច្រើន ដោយសារ​តែ​ការ​បាត់បង់​ការងារ និង​ការ​ធ្លាក់​ចុះ​ប្រាក់​ចំណូល​ដែល​បណ្តាល​មក​ពី​វិបត្តិ​កូ​វី​ដ​១៩​។

ដើម្បី​ទ្រទ្រង់​ដល់​សេដ្ឋកិច្ច​ក្នុង​ប្រទេស រាជរដ្ឋាភិបាល​បាន​ដាក់​ចេញ​នូវ​វិធាន​ការណ៍​ដើម្បី​ដោះស្រាយ​បញ្ហា​ជំងឺ​រាតត្បាត​នេះ ជាមួយនឹង​ការ​ខ្ចី​បំណុល​ប្រមាណ ៤៥ ពាន់​លាន​ដុល្លារ ដោយ​ក្នុង​នោះ មាន​ទឹកប្រាក់​កម្ចី​ប្រមាណ​ជិត ១៥ ពាន់​លាន​ដុល្លារ​ត្រូវ​បាន​អនុម័ត​នៅ​ឆ្នាំ​នេះ​។

ទន្ទឹម​នេះ ទេសាភិបាល​ធនាគារកណ្តាល​ថៃ​បាន​និយាយ​កាលពី​ខែ​មុន​ថា ប្រទេស​ថៃ​ត្រូវការ​ប្រាក់ ៣១​ពាន់​លាន​ដុល្លារ​បន្ថែម​ទៀត ដើម្បី​គាំទ្រ​ដល់​សេដ្ឋកិច្ច ខណៈ​ដែល ទីភ្នាក់ងារ​រៀបចំ​ផែនការ​របស់​រដ្ឋាភិបាល​បាន​ព្យាករណ៍​ថា សេដ្ឋកិច្ច​ថៃ​នឹង​កើនឡើង​ពី ០,៧% ទៅ ១,២% នៅ​ឆ្នាំ​នេះ បន្ទាប់​ពី​ការ​ធ្លាក់​ចុះ ៦,១% កាលពី​ឆ្នាំ​មុន​។

ដោយឡែក ចំពោះ​ការ​ប្រមូល​ចំណូល​របស់​រដ្ឋាភិបាល​វិញ ក៏​កំពុង​ប្រឈម​នឹង​ហានិភ័យ​ដែរ ព្រោះថា​អាជីវកម្ម​ក្នុង​ប្រទេស​មិន​អាច​ដំណើរការ​បាន​ពេញលេញ​នៅឡើយ​ទេ ដែល​វា​ធ្វើ​ប៉ះពាល់​ដល់​សមត្ថភាព​សារពើពន្ធ​ក្នុង​ការ​អភិវឌ្ឍ​ប្រទេស​។ តែ​យ៉ាងណា​ក៏​ដោយ ថ្មី​ៗ​នេះ ប្រទេស​ថៃ​កំពុង​រៀបចំ​ផែនការ​អភិវឌ្ឍ សេដ្ឋកិច្ច និង​សង្គម​សម្រាប់ ៥ ឆ្នាំ​ខាង​មុខ ដោយ​ចាប់ពី​ខែតុលា​ឆ្នាំ ២០២២ ដើម្បី​កែប្រែ​ប្រទេស​ឆ្ពោះទៅ​រក​វិស័យ​បច្ចេកវិទ្យា និង​ការ​បង្កើត​ថ្មី​។

សូម​ជម្រាប​ថា គិត​ត្រឹម​ថ្ងៃ​ទី ២១ ខែកញ្ញា ករណី​ឆ្លង​ថ្មី​នៅ​ប្រទេស​ថៃ​មាន​ប្រមាណ ជាង ១ ម៉ឺន​នាក់​និង ចំនួន​អ្នក​ស្លាប់​ប្រមាណ​ជាង ១៤០ នាក់ ខណៈ​សរុប​ចំនួន​អ្នក​ឆ្លង​កើន​ដល់​១​លាន​៥​សែន​នាក់​ហើយ និង​អ្នក​ស្លាប់​វិញ​មាន​ដល់​ជាង​១​ម៉ឺន​៥​ពាន់​នាក់​។ រហូត​មក​ដល់​ពេល​នេះ ទើបតែ​មាន ២២ ភាគរយ ប៉ុណ្ណោះ នៃ​ប្រជាជន ៧២ លាន​នាក់​រស់នៅ​ក្នុង​ប្រទេស​ថៃ ដែល​បាន​ទទួល​ការ​ចាក់​វ៉ាក់សាំង​គ្រប់​ចំនួន ២ ដូ​ស​៕

អត្ថបទ៖ ស៊ើង និមល់

© 2021 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


ធនាគារនៅចិន កំពុងប្រឈមនឹងការខាតបង់ធំ ជុំវិញវិបត្តិបំណុលទំហំ ៣០០ពាន់លានដុល្លាររបស់ក្រុមហ៊ុន Evergrande

ព័ត៌មាន
ជាមួយបំណុលជាង ៣០៥ពាន់លានដុល្លារអាមេរិក តើអ្នកណានឹងទទួលប្រាក់សំណងមុនគេ ប្រសិនជាក្រុមហ៊ុនអចលនទ្រព្យយក្សរបស់ចិន ខកខានមិនអាចទូទាត់សងបំ...

វៀតណាមត្រៀមបើកជើងហោះហើរត្រង់ឡើងវិញទៅអាមេរិក

ព័ត៌មាន
ក្រុមហ៊ុនអាកាសចរណ៍ Vietnam Airlines រំពឹងនឹងទទួលបានការអនុញ្ញាតពី អាជ្ញាធរអាមេរិក ក្នុងពេលឆាប់ៗ ក្រោយបង្ហាញពីផែនការបើកជើងហោះហើរទៀ...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ