ក្រុមហ៊ុនវិនិយោគ និងគ្រប់គ្រងការបណ្តាក់ទុនលើផ្នែកហិរញ្ញវត្ថុ Goldman Sachs បានព្យាករថា សេដ្ឋកិច្ចពិភពលោកនឹងកើនឡើងប្រមាណជា២,៦ភាគរយនៅឆ្នាំក្រោយ លើមូលដ្ឋានជាមធ្យមប្រចាំឆ្នាំ ដោយលើសការព្យាករកន្លងមក ដែលរំពឹងមានកំណើនត្រឹម២,១ ភាគរយ។
បើតាមការព្យាកររបស់ក្រុមហ៊ុននេះ សហរដ្ឋអាម៉េរិកត្រូវបានគេរំពឹងថា នឹងវ៉ាដាច់ទីផ្សាររបស់ប្រទេសអភិវឌ្ឍន៍ផ្សេងៗជាថ្មីម្តងទៀត ជាមួយនឹងកំណើនដែលបានប៉ាន់ប្រមាណ២,១ភាគរយ ហើយក្រុមហ៊ុននេះ ក៏ជឿជាក់ផងដែរថា ភាគច្រើន នៃគោលនយោបាយរឹតបន្តឹងរូបិយវត្ថុ និងសារពើពន្ធ ដែលអាមេរិកចាត់វិធានការដ៏តឹងរ៉ឹងអាចនឹងបញ្ចប់នៅក្នុងឆ្នាំ២០២៤ ខាងមុខនេះ។
ប្រភពដដែលបានបន្តថា ដើម្បីទប់ស្កាត់ការកើនឡើងអតិផរណា ធនាគារកណ្តាលរបស់សហរដ្ឋអាម៉េរិក បានចាប់ផ្តើមយុទ្ធនាការដំឡើងអត្រាការប្រាក់ដ៏ធ្ងន់ធ្ងរ របស់ខ្លួននៅក្នុងខែមីនា ឆ្នាំ ២០២២ នៅពេលដែលអតិផរណាបានកើនឡើងដល់កម្រិតខ្ពស់បំផុតក្នុងរយៈពេល៤០ឆ្នាំ។
លោក ជេរ៉ូម ផូវែល (Jerome Powell) ប្រធានក្រុមប្រឹក្សាភិបាលធនាគារកណ្តាលអាម៉េរិក កាលពី សប្តាហ៍មុនបាននិយាយថា លោកនៅមិនទាន់មានទំនុកចិត្តទេថា ធនាគារកណ្តាលអាម៉េរិកបានចាត់ចំណាត់ការគ្រប់គ្រាន់ ដើម្បីដោះស្រាយបញ្ហាការកើនឡើងអតិផរណាបាននៅឡើយទេ ហើយការស្នើសុំដំឡើងអត្រាការប្រាក់បន្ថែមទៀត ក៏នឹងអាចជាការចាំបាច់នាពេលខាងមុខក៏អាចថាបាន។
អត្ថបទគួរអាន
នេះគឺជាការលើកឡើងរបស់អ្នកគ្រប់គ្រងស្ថាប័នសេដ្ឋកិច្ចកំពូលរបស់អាម៉េរិក ប៉ុន្តែទោះបីជា យ៉ាងណាក៏ដោយ Goldman Sachs បាននិយាយថា អ្នកបង្កើតគោលនយោបាយនៅក្នុងទីផ្សារអភិវឌ្ឍន៍ទំនងជាមិនបន្ថយអត្រាការប្រាក់មុនឆមាសទីពីរនៃឆ្នាំ២០២៤ ឡើយ។
ប៉ុន្តែក្រុមហ៊ុននេះបានកត់សម្គាល់ថា អត្រាអតិផរណានៅក្នុងប្រទេស ដែលមានឧស្សាហកម្មរីកចម្រើនទាំង១០ ហៅហៅថា G10 និងសេដ្ឋកិច្ចទីផ្សារដែលកំពុងរីកចម្រើន ត្រូវបានគេរំពឹងថា នឹងមានបន្ធូរបន្ថយបន្ថែមទៀត។
អ្នកសេដ្ឋកិច្ចរបស់ក្រុមហ៊ុននេះបានព្យាករណ៍ថា អតិផរណានៅក្រុមប្រទេស G10 បានធ្លាក់ចុះនៅឆ្នាំនេះ និងបន្តធ្លាក់ចុះបន្ថែមទៀតនៅឆ្នាំ២០២៤ ដល់កម្រិតប្រមាណជា៣ភាគរយ ហើយអាចដល់កម្រិតពី២ទៅ២,៥ភាគរយ។
ក្រុមហ៊ុននេះ ក៏រំពឹងផងដែរថា សកម្មភាពរោងចក្រសកលនឹងងើបឡើងវិញពីការធ្លាក់ចុះនាពេលថ្មីៗនេះ ខណៈដែលខ្យល់ព្យុះសេដ្ឋកិច្ច និងហិរញ្ញវត្ថុត្រូវបានកំណត់ថា នឹងរលាយបាត់នៅឆ្នាំ២០២៤។ ក្រុមហ៊ុន Goldman Sachs បានកត់សម្គាល់ថា សកម្មភាពផលិតកម្មសកលត្រូវបានថ្លឹងថ្លែងដោយការស្ទុះងើបឡើងវិញនៃសេដ្ឋកិច្ចផងដែរ។
លោក ជេន ហាតហ្សឹស (Jan Hatzius) អ្នកសេដ្ឋកិច្ចរបស់ក្រុមហ៊ុន Goldman Sachs បានអះអាងថា សកម្មភាពផលិតកម្មជារួមរបស់ពិភពលោកនៅក្នុងឆ្នាំ២០២៤ នឹងមានសកម្មភាពលឿនជាងឆ្នាំ២០២៣៕
ដោយៈ សរ សុជាតិ
None
