ពីរថ្ងៃក្រោយការឡើងកាន់តំណែងរបស់លោក ត្រាំ តម្លៃមាសនៅកម្ពុជា ហក់ឡើងដល់៣៣០០ដុល្លារក្នុង១តម្លឹង

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភីលីង ស៊ីឃ្យួរីធី កត់សម្គាល់ឃើញថា ក្រោយលោក ដូណាល់ ត្រាំ ឡើងកាន់តំណែងជាប្រធានាធិបតីសហរដ្ឋអាម៉េរិកផ្លូវការរួចមក ហាងឆេងមាសនៅលើទីផ្សារអន្តរជាតិ បានហក់ឡើងថ្លៃជាង៥០ដុល្លារក្នុង១អោន ពោលគឺពីតម្លៃ២,៧០២ដុល្លារ ដល់២,៧៥៧ដុល្លារក្នុង១អោន។ គិតត្រឹមថ្ងៃទី២២ ខែមករា ឆ្នាំ២០២៥ ហាងឆេងមាសនៅទីផ្សារអន្តរជាតិ ត្រូវបានគេជួញដូរក្នុងតម្លៃ២,៧៥៧ដុល្លារ ក្នុង១អោន ខណៈការជួញដូរនៅទីផ្សារកម្ពុជា មានតម្លៃ៣,៣១៥ដុល្លារ ក្នុង១តម្លឹងមានការកើនឡើងប្រមាណ៦០ដុល្លារក្នុង១តម្លឹង បើធៀបនឹងតម្លៃជួញដូរកាលពីពីរថ្ងៃមុន។

ការហក់ឡើងតម្លៃមាសយ៉ាងគំហុកនេះ ត្រូវបានអ្នកជំនាញរូបនេះ អះអាងថា មិនមែនដោយសារការឡើងកាន់អំណាចរបស់ប្រធានាធិបតីថ្មីរបស់អាម៉េរិកតែមួយមុខនោះទេ ពោលគឺវាមានកត្តារួមផ្សំមួយចំនួនទៀតរួមមានភាពមិនច្បាស់លាស់នៃការផ្លាស់ប្ដូរថ្នាក់ដឹកនាំនៅក្នុងស្ថាប័នរដ្ឋាភិបាលអាម៉េរិក ការដាក់សម្ពាធពន្ធលើបណ្ដាប្រទេសមួយចំនួនដែលនឹងធ្វើឱ្យថ្លៃទំនិញ និងអតិផរណាកើនឡើងនៅអាម៉េរិក ព្រមទាំងគោលនយោបាយហិរញ្ញវត្ថុធនាគារកណ្ដាលអាម៉េរិក ខណៈការបន្ធូរបន្ថយអត្រាការប្រាក់បន្ថែមទៀតនឹងធ្វើឱ្យតម្លៃប្រាក់ដុល្លារធ្លាក់ចុះ ហើយហាងឆេងមាសនឹងឡើងថ្លៃជាស្វ័យប្រវត្តិ។

ដោយឡែក លោកបណ្ឌិត ភី សារ៉ាត់ ទីប្រឹក្សាជាន់ខ្ពស់សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា យល់ឃើញថា ការហក់ឡើងតម្លៃមាសនៅលើទីផ្សារពិភពលោកមិនមែនជំរុញដោយសារលោក ដូណាល់ ត្រាំ នោះទេ ព្រោះលោក ដូណាល់ ត្រាំ មិនបានគាំទ្រលើវិស័យគ្រឿងអលង្ការ និងត្បូងពិភពលោកនោះទេ។ អ្នកជំនាញរូបនេះជឿជាក់ថា រដ្ឋបាលរបស់លោក ដូណាល់ ត្រាំ នឹងជួបវិបត្តិលុយដុល្លារអាម៉េរិកធ្លាក់ចុះ ដោយសារសមាគមគ្រឿងអលង្ការ និងត្បូងពិភពលោកងាកមកទិញ-លក់ជាមាសវិញ។ ទន្ទឹមនេះ លោកបានវាយតម្លៃថា មាសនឹងបន្តឡើងថ្លៃរហូតដល់ចូលឆ្នាំចិន។

ក្រុមអ្នកវិភាគជឿជាក់ថា ដោយសារគោលនយោបាយសេដ្ឋកិច្ច និងការបរទេសរបស់លោក ដូណាល់ ត្រាំ ប្រធានាធិបតីសហរដ្ឋអាម៉េរិក ទើបឡើងកាន់តំណែងមិនទាន់មានភាពច្បាស់លាស់ វានឹងធ្វើឱ្យតម្លៃមាសនៅលើទីផ្សារពិភពលោកអាចនឹងប្រែប្រួលគួរសម។ ក្រុមអ្នកវិភាគបានព្យាករថា ក្រោមឥទ្ធិពលនៃគោលនយោបាយរបស់លោក ដូណាល់ ត្រាំ វានឹងជំរុញឱ្យតម្លៃមាសហក់ឡើងយ៉ាងហោចណាស់៦% នៅ៣ខែដំបូង មុនវាថមថយចុះបន្តិចមកនៅត្រឹម៣,៣% នៅ៦ខែបន្ទាប់។ នេះបើយោងតាមកាសែត បាងកកប៉ុស្តិ៍៕

អត្ថបទ៖ បូ ដូឡា