នាយកគ្រប់គ្រងក្រុមហ៊ុនជួញដូរហាងឆេងមាស MTS Gold Futures គឺលោក នូតាផុង ហ៊ីរ៉ុន យ៉ាស៊ីរី បានលើកឡើងថា កត្តានយោបាយក្នុងសហរដ្ឋអាមេរិក នឹងគាំទ្រឲ្យតម្លៃមាសកើនឡើងនៅក្នុងត្រីមាសទី៤ ឆ្នាំ២០២០នេះ។
អ្នកជំនាញ បានអះអាងទៀតថា អ្នកតាមដានទីផ្សារ គួរតែតាមដានឲ្យបានជាប់លាប់ចំពោះលទ្ធផលនៃការបោះឆ្នោតនៅសហរដ្ឋអាមេរិកនៅប៉ុន្មានថ្ងៃនេះ។ ពោលគឺ ប្រសិនបើលោកដូណាល់ ត្រាំឈ្នះ តម្លៃផ្សារភាគហ៊ុនទូទាំងសកលលោក នឹងកើនឡើង ព្រោះតែគោលនយោយបាយពាណិជ្ជកម្មសកល នឹងនៅតែបន្ដ ដោយគ្មានការផ្លាស់ប្ដូរអ្វីនោះទេ។ ក៏ប៉ុន្ដែ បើលោក ចូ បៃឌិន ឈ្នះវិញ ទីផ្សារភាគហ៊ុនចិន និងអាស៊ី នឹងកើនឡើងវិញនៅក្នុងក្ដីសង្ឃឹមដែលថា គោលនយោបាយពាណិជ្ជកម្មសកលនឹងត្រូវបានកាត់បន្ថយ។
ប៉ុន្ដែ បើតាមការគូសបញ្ជាក់ពីអ្នកជំនាញ បើលោកត្រាំ និងលោក បៃឌិន មិនមាននរណាឈ្នះឆ្នោតទេនោះ ទីផ្សារភាគហ៊ុននៅទូទាំងពិភពលោក អាចនឹងដួលរលំតែម្ដង ដោយសារតែភាពមិនច្បាស់លាស់ខ្លាំង។
អត្ថបទទាក់ទង
យ៉ាងណាក៏ដោយចុះ គេមើលឃើញថា ការបោះឆ្នោតនៅអាមេរិកនេះ អាចនឹងមានភាពមិនរកាំរកូស បើសិនជាលទ្ធផលចេញមកថា លោកដូណាល់ត្រាំ ចាញ់ឆ្នោត ព្រោះលោកត្រាំបានត្រៀមរៀបចំក្រុមការងារផ្នែកច្បាប់រួចហើយ ដើម្បីប្រឆាំងតវ៉ានឹងលទ្ធផល ហើយបើមានករណីការខកខានមិនព្រមទទួលយកលទ្ធផលនៃការបោះឆ្នោតមែននោះ វានឹងអាចធ្វើឲ្យសេដ្ឋកិច្ចអាមេរិក កាន់តែមានសភាពអាក្រក់ធ្ងន់ធ្ងរឡើង។ ទន្ទឹមនឹងនេះ តម្លៃប្រាក់ដុល្លារ អាចនឹងបន្ដធ្លាក់ចុះថែមទៀត ដែលនឹងធ្វើឲ្យតម្លៃមាសកាន់តែកើនឡើងទៀតផងដែរ។
លោកស្រី ណាផា ណាវ៉ា វ៉ាត់ថាណាសុប នាយិកាប្រតិបត្តិក្រុមហ៊ុន YLG Bulllion & Futures បានលើកឡើងដែរថា វាទំនងជាអាចនឹងមានការកើតឡើងនូវវិវាទចំពោះលទ្ធផលនៃការបោះឆ្នោតនៅសហរដ្ឋអាមេរិក ដែលវាអាចនឹងមានផលវិជ្ជមានសម្រាប់តម្លៃមាស។
ប្រសិនបើបញ្ហានៃការបោះឆ្នោតត្រូវបានដោះស្រាយបានទាន់ពេលវេលាក្ដីក៏ សហរដ្ឋអាមេរិក នៅតែប្រឈមនឹងបន្ទុកបំណុលសាធារណៈខ្ពស់ ការប្រាក់ទាប និងវិបត្តិធ្ងន់ធ្ងរដែលបានកើនឡើងដោយមេរោគរាតត្បាត ហើយបញ្ហាទាំងនេះ នឹងមានភាពអំណោយផលដល់តម្លៃមាសនៅក្នុងរយៈពេលវែង។
សូមបញ្ជាក់ថា នៅក្នុងខែវិច្ឆិកានេះ តម្លៃមាសទំនងជានឹងមានដល់ ១.៨០០ ដុល្លារអាមេរិក ទៅ ១.៩៥០ ដុល្លារអាមេរិក ក្នុងមួយអោន។
ក្រុមហ៊ុនជួញដូរហាងឆេងមាស MTS បានប៉ាន់ប្រមាណថា តម្លៃមាសនឹងកើនឡើងដល់ទៅ ២.០០០ ដុល្លារអាមេរិកក្នុងមួយអោន នៅត្រឹមចុងឆ្នាំ២០២០ ដោយមានការកើនឡើងថ្លៃ ១០%ទៀត នៅឆ្នាំក្រោយ ដោយមាសមួយអោនអាចនឹងមានតម្លៃ ២.២០០ ទៅ២.៣០០ ដុល្លារអាមេរិក៕
None
